Romans 6

Tuli nuwumi muno we Klistu

1Ngafwandi, twati wuli? Wuzye tulange twisile muluwembu alyakuti inkumbu zyakwe Leza zivule? 2Awe! Tuli ndivino awafwe—twalufuma muluwembu ngamuno chani chino tungalanga twisile mwenemo? 3Nachawuzimanye mwamanya choo: pano twabatizizwe ukuti tuwe apaliponga nu Klistu Yesu, twabatizizwe ukuti tuwe mumfwa yakwe. 4Fwandi mwibatizo litunye, amuli muno twazisilwe apaliponga nu Klistu atusanjila imfwa yakwe, alyakuti, ndivino Klistu-nye wazyulupuzilwe kumfwa nuwukankala wamaka ya Mukwasi, momonye amuno naswenye tuliwela nuwumi wupya.

5Amuno nditwayisanzya nawe twafwa ndivino wafwile, momonye avino tuliwa apaliponga nawe pakuzyulupulwa ndivino weliwe wazyululuzilwe. 6Twamanya choo: kuno uwuntu witu uwukali wafwa apaliponga nu Klistu pawuchingane wakwe, alyakuti amaka yaluwembu lwitu yononwe, alyakuti tutize tulandalile muwuzya waluwembu. 7Amuno akula ndi umuntu wafwa atela walufuma kumaka yaluwembu. 8Achaleka ndi twafwa apaliponga nu Klistu, twasuwila ukuti tuliwakwikala apaliponga nawe. 9Amuno twamanya kuno Klistu wazyulupuzilwe kumfwa atalitela afwe swinya—imfwa isi namaka yakumuchita chimwi swinya, 10Nalo uluwembu lusi namaka yakumuvinda amuno wafwile walala walufuma; nuwumi wuno alinawo kanonzi awumi wakwe Leza. 11Avino namwenye awuliwonga mwazipila ukuyelenganizizya kuno mwafwa akuli kuti mwalufuma muluwembu ukuwa mwewumi paminso yakwe Leza muno mwasanzinkana apaliponga nu Klistu.

12Uluwembu lutanga lulange lwavinda imiwili yinu yino ikafwa, swinya mutize muwakonchelela ukulonda kuwipe ukwamumwili. 13Swinya kusikwezya muwalechelezya imiwili yinu kuluwembu, itize iwe amiwili yakuchitila uluwembu. Ukuwa, yipani kwe Leza, muwe mwewantu wano wapusuka kumfwa muwe nuwumi, mupani imiwili yinu yonsi muleke iwe ayakuwombela ivizima. 14Kusikwezya ukuti uluwembu luwawavinda: musipanzwa namasundo yasi nachimwi kwakwe mwemwe, nkandi inkumbu zyakwe Leza.

Tuwawombesya ivyawulungamane

15Ngafwandi, twati wuli? Wuzye tuwawembuka, muno tusipanzwa namasundo nkandi inkumbi zyakwe Leza? Awe, wowo pole! 16Awenche mwamanya kuno pano mwayipile mwewenecho kuwuzya wakuwembula umuntu wumwi, fwandi ye mwewazya wakwe sokulunye weyo wino mukamutontela—pamwi mukatontela uluwembu, luno lukaleta imfwa, pamwi we Leza wino akawalungamika kwakwe weliwe. 17Ukuwa nkusalifya Leza! Amuno kali mwalinji mwewazya waluwembu; ukuwa pansizi mwatontela nimyezo yinu yonsi ukusimichila kuno mwazana mwisambililo lino mwapochelela. 18Mwakululwa kuluwembu mwawa mwewazya wakwe Leza alyakuti muwe mwewalungamane. 19Nkuvwanga ndimuno awantu wakavwanjila amuno musi namaka yakwivwichisya ichete. Pakutalika mwayipile lyankaninye amuwa mwewazya wavinyali nukulonda kuwipe, amuwachita uwuwipe. Ndivino mwayipile kwevyonyevyoo avino kanonzi yipani lyankani muwe mwewazya wakuchita uwulungamane, muwe mwewakwe Leza.

20Pano mwalinji mwewazya waluwembu, mutapechezile uwulungamane. 21Nga mwawotosile chani pano mwachitanga ivintu vino kanonzi mukalola insoni? Ichilambu chakwe vyovyo amfwa! 22Ukuwa kanonzi mwakululwa kuluwembu mwawa mwewazya wakwe Leza; mwalala mwawa mwewakwe, mwapochelela uwumi wamuyayaya. 23Amuno ichilambu chaluwembu—amfwa; ukuwa uwila wakwe Leza awumi wamuyayaya wuno tuli nawo mwakwe Klistu Yesu Imfumu yitu.

Currently Selected:

Romans 6: WWN82

Highlight

Copy