Pwede abwa 13

Eyɔɔ zɔ nyɛmɛrɛ twatwa fyee

1Éngɛ mmɛ zɔ nyɛm twatwa deʼ è ma mùurù amɔ é gli efwɔ ebɔrɔndim, è me le ǹdwɔrɔ wum mane eto sàambyɛ, ǹdwɔ ŋwàʼaŋwàʼ me le ǹtàm m̀fɔ̀, ato ŋwaʼaŋwaʼ me le ekumu deʼ wɛ â ma ndwaʼa Ngwe ngɛ. 2Enyɛm ǹgɛ̀ yɛ mmɛ à zɔ ngɛ à ne mwɔ na ekùru nɔ, bɛʼngɛ elo ngɔ mwɔ na elo ángwe nɔ me klɔ nè nyɔrɔ anyi. À ne le ńgli dɔɔdɔɔ na nyɛm ngɛ deʼ yɛ a me klɔ ghɛʼ ngɛ. Eklo ngɔ mwɔ ne eklo ǹgɔmaŋwa nɔ. Ǹkwɔmnejwa yɛ a ndɛʼ afwɔ mɔ, ekama mɔ mane atan m̀fɔ̀ mɔ ebe enyɛm ngɛ yɛ. 3Ato enyɛm yɛ àbi ne na â me zhu aghɛʼnji bɔɔbɔɔ nɔ. Bɛʼngɛ abyɛ yɛ shi shi myɛ. Bɔ gimkpaʼ efwɔ ese â kɔn gɛ̀rɛ̀ sa kìrì enyɛm yɛ. 4Gho ŋwàʼaŋwàʼ à ghɔ ǹkwɔmnejwa yɛ na Ngwe nɔ mbɔʼnga a ndɛʼ ekama mɔ ebe enyɛm ǹgɛ̀ twatwa yɛ. Angɔ à gɛrɛ na ghɔ enyɛm yɛ ma bɔnɔ kpe awɛ mwɔ na enyɛm zɔnɔ? Awe me né ngwè engɔ?

5Â ndɛʼ afwɔ ebe enyɛm zɔnɔ é fɛfi è ndwaʼ Ngwe. Â gɛrɛ ndɛʼ afwɔ ebe engɔ é mwɔ ato efwɔ ata èsama fyee tɛʼ fyee. 6Enyɛm ǹgɛ̀ yɛ klada sa ndwaʼa Ngwe. Engɔ a ndwaʼ ekumu Ngwe, è ndwaʼ abɛ Ngwe mane bɔ gimkpaʼ byɛ e mwɔ ezob ngɛ. 7A gɛrɛ ndɛ̀ʼ afwɔ ebe engɔ é ngwe bɔ Ngwe è fɔɔ, gɛ̀rɛ̀ ndɛ̀ʼ ekama ebe engɔ é klini anɔrɔkla gimkpaʼ, ebɛ gimkpaʼ, m̀pèrè atsoʼ gimkpaʼ mane m̀pèrè bɔ gimkpaʼ. 8Bɔ gimkpaʼ efwɔ ese ba ngo ghɔ enyɛm zɔnɔ, à tyetye ma abɔ byɛ â shi ŋwɛʼrɛ akumu angɔ efwɔ aŋwɛʼrɛ etyê ŋwɔ ǹglɔ̀ wɛ â zhudu ngɛ. Â ŋwɛʼrɛ akumu angɔ enyɛrɛ èndzobo chɛ Ngwe à ndeere ese ngɛ. Aŋwɛʼrɛ zɔnɔ na angɔ eŋwɔ ǹglɔ̀ wɛ â zhudu ngɛ.

9“Egho wɛ me le ètimi ngɛ zhuru.” 10Egho wɛ â shi fuuru kpe e ba bere engɔ ngɛ, e bara bere. Engɔ wɛ â shi fuuru kpe e ba gbɛdɛ engɔ me ene ebye ngɛ, e bara gbɛdɛ. Ewunɔ ne tee kpe bɔ Ngwe klini etaa gɛ̀rɛ̀ le ebɛrɛ ene ega Ngwe.

11Éngɛ mmɛ wu zɔ enyɛm ǹgɛ̀ twatwa tsɛrɛ e ma ndooro amɔ ma gli à zeʼe efwɔ chwâ, me le ǹdwɔrɔ fyee na ŋwɔ ǹglɔ̀ nɔ ma ga na ǹkwɔmnejwa yɛ nɔ! 12Nyɛm yɛ à gli ekama yɛ nyɛm mbèmbè à me le ngɛ é klini bɔ anyi efàarà enyɛm yɛ. Engɔ à le ela gimkpaʼ efwɔ ese ghɔ nyɛm mbèmbè ngɛ. Enyɛm ǹgɛ̀ mbèmbè yɛ a ne engɔ yɛ a me le ebyɛ byɛ â fwɔ zhudu engɔ ngɛ, bɛʼngɛ abyɛ mɔmbwo a myɛ. 13Enyɛm nùrù fyee zɔnɔ à le anɛ̂ abwa kɛ akɛkɛ. Èbi me ga kpe à le éwu kla ezob efàarà bɔ gimkpaʼ. 14Enyɛm ǹgɛ̀ zɔnɔ à ndooro bɔ efwɔ ese ene amyɛnɛ abwa yɛ Ngwe à bɛrɛ kpe engɔ le ngɛ. Engɔ a na le abwa zɔnɔ gimkpaʼ efàarà enyɛm yɛ à fwɛ ewu shi nɔ ekɔʼɔ ngɛ. Engɔ à ga kpe e ndeere azhi yɛ angɔ ma ghɔ yɛ a me nu ezɔɔrɔ nyɛm mbèmbè yɛ â gbɛ a da bli ekɔʼɔ ngɛ.

15Ngwe à bɛrɛ kpe enyɛm nùrù fyee ngɛ fee azhwɛɛrɛ efwɔ azhi enyɛm mbèmbè ngɛ mbɔʼtye azhi yɛ le ekama é ga gɛrɛ le kpe e zhudu abɔ byɛ e ne ma ghɔ engɔ bo ngɛ gimkpaʼ. 16Enyɛm nùrù fyee yɛ à tiri bɔ gimkpaʼ adɔ̀kpara kà bɔ tɛbɛ, bɔ kɛb nè bɔ ndzaŋa, àdzob ne abɔ e mwɔ egha amɔ ngɛ shi angɔ ŋwɛʼrɛ anɛ̂ ebwo nde kà ekɔshi amɔ. 17Egho wɛ à ne me ŋwɛʼrɛ bo ngɛ, ka ala fɛn gɛrɛ na ala deʼ zɔn. Anɛ̂ yɛ â ŋwɛʼrɛ ngɛ mwɔ ekumu enyɛm zɔnɔ kà nuru wɛ me tama ene ekumu wɛ ngɛ.

18Ewunɔ ne ega kɛ́ e ma ke azɔm. Egho è me le azɔm ngɛ wee ǹji ene nuru nyɛm ǹgɛ̀ yɛ, enga nuru mɔmbwo me tama ene ekumu gho, nuru yɛ mwɔ 666 (mfo mfo mfo kà ako mfo nè èsama tɛd tɛʼ mfo).

Currently Selected:

Pwede abwa 13: nbt

Highlight

Copy

Compare