Pwede abwa 10

Angere mane aŋwɛʼrɛ fudu kparakpara

1Éngɛ mmɛ zɔ angere kamakam tsɛrɛ ma kla zeʼe a chwâ nyɛ̀rɛ̀ zèʼe ekere. Engɔ à ne mwɔ efwɔ m̀bɛ̀ʼ nè ebye m̀bò ato mɔ. Efàarà ngɔ à ne mwɔ na enchwe nɔ, elo ngɔ me mwɔ na ǹtwàʼ éwu nɔ. 2Engɔ à ne bere aŋwɛʼrɛ fudu kparakpara deʼ abwo mɔ, yɛ à shi fuʼu ngɛ. Angere wunɔ me tɛʼɛ alo nde mɔ edɔm ebɔrɔndim, tɛʼ alo àmɔ̀ mɔ edɔm chwâ. 3Engɔ tsɛɛ akɛkɛ na ǹgɔmaŋwa nɔ. Èndzobo chɛ engɔ bwe akyɛ sàambyɛ ngɛ, è kumu na m̀bò nɔ. 4Aŋu a ma kumu na m̀bò ngɛ, mmɛ sa ké klada é ŋwɛ̀ʼrɛ̀ abwa yɛ à ga ngɛ. Bɛʼngɛ mmɛ zo etsoʼ deʼ nyɛrɛ zeʼe ekere ma gà kpe, “Ngà ke toʼro ebwa wɛ emboo sàambyɛ ma ga ngɛ bo, gɛrɛ kà a chwâ ŋwɛʼrɛ, shi e nɔ ato njɛ.” 5Éngɛ angere wɛ mmɛ à zɔ è me tama, alo bi mwɔ edɔm ebɔrɔndim, àbi mwɔ a chwâ ngɛ beʼ abwo ande mɔ ekere. 6Engɔ kànna abwa ene ekumu Ngwe yɛ me tye ekyɛ ŋwaʼ ngɛ, engɔ wɛ à ndeere ezob mane chwâ mane ebɔrɔndim mane ela gimkpaʼ byɛ e mwɔ efwɔ ngɛ, gɛrɛ ga kpe, Ngwe ke ma wu nyiimi endzobo deʼ é le ebwa wɛ engɔ shi kɛʼɛ ngɛ bo. 7Bɛʼngɛ efwɔ enji byɛ angere nùrù sàambyɛ ma ngo fee amboo mɔ ngɛ, ebwa nɛŋɛnɛŋɛ Ngwe wa gli éŋwaʼa, aŋu Ngwe à me shi ngɛ, aŋu engɔ à toʼro ebe bɔ afwɛʼ mɔ bàmɛnɛkɔn ngɛ. 8Éngɛ etsoʼ wɛ mmɛ à zo e ma gà ena nyɛ̀rɛ̀ zèʼe ekere ngɛ wu ga ena kpe, “Ngà ngɔ̀ɔ nu aŋwɛʼrɛ yɛ a me fuʼu mwɔ abwo angere wɛ è me tama edɔm ebɔrɔndim mane a chwâ ngɛ.” 9Éngɛ mmɛ ngɔɔ ebe angere wɛ, gà ebe engɔ kpe engɔ ndɛʼ aŋwɛʼrɛ kparakpara yɛ. Engɔ ga ena kpe, “Ngà kwo nde, a ya ngo ma ngwe efwɔ ebûm njɛ, bɛʼngɛ ma nàm na abliʼi nɔ efwɔ eklo ngwɛ.” 10Éngɛ mmɛ nu aŋwɛʼrɛ fudu kparakpara zɔnɔ abwo angere gɛrɛ nde. À na nàm efwɔ eklo ngu na abliʼi nɔ, bɛʼngɛ èndzobo chɛ mmɛ à shi nde ngɛ ebûm ndza sa ngwè. 11Éngɛ angere wɛ ga ena kpe, “Ngwo wara wu toʼro ebwa wɛ e ma ngo gli ekwa m̀pèrè bɔ akɛkɛ, m̀pèrè ebɛ akɛkɛ, m̀pèrè atsoʼ akɛkɛ mane m̀pèrè m̀fɔ̀rɔ̀ akɛkɛ ngɛ.”

Currently Selected:

Pwede abwa 10: nbt

Highlight

Copy

Compare