Pwede abwa 11

Eyɔɔ zɔ Entsɛ fyee

1Â ndɛʼ atam deʼ ena yɛ à me mwɔ na atam é mò ala anyi nɔ. Éngɛ angɔ ga ena kpe, “Ngɔ̀ɔ mò ndɔngwe kɛ̀ ndza, mane echud ga ega Ngwe, gɛrɛ ta abɔ byɛ e ma ghɔ Ngwe efwɔ ngɛ. 2Bɛʼngɛ ke emwɔ mo, mbɔʼnga mmɛ shi ndɛʼ ebe ebɛbɔ. Angɔ ba ngo dzɛ̀ddɛ̀ antiri abɛ pɛ efwɔ ata èsama fyee tɛʼ fyee. 3Mmɛ wa ngo chidi entsɛ mbu fyee, angɔ ge ǹdiri ku, e ba ngo ga abwa yɛ a ma ngo gli ngɛ efwɔ enji tɔɔshin ŋwaʼ nè ako fyee tɛʼ èsama tɛd.” 4Entsɛ fyee bɔnɔ ne ezɔd olif fyee mane achud tɛʼɛ anâm fyee byɛ e me tamma efàarà Masakɛ, wɛ me klini ese gimkpaʼ ngɛ. 5Mala gho deʼ ma ké le ebwa bɔɔbɔɔ ekwa angɔ, éwu wa gli eklo angɔ è tsɔŋɔ bɔ m̀pɛ̀ʼ angɔ mɛ̀ɛrɛ̀. Éngɛ ene aghɛʼnji ŋwaʼ zɔnɔ, egho wɛ ma ké tsɔŋɔ angɔ ngɛ, e ba zhudu engɔ. 6Angɔ be le ekama é gwɔ̀b ezob mbɔʼtye m̀bò ne ngwe èndzobo chɛ e ma ngo ma sɛ̀ɛrɛ̀ ega Ngwe ngɛ bo. Angɔ gɛrɛ be le ekama é le ndim firi shi anɔm, è le ekama é sàa m̀pèrè eŋwan gimkpaʼ efwɔ ese ene endzobo yɛ angɔ ma ke ngɛ. 7Èndzobo chɛ angɔ ma ngo mɛ̀ɛrɛ̀ ga ebwa wɛ â saa angɔ kpe e ga ngɛ, nyɛmɛrɛ ǹgɛ̀ bɔɔbɔɔ chɛ e me nyɛrɛ zeʼe efwɔ edzɔwu kɛ́ ngɛ ba ngo bèrè, ngwè fɔɔ gɛrɛ zhudu angɔ. 8E ba ngo ndwa ekudubɔ angɔ a njikɛ̀ yɛ ma fɔɔ efwɔ antiri abɛ kɛ́ yɛ â kɔmmɔ Masakɛ aŋu ngɛ. E na zɔʼrɔ antiri abɛ yɛ ene ega timi kpe Sodɔm kà Ejip. 9Bɔ efwɔ ebɛ gimkpaʼ, anɔrɔkla, atsoʼ gimkpaʼ mane m̀pèrè bɔ gimkpaʼ ba ngo tsɔmɔ efwɔ enji tɛd mane abɛɛ ma kede ekudubɔ angɔ ne bɛrɛ kpe é kpa bo. 10Bɔ efwɔ ese ba ngo ma gɛnɛ àmɔ̀, kɛ̀ʼ akɔm, dàda bɔ ene ela, é tee aŋu e me gɛnɛ amɔ ngɛ. Angɔ ba ngo le énde mbɔʼnga bàmɛnɛkɔn fyee bɔnɔ â nyii abɔ byɛ e ma tsɔmɔ efwɔ ese ngɛ ghɛʼ. 11Aŋu enji tɛd mane abɛɛ â fɔɔ ngɛ, Ngwe saa azhuʼ etyê mɔ a nyii efwɔ akwa angɔ, angɔ zhwɛm gɛrɛ tamma ekere. Èklɔ̀ bere abɔ byɛ â zɔ angɔ ngɛ. 12Éngɛ bàmɛnɛkɔn fyee byɛ zo go deʼ ma gà ebe angɔ nyɛ̀rɛ̀ zèʼe ekere kpe, “Mbɔn kwaʼ zeʼe ekere anɔ!” Bɔ m̀pɛ̀ʼ angɔ ma zɔ aŋu angɔ à ma kwaʼ ngɔ̀ɔ ekere efwɔ m̀bɛ̀ʼ ngɛ. 13Èndzobo chɛ èndzobo chɛ, akwâ njiʼi ene ekama è gɛ̀bbɛ̀ antiri abɛ ene aklo wum, è tsɔŋɔ abɛɛ bi, bɔ kudu ètɔɔshin sàambyɛ, èklɔ̀ bere etseʼre bɔ ze, e sa ghɔ Angwanìm Ngwe, engɔ wɛ mwɔ ekere ngɛ. 14Engwa ǹgoʼ nùrù fyee shi fɔɔ, bɛʼngɛ engɔ yɛ me bwɛrɛ tɛd ngɛ shi anji.

Angere fee Amboo nùrù sàambyɛ

15Éngɛ angere nùrù sàambyɛ fee amboo mɔ, mmɛ zo etsoʼ ga zeʼe ekere kpe, “Ebwa m̀fɔ̀ efwɔ ese shi ebwa m̀fɔ̀ Masakɛ bɔ mane Ǹtɔmzhwaʼa mɔ. Engɔ wa ngo mwɔ m̀fɔ̀ efwɔ akyɛ kengudu.” 16Éngɛ eto asamabi tɛʼ kwɛ̀ byɛ e ma tsɔmɔ edɔm etan m̀fɔ̀rɔ̀ àmɔ̀ efàarà Ngwe ngɛ, godo kubu afaara àmɔ̀ a chwâ sa ghɔ Ngwe, 17ma gà kpe, “Mbyɛɛ ndɛʼ ebɛrɛ engɛ̂ Angwanìm Masakɛ Ngwe, engɔ wɛ mwɔ enjitsɔ gɛrɛ shi tsoro mwɔ akyɛ gimkpaʼ ngɛ, mbɔʼnga ngwo shi nu ekama njɛ é klada sa klini bɔ!” 18Bɔ gimkpaʼ byɛ a ne ma ghɔ awɛ bo ngɛ a na bɔɔ etaa mbɔʼnga endzobo ene eboo mfyɛ shi zeʼe. Endzobo shi bwɛrɛ é sɛʼ bɔ kudu. Endzobo gɛrɛ shi koʼo é nɛ̀rɛ̀ bɔ afwɛʼ mbyɛ, bàmɛnɛkɔn mane abɔ byɛ â ma ge ànòŋò ene ekumu ngwɛ ngɛ, akparakpara mane akɛkɛ, mane angɔ byɛ e mwɔ na ela bli ngɛ, gɛrɛ tsɔŋɔ abɔ ngɔ byɛ â ma tsɔŋɔ abɔ abê efwɔ ese ngɛ. 19Éngɛ ndɔngwe kɛ̀ ekere à fuʼ, mmɛ zɔ ekwɔb atsɛrɛ Ngwe efwɔ, ekɛʼ ma pɛ na m̀bò ghɔbɔ nɔ, akwâ kumu gɛrɛ njiʼri, awa tu.

Currently Selected:

Pwede abwa 11: nbt

Highlight

Copy

Compare