Pwede abwa 14

Ŋwɔ ǹglɔ̀ mane bɔ mɔ

1Éngɛ mmɛ kɔʼ gɛrɛ zɔ ŋwɔ ǹglɔ̀ me tam edɔm egu Zayɔ̀n. Bɔ 144,000 me tamma nè ǹglɔ̀ yɛ gɛ̀rɛ̀ me ŋwɛʼrɛ ekumu ngɔ mane ekumu Àtɛ mɔ ekɔshi àmɔ̀. 2Mmɛ gɛrɛ zo etsoʼ deʼ ma gà zeʼe ezob ne ndim ma kla ene akob mane m̀bò ma bwe nɔ. Atsoʼ mɔmbwo ma gà na àchi enɛmɛrɛ ma chi enɛmɛrɛ àmɔ̀ nɔ. 3Angɔ gɛrɛ kwɔn etsa fe efàarà atan m̀fɔ̀, efàarà ela kɔʼɔ kwɛ̀ mane efàarà eto. Gho tsɛrɛ à ke né bɛɛrɛ etsa wɛ bo, à tye ma angɔ 144,000 byɛ Ngwe à shi lɔɔ angɔ ebe ese ngɛ. 4Abɔnɔ à na bɔ byɛ â ne shi nɛɛ ebwa deʼ mbɔʼ aye bo ngɛ, enga angɔ à bli m̀fòrò. Angɔ à na kìrì ǹglɔ̀ ka de ma afwɔ ze yɛ à ma ngɔɔ ngɛ. Â lɔɔ angɔ zeʼe abwaʼ etseʼre bɔ ze, angɔ mwɔ ne enta azɔd mbèmbè nɔ ebe Ngwe mane ŋwɔ ǹglɔ̀ byɛ a me ndɛʼ ne ela etɔ̧ɔrɔ nɔ. 5Angɔ à ke ga andɔɔ ekyɛ deʼ bo gɛrɛ ne go ebwa deʼ bo.

Engere tɛd zeʼ nè ekɔn mbɔʼ etsɛrɛ esɛʼ Ngwe

6Éngɛ mmɛ zɔ angere tsɛrɛ ma fùrù ekere àkɛ. Engɔ à ne zeʼe nè ekɔn ǹchwɔ̀ wɛ e me tye ekyɛ ŋwaʼ ngɛ, é sɛ̀ɛrɛ̀ ebe abɔ byɛ e ma tsɔmɔ a chwâ ngɛ; m̀pèrè bɔ gimkpaʼ, bɔ efwɔ m̀pèrè akla gimkpaʼ, efwɔ ebɛ gimkpaʼ, bɔ nè m̀pèrè atsoʼ gimkpaʼ mane bɔ efwɔ m̀pèrè ebe gimkpaʼ. 7Engɔ ga ene etsoʼ kɛkɛ kpe, “Mbɔn bum Ngwe, ndɛʼ eghɔ ebe engɔ enga endzobo tsɛrɛ esɛʼ ngɔ shi koʼo, mbɔn ghɔ engɔ mbɔʼnga engɔ à ndeere ezob mane chwâ, ebɔrɔndim mane emumun ndim.”

8Éngɛ angere nùrù fyee kiri ma gà kpe, “Engɔ shi go! Angwa abɛ Babilɔn shi go! Ngwe shi le ebɛ gimkpaʼ ŋwɔ amɔm ngɔ myɛ à ma le bɔ ma nde ese ngɛ!”

9Angere nùrù tɛd tɛʼ amɔ achim angɔ ma ku̧u ene angwa etsoʼ kpe, “Abɔ byɛ e ma ghɔ enyɛm ǹgɛ̀ yɛ à gli efwɔ ebɔrɔndim mane azhi mɔ, e bwɛ enɛ̂ mɔ ekɔshi àmɔ̀ kà ebwo àmɔ̀ ngɛ, 10angɔ gɛrɛ ba ngo ŋwɔ mɔm eboo Ngwe myɛ, engɔ me ge efwɔ ǹtoʼ eboo mɔ ngɛ! E ba ngo zɔ ǹgoʼ ene éwu wɛ e ma bɛ̀rɛ efàarà engere mane ŋwɔ ǹglɔ̀ ngɛ. 11Enjiʼewu wɛ e ma ndɛʼ ǹgoʼ ebe angɔ ngɛ, yà sa ngɔɔ embèembè. Ekuru deʼ yà me tsɛʼ ebe abɔ byɛ e ma ghɔ nyɛm yɛ ǹklì mane nchi ngɛ bo. Ne éngɛ e ma ngo mwɔ nè gho deʼ wɛ ma ngo le anɛ̂ enyɛm zɔnɔ ngɛ.” 12Abwa zɔnɔ gimkpaʼ na tee kpe bɔ Ngwe le eklinitaa. Abɔnɔ na angɔ byɛ e ma shi atsɛrɛ gɛ̀rɛ̀ me shi ebɛrɛtaa àmɔ̀ ene Yeso é me kama ngɛ.

13Éngɛ mmɛ zo etsoʼ deʼ ga ezob kpe, “Ŋwɛʼrɛ ebwa wunɔ, m̀bɔ̀nɔ ye ebe abɔ kudu byɛ e ma ku ene ekumu Masakɛ nyɛrɛ zeʼe ànchwɔ̀ sa ngɔ̀ɔ embè ngɛ.” Azhwɛɛrɛ ga kpe, “Ɔ̧̀ɔɔ! Angɔ ba ngo ku̧ru ene efwɛʼ àmɔ̀ mbɔʼnga eleabwa ǹchwɔ̀ angɔ shi kiri angɔ.”

Eku byɛ e ma dza efwɔ ese ngɛ

14Éngɛ mmɛ kɔʼɔ gɛ̀rɛ̀ zɔ m̀bɛ̀ʼ bla deʼ, gho deʼ me tsɔmɔ edɔm m̀bɛ̀ʼ yɛ na Ŋwɔ Gho nɔ, e me ge ǹtàm m̀fɔ̀ yɛ e me ndeere ene aklibi àfɔ̀n ngɛ edɔm ato ngɔ, è gɛrɛ me bere ebye ngwɔ̀bɔ̀ twatwa deʼ wɛ e ma dza ela anyi ngɛ abwo mɔ. 15Éngɛ angere tsɛrɛ gli zeʼe efwɔ ndɔngwe kɛ̀, ma zɔʼ egho wɛ à me tsɔmɔ edɔm m̀bɛ̀ʼ ngɛ ene etsoʼ kɛkɛ kpe, “Nu ebye ngwɔ̀bɔ̀ ngwɛ é dza ela mbɔʼnga endzobo dza ela shi koʼo, eku byɛ â me kɔrɔ edɔm chwâ efwɔ ese ngɛ shi fara anchwɔnchwɔ.” 16Éngɛ egho wɛ à me tsɔmɔ edɔm m̀bɛ̀ʼ yɛ ngɛ wuumu ebye ngwɔ̀bɔ̀ mɔ edɔm ese gɛrɛ dza eku edɔm ese gimkpaʼ.

17Éngɛ angere tsɛrɛ gli efwɔ ndɔngwe kɛ̀ ezob. Engɔ à gɛrɛ ne le ebye ngwɔ̀bɔ̀.

18Éngɛ angere tsɛrɛ gli zeʼe efwɔ echud gà ega Ngwe, angere wɛ à me le ekama edɔm ewu ngɛ, engɔ gɛrɛ zɔʼ engɔ wɛ à me le ebye ngwɔ̀bɔ̀ twatwa ngɛ ene etsoʼ kɛkɛ kpe, “Nu ngwɔ̀bɔ̀ twatwa njɛ tsɛrɛ ajwɛʼ anta azɔd vana efwɔ ese mbɔʼnga enta byɛ à shi fara.” 19Éngɛ angere wɛ wuumu ebye ngwɔ̀bɔ̀ mɔ edɔm ese, shùnu bɔ bɔɔbɔɔ ne e ma shùnu enta azɔd e tu angɔ efwɔ afwɔ yɛ Ngwe ma tee eboo kamakam mɔ ngɛ. 20Â na dzɛ̀ddɛ̀ abɔ ǹchù bɔnɔ ene afwɔ yɛ â ma dzɛ̀ddɛ̀ bɔ ǹchù ngɛ ewee abɛ, anɔm gli efwɔ shim yɛ ne eji ma kla nɔ ngɔɔ tye me èkilomɛta ako tɛd nɔ. Njì yɛ anɔm à ma dɔrɔ à kla anyi ngɛ à ne mwɔ tye gho nyii efwɔ, anɔm kwaʼ bwɛ̀n ambɔ̀ʼ abwo ngɔ.

Currently Selected:

Pwede abwa 14: nbt

Highlight

Copy

Compare