Romans 7

Ukukolania kuvyitwala

1Wanawitu, nkusuwila kuno mwandi mwiluke vino nandi mbanene, amuno mwensinye mwamanya amasundo. Amasundo yakavinda umuntu ponsi pano achili ali nuwumi. 2Amuno, ndivino umwanachi wino watwalwa, wanyepwa nisundo kumulume muwulanzi wakwe; ukuwa ndi umulume wafwa, atela umwanachi walufuma kwisundo lyamulume. 3Achaleka, ndiwaya watwalwa kumonsi winji pane umulume achili amumi, atela amuzelele; ukuwa ndi umulume wafwa, atela walufuma mwisundo, ndiwaya watwalwa kwewinji peni atela asinakuzeleluka. 4Avino nakwemwemwenye chili, wanawitu, namwenye mwafwile mwalufuma kumasundo, amuno mwevyawi vyamuwili wakwe Klistu; achaleka kanonzi mwawa mwewakwe wino wazyulupuzilwe kumfwa alyakuti naswe swensi tuwachitila Leza chimwi. 5Amuno pano twachitanga ukulonda kwitu, amasundo yavunduzile ukulonda kuwipe ukwamiwili yitu ngapano atuyiletelela imfwa. 6Ukuwa kanonzi twalufuma kumasundo, amuno twafwa twalufuma kwechocho chino chatulemile uwuzya. Kanonzi tusikonchelela imilimo mikali iyamasundo yano yatantikwa, ukuwa tukapita munzila-mpya iyakwe Muzimu.

Isundo likaletelela uluwembu

7Ngafwandi, twati wuli? Wuzye fwandi amasundonye aluli luwembu? Awe, nanti katichi-tichi! Ukuwa amasundonye ayano yalesile manya uluwembu. Ntanga manye chino ukukumbuchila chikasula, ndi akusowa isundo lino likati, Utakumbuchila. 8Uluwembu aluno lwaselezile mwisundo alukatusya ikumbuchila lyonsi mwakwe nene amuno ndi akusowa isundo, ngali nuluwembunye alwavye. 9Naninye kali pano ntamanyile amasundo, nalinji nemumi; ukuwa ayala amasundo yiza, uluwembu aluti natunka, 10imfwa nukufwa. Nga amasundo yano yanga yalete uwumi, nenji ayandetela imfwa. 11Lwalanga pano uluwembu lwaselela mwisundo, alunchenjezya alusenda isundonye alunkomela nalyo,

12Achaleka iviwindo vikali avitele, nisundo nalyo alyimichile, lyalungamana, swinya alizima. 13Wuzye fwandi ichizimanye chocho achino chandetelela imfwa? Nanti katichi-tichi! Uluwembu aluno lwaleta imfwa; muno lwaselezile mwechino achizima, uluwembu alundetelela imfwa alyakuti imiwele yenecho iyaluwembu imanyikwe. Achaleka fwandi muno amasundonye, uluwembu lwamanyikwa apatiswe, kuno lwawipisya lwalutilizya.

Isumo lyamumwezo

14Twamanya kuno amasundo ayakwe Leza; ukuwa nenji nemuntu wino akafwa, nakazizwe imba nemuzya waluwembu. 15Vino nkachita nsimanya namuno nkavichitila; amuno ivintu vizima vino nkalonda ukuvichita, nsivichita, ukuwa nkachita ivintu viwipe vino napata ukuvichita. 16Nkula nachita chino chisi cholicho, ntela nkuzumilizya kuno fwandi amasundo amazima. 17Achaleka fwandi ntela nsanene nkuchita ichamwatanye wowo; ukuwa alutela aluwembu luno luli mwakwe nene aluno lukuchita chocho. 18Namanya kuno mwakwe nene musi uwuzima mumiwele yawuntu wane, amuno chingatenga nkalonda ukuchita ichete, nkapotwa ukuchita. 19Nkapotwa ukuchita ichete; ukuwa nkachita uluwembu luno nsilonda ukuluchita. 20Achaleka ndi nachita chino nsinakulonda ukuchita, intela insi nene nkuchita chochonye; ukuwa, alutela aluwembu luno luli mwakwe nene, aluno lukuchita.

21Achaleka fwandi chili awoo: nkula nati mbombe chino chiyine, nsola ichiwipe. 22Umwezo wane wakunda amasundo yakwe Leza. 23Ukuwa nzana kuno chayiwela kwakwe nene ndakonka amasundo yano yakakanuzya amasundo yano nasuwila mumwezo wane. Ayaleka imba nemuzya wamasundo yano yali mwakwe nene yano yakandetelela uluwembu. 24Ye, nasyama wuli! Ngaweni angantula amfusye kuchimuwilinye choo chino chikantwala kumfwa? 25We Leza-nye awino nkasalifya, mu Mfumu yane e Yesu Klistu!

Avino chili awonye-woo, nimyata yane: nene nenga mumwezo wane nkakonka amasundo yakwe Leza, ukuwa kuvyamuwili kweni nkatontela amasundo yano yakandetelela uluwembu.

Currently Selected:

Romans 7: WWN82

Highlight

Copy