Romans 5

Leza watulungamika

1Aleni vino fwandi kanonzi muno alisuwilo Leza watulungamika, tuli umutende nu Leza muno Amfumu yitu e Yesu Klistu. 2Muno alisuwilo, e Yesu nalwakwe, watutwala kwe Leza uwankumbu mvule, nakanonzinye tukakwikala munkumbu zyakwe. Muno achochonye tukazevya mbali nukupanichisya kuno naswenye Leza alitupa uwukankala wakwe! 3Swinya tukazewela pano tuli muntazi, 4amuno twamanya kuno ukuponela muntazi apano tukasambilila ukusimpisya, nazyo insimpo azino zikasechelesya Leza, ngamuno achochonye atuwalolela nanti kuvwilika. 5Ukulolela konye-koo kusitusonzya insoni amuno Leza wizuzya ulukundo lwakwe mumyazo yitu nu Muzimu Mwimichile, achili chawila chino watupa.

6Amuno twachilinji tutombozyosile, Klistu wizile afwila awawembu, pampindi yino Leza umwenecho wasozile. 7Kweni achintu chitale kumuntu wumwi ukufwila umulungamane. Ukuwa pamwi nche umuntu angalonda ukufwila umuntu muzima. 8Lelo kweni Leza weni watulanjizya ulukundo lwakwe kuno watukundisya; amuno pano twachilinji swewawembu Klistu wizile atufwila! 9Muno amfwa yakwe watulungamika kwe Leza, achaleka fwandi, nga chingamutalila wuli ukwiza tupususya kuwukali wakwe Leza. 10Kali twalinji swewalwani wakwe Leza, ukuwa muno amfwa ya Mwanakwe watukukutizya twawa sweviwuza vyakwe. Ye, fwandi vino sweviwuza vyakwe awoo, chilituzipila wuli pano twiza twatulwa nu Klistu umumi! 11Lelo chisi achocho chitupu, ukuwa we Leza awino akaleka tukuzewela muno Amfumu yitu e Yesu Klistu, wino waleka twawa sweviwuza vyakwe Leza.

E Adamu nu Klistu

12Umuntu wenganye-nsu awino walesile uluwembu alwiza munsi, aluleta nimfwa. Muno achochonye imfwa yinjilila awalawa wamyiko yawantu wonsi, amuno wonsinye wawembuka. 13Uluwembu lwalinji munsi ye namasundo yatani yachitwe; ukuwa kuno kusi amasundo uluwembu lusikozwa. 14Ukuwa ukufumilila pakwe Adamu ukwizafika pakwe Musa imfwa yavinzile awantu, nanti awalyanye wano watawembusile ndivino Adamu wino wasuwizile isundo lyakwe Leza.

Adamu wakolinwe kwakwe wino watanji aliyiza, lelo kweni wasyania kwakwe vimwi. 15Weyonye wino watanji aliyiza atakolana nkani nu Adamu, amuno uwila wuno Leza wafimile wutakolana nuluwembu lwakwe Adamu. Chingatenga kweni awantu wavule wafwile muno aluwembu lwamuntu wenga. Ukuwa inkumbu zyakwe Leza zyavulisya, ndivino uwila wakwe wuno wachitila awantu wavule wavulisya muno ankumbu zyamuntu wenga e Yesu Klistu. 16Achaleka imilimo yankumbu iyakwe Leza vitakolana nimilimo yakwe Adamu iyaluwembu. Muno akuwifya kwamuntu wenga wino wawembusile, asundwa; ukuwa alula uluwembu lwanyama kuwavule akwiza ichawila chankumbu zyakwe Leza, ichakuntasundwa! 17Nachawuzimanye muno akuwifya kwamuntu wenga imfwa yavinzile awantu, muno amuntunye weyo wenga. Ukuwa chakula chalusya wuli chino umuntu wenga wachisile, e Yesu Klistu! Wonsi wano Leza wawafwila inkumbu mvule intapendwa wapochelela nuwila wakwe uwulungamane wize walandalile ninsimpo mwakwe Klistu.

18Achaleka fwandi, vino awantu wonsi wasundilwa kuluwembu lwamuntu wenga, avino nimilimo yamulungamane wenga yakulula awantu wonsi wawa nuwumi. 19Amuno ndivi no awantu wonsi waponela muluwembu muno akuchila isundo kwamuntu wenga, wowonye avino awantu wavule walilungamikwa kwakwe Leza, amuno umuntu wenga watontezile Leza.

20Amasundo yizile kukwizavuzya imilandu, ukuwa alula uluwembu lwanyama, inkumbu zyakwe Leza zyeni azilutilizya. 21Achaleka fwandi vino uluwembu lwavinzile awantu lwawaletelela imfwa avino ninkumbu zyakwe Leza zikasunga awantu azitukolelela kuwumi wamuyayaya mwakwe Yesu Klistu Imfumu yitu.

Currently Selected:

Romans 5: WWN82

Highlight

Copy