Romans 8

Tukatungululwa nu Muzimu Mwimichile

1Achaleka kanonzi wano wali mwakwe Klistu Yesu wasi numulandu. 2Amuno amasundo ya Muzimu, yano yakatupa uwumi wuno tuli nawo mwakwe Yesu Klistu, ayano yankulula kumasundo yano yakandetelela uluwembu nimfwa. 3Chino amasundo yapotezilwe ukuchita, amuno awutontechele wamiwele yitu, achili chino Leza wachita. Alyakuti achimvye uluwembu luno mumiwele yawuntu, Leza watumile Umwanakwe, ayiza ngati amuntu nimiwele iyiliyonga ukuti ayize ayonone uluwembu. 4Leza wachisile wonye-woo alyakuti uwulungamane wuno amasundo yakalonda wize wuloleke kwesweswe, swewantu tutatontela Muzimu Mwimichile, imiwele yawuntu pole. 5Ukuwa wane wakatontela ukulonda kwamiwele yawuntu, imyezo yawo ikakunjilila kokonye. Nawo wane wakapita ndivino Umuzimu wukawatungulula, awano imyezo yawo ikatungululwa nu Muzimu. 6Nd'umwezo wako wukakunjilila kumiwele yawuntu ulifwa; ukuwa nd'umwezo wako watungululwa nu Muzimu peni uliwa nuwumi numutende. 7Achaleka nd'umwezo wamuntu wukakunjilila kumiwele yakwe akutela amulwani wakwe Leza; amuno atela akuchila amasundo yakwe Leza, akupotwa ukuyatontela. 8Wano wakatontela imiwele yawo wasisechelesya Leza.

9Ukuwa mwenji musinakupetulwa nimiwele yinu; mukatungululwa nu Muzimu ndi nachawuzimanye, Umuzimu wakwe Leza wukwikalanga mwakwe mwemwe. Wensi wino asi nu Muzimu wakwe Klistu ye asi awakwe Klistu. 10Ukuwa ndi Klistu ali mwakwe mwemwe, chingatenga imiwili yinu ingafwa muno aluwembu, lelo naponye e Muzimu awili wumi winu, amuno wawalungamika kwakwe Leza. 11Ukuwa ndi Umuzimu wakwe Leza wino wazyulupuzile Klistu kumfwa awuno wuli mwakwe mwemwe, fwandi weyonye wino wazyulupuzile Klistu kumfwa awino alileka nimiwili yinunye yino ikafwa iwe nuwumi, muno Umuzimu wakwe wuli mwakwe mwemwe.

12Achaleka fwandi wanawitu, tuli nachino chatulesya, ukuti tutize tuwakonchelela imiwele yitu iyawuntu. 13Amuno ndi mukuchita wowonye mulifwa; ukuwa ndi a Mumuzimu, amuno mukusindila imilimo yaluwembu, muliwa mwewalanzi. 14Wano wakakolelelwa nu Muzimu wakwe Leza ye awana wakwe Leza. 15Amuno Umuzimu wuno Leza wawapa wutawalema uwuzya ukuti muwatina; ukuwa, Umuzimu waleka mwawa mwewanakwe Leza, swinya mumaka yakwe amuno tukalilila inkuta kwe Leza, tukati, Tata! Etata! 16Umuzimu wakwe Leza amuno wukayisanzya nimizimu yitu atupanichisya kuno swewanakwe Leza. 17Achaleka fwandi vino swewanakwe awoo, tulipepwa nivizima vino wasengulila awantu wakwe, swinya tulipochelela apaliponga nu Klistu vino Leza wasengulila Klistu; amuno ndi tukuyimba apaliponga nu Klistu, fwandi ye tulichindamikwa apaliponga nawe.

Uwukankala wakunkolelo

18Amuno nkulola ukuyimba kuno tukuyimba kanonzi kutanga nanti katichi-tichi kukolane nuwukankala wuno wulisokoloka kwesweswe. 19ivitumbulwa vyonsi vikaluchila nkaninye ukulola kuno Leza wasokolola awanakwe. 20Amuno ivitumbulwa vyasumbichizilwe aviwa avyavye, lelo kusi akukulonda kwawo, ukuwa amuno Leza awino walonzile ukuti avino chiwe. Ukuwa naponye kwalinji ukulolela koo, 21ukuti uwanda wutalile akantu ivitumbulwa vize-vize vitawulwe kuwuzya wakuwola, viwe nuwukankala wawanangwa awanakwe Leza. 22Ukuwa twamanya kuno ukufika kanonzi ivitumbulwa vyonsi vikalilizika nukulweta muno awulumila wuno wuli ngati awulumila wampapo. 23Ukuwa ivitumbulwa vitupu pole, naswenye swewantu tuli numuzimu wuno achawila chakutalika ichakwe Leza, tukalweta mumyezo yitu pane tukulindilila ukuti Leza aleke tuwe swewanakwe, aleke imiwili yitu yonsi ikululwe. 24Amuno twatulilwa mukulolelanye koo; ukuwa ndi twalola chino tukulolela fwandi ye kusi akulolela kwenecho. Ngaweweni wino akalolela chino akulola naminso? 25Ukuwa ndi ukulolela kwitu akwakulolela chino tusinakulola, tungalanga tukalindilila chimyamya.

26Mumwata wonye-woo amuno

Muzimu akatwavwizya, mukutonta kwitu. Amuno tutamanya muno tungapepela; ukuwa Umuzimu uwenecho awuno wukatulambilizizya kwe Leza, nukulweta kuno kusi akwakutaka. 27Ngapano e Leza, wino akalolechesya mumyezo yawantu, awino wamanya amelengania ya Muzimu vino yali; amuno Umuzimu awuno wukalambilizizya awantu wakwe kwe Leza ukulingana nukulonda kwakwe.

28Swinya twamanya kuno mwakwe vyonsi vino tukachita, we Leza-nye awino akatwavwilizya swewantu twamukunda, sweswenye swewantu watwisile nukulonda kwakwe ukuti tuwachita ichete. 29Amuno wane Leza wasolowozile kali awali wano wawapawula wawa ngati Amwanakwe, alyakuti Umwanakwe akolelele awanyina wavule. 30Achaleka Leza wita wane wapawula; nawawo wane wawita wawalungamika kweweliwe; nganawo wano wawalungamika awano wawakosola uwukankala wakwe.

Klistu Yesu awili lukundo lwakwe Leza

31Ngafwandi, twandi tuti wuli pakwe chonye-choo? Vino Leza we Katula witu, nga weni angatusakamika? 32Atalemelezile Umwanakwe alanga ali nawe, ukuwa amulemeka muno asweswe swensi! Atupa Umwanakwe ngafwandi angapotwa wuli ukutupa uwila ivintu vyonsi? 33Ngaweni angasumbichila awasolwa wakwe Leza? Vino e Leza-nye umwenecho wati, Wasi nakasinza kamwi! 34Aleni, Wuzye fwandi pali wumwi wino angawapa umulandu? Pasi nanti wenga! E Klistu Yesu awino wafwile, wino swinya wazyulupuzilwe kumfwa ayikala kwikasa lyakwe Leza ilyandilo. Awino akatulambilizizya kwe Leza! 35Ngafwandi, kuli weni wino swinya angatupantula kulukundo lwakwe Klistu? Nawumwi! Wuzye amalanda, pamwi akuyimba, pamwi ukulumwa, pamwi ichinkumbili, pamwi akuzwaluka, pamwi umupamba, pamwi imfwa, 36ngavino Amawaliko Matela yavwanga yati,

Amuno awewe twinjila mumipamba yakufwa uwanda nuwukulu;

twachitwa wang'onzi zino zikalembwa.

37Awe, nachimwi, muvintunye vyoo vyonsi tuli namaka yakuchimvizya muno weliwe wino watukunda! 38Amuno nkupanichisya kuno pasi nantichonga chino chingatupantula kulukundo lwakwe: nanti amfwanye nanti awumi; nanti awangeli nanti amfumu nanti amaka yamwiyulu; nanti avintu vino vilipo, nanti avintu vino viliyiza; 39nanti avyamupela, nanti avyapansipansi pasi ichitumbulwa nanti chonga chino chingatupantula kulukundo lwakwe, luno alwitu muno we Klistu e Yesu Imfumu yitu.

Currently Selected:

Romans 8: WWN82

Highlight

Copy