Pwede abwa 12

Aye wɛ mane ǹkwɔmnejwa ngɛ

1Éngɛ anɛ̂ ebwa zodo zodo deʼ gli ezob. Mmɛ zɔ aye deʼ wɛ ńchwe à me kɛɛrɛ engɔ sɔ̀ na ǹdi nɔ, eta mwɔ enji elo ngɔ, ǹtàm m̀fɔ̀ deʼ mwɔ ato ngɔ nè ńtɔrɔta wum ǹchwɔ̀ fyee anyi. 2Aye wɛ à ne mwɔ ebûm, è sa zamma é be ŋwɔ mɔ. Engɔ à na ku̧u mbɔʼnga abyɛ ŋwɔ à ma twa ghɛʼ.

3Éngɛ anɛ̂ ebwa zodo zodo tsɛrɛ gli ezob, mmɛ zɔ ǹkwɔmnejwa kɛ̀ deʼ efan. À ne le eto sàambyɛ nè ǹdwɔrɔ wum. Ato ŋwaʼaŋwaʼ me le ǹtàm m̀fɔ̀. 4Antsakɔ̀d ngɔ zɔɔ antiri ńtɔrɔta ŋwaʼ ezob efwɔ entiri tɛd byɛ â mwɔ ngɛ e tu a chwâ. Éngɛ ǹkwɔmnejwa yɛ tam embè aye wɛ à me kɛʼɛ é be ŋwɔ ngɛ, mbɔʼtye mbè nde ŋwɔ ngɔ èndzobo chɛ e ma be ngɛ. 5Éngɛ engɔ à be ŋwɔanɔm, eŋwɔ wunɔ me le afwɔ gimkpaʼ é klini bɔ gimkpaʼ edɔm chwâ ene ekama. Bɛʼngɛ angere Ngwe shuʼ eŋwɔ wunɔ ngɔ̀ɔ afwɔ yɛ Ngwe à mwɔ edɔm atan m̀fɔ̀ mɔ ngɛ. 6Aye wɛ à dɔrɔ ngɔ̀ɔ efwɔ akwâ ńked, ene afwɔ deʼ yɛ Ngwe à shi ndeere ebe engɔ ngɛ, mbɔʼtye engere kɔʼɔ engɔ aŋu efwɔ enji tɔɔshin ne ako fyee tɛʼ èsama tɛd.

7Éngɛ ebiri klada ezob, Maykɛl mane engere mɔ â ngwe nè ǹkwɔmnejwa yɛ. Ǹkwɔmnejwa yɛ nè èmɔ engere gɛrɛ ngwè achim. 8Bɛʼngɛ engere Maykɛl angɔ à ngwe ebiri fɔɔ ǹkwɔmnejwa yɛ nè engere mɔ, angɔ ne wu le afwɔ deʼ ezob bo. 9Â ndwa ǹkwɔmnejwa mane engere mɔ a chwâ. E jwe sam yɛ â ma zɔʼrɔ kpe dɛbli mane asatan wɛ e ma ndooro ese gimkpaʼ é le abwa bɔɔbɔɔ ngɛ na ǹkwɔmnejwa yɛ. Â ndwa engɔ a chwâ ne engere mɔ.

10Éngɛ mmɛ zo etsoʼ deʼ ma flaba ga ezob kpe, “Enjitsɔ epweere Ngwe shi zeʼe. Ngwe shi tee ekama mɔ é klini bɔ na m̀fɔ̀ nɔ. Ǹtɔmzhwaʼa Ngwe shi tee ekama mɔ enjitsɔ. Enga a shi ndwa egho wɛ à ma ngɔ̀ɔ efàarà Ngwe nchi mane ǹklì é ga abwa enji bɔ kristo ngɛ a chwâ. 11Éngɛ e gɛrɛ shi ngwe fɔɔ engɔ nyɛ̀rɛ̀ zèʼe ene anɔm ŋwɔ ǹglɔ̀ mane entsɛ éŋwaʼa byɛ a ma ga mbɔʼ ngɔ ngɛ. Angɔ a de na ke ndɛʼ etsɔmɔ amɔ è ku mbɔʼtye e sɛɛrɛ ega Ngwe mbɔʼnga angɔ à ne nɛɛ kpe ebwa wɛ mbɔɔ a ma sɛ̀ɛrɛ̀ ngɛ ne éŋwaʼa. 12Egɛnɛ mwɔ ezob mane ebe abɔ byɛ e ma tsɔmɔ aŋu ngɛ. Bɛʼngɛ abɔ byɛ e ma tsɔmɔ edɔm chwâ mane efwɔ ebɔrɔndim ngɛ ba ngo zɔ ǹgoʼ ghɛʼ ene eboo asatan mbɔʼnga engɔ we nɛɛ kpe endzobo ndze a shi tiimi.”

13Èndzobo chɛ ǹkwɔmnejwa à zɔ kpe a shi ndwa angbe a chwâ ngɛ, engɔ kaara aye wɛ à be eŋwɔanɔm wɛ ngɛ. 14Bɛʼngɛ â ndɛʼ eblaba àfùu kɛ èfyee ebe aye wɛ mbɔʼtye engɔ me né fùrù nyɛrɛ ebe jwe yɛ ngɔ̀ɔ efwɔ akwâ ńked, ene afwɔ mɔ yɛ e me ndeere ebe engɔ ngɛ. Engɔ wa ngo mwɔ ene aghɛʼ yɛ ǹkwɔmnejwa ne ma ngo zɔ engɔ bo ngɛ. Engɔ wa tsɔmɔ aŋu efwɔ enɔ̂m tɛd mane ata mfo. 15Enyɛrɛ efwɔ eta wɛ, ǹkwɔmnejwa yɛ chi ndim efwɔ eklo mɔ na andzɔ̀ʼ nɔ tu ekwa aye wɛ è beʼ engɔ ngɔ̀ɔ. 16Bɛʼngɛ chwâ à zeʼe kpèdè aye wunɔ, è fuʼu eklo mɔ ŋwɔ andim myɛ ǹkwɔmnejwa yɛ à ma tù ene eklo mɔ ngɛ. 17Éngɛ ǹkwɔmnejwa yɛ bɔɔ etaa ene aye wɛ, gɛ̀rɛ̀ ngɔɔ ngwè ebiri nè bwɔ ngɔ wɛ mwɔ abɔ byɛ e ma shi atsɛrɛ Ngwe gɛrɛ ma bɛ̀rɛ antsɛ ene Yeso ngɛ. 18Éngɛ ǹkwɔmnejwa yɛ nu afwɔ mɔ edɔm ńchiri ewee ebɔrɔndim.

Currently Selected:

Pwede abwa 12: nbt

Highlight

Copy

Compare