Romans 12

Ukuwombela Leza

1Achaleka fwandi, wanawitu, muno ankumbu mvule kwakwe sweswe zino Leza watuchitila, nkuwalambilizya nkuti: Yifimani imiwili yinu iwe anzuwi njimichile kwakwe Leza, akuli kuti pano muchili mwewumi muwamuwombela mbali nukumusechelesya. Konye-koo akuli kumupepa kwakusimichila kuno mungamufimila. 2Mutize muwakolania imiwele yakunzi iyamunsi moo, ukuwa ndi Leza awapilule mukasi muwe nimyezo mipya. Apano mulimanya ukulonda kwakwe Leza—ukuzima, kuno kukamusechelesya chisi chakutaka.

3Ukuwa muno achawila chino Leza wampa, nkuwanena mwemwe mwensi nkuti, Mutize muwayitumvya nkaninkani ukulusye pano mwawela. Ukuwa, muwakwelengania ichete-chete mbali nukuyichefya, swinya wilamuntu awayipanzya ukulingana nisuwilo lino Leza wamupa. 4Tuli nivyawi vivule kumuwili wonga, nivyawi vyonsi vili nimilimo milekane-lekane, 5Achaleka naswenye, nanti twavula awoo, swemuwili wonga mwakwe Klistu, swinya swensinye twalemenkana apaliponga ngati avyawi vilekane-lekane ivyamuwili wonga. 6Achaleka twazipila ukuwombela ivyawi vilekane-lekane ukulingana ninkumbu zyakwe Leza zino watupa, Ndiachawila, chitu ichakuwizya Izwi lyakwe Leza, twazipila atuwawizya ndimuno twasuwilila. 7Ndi ichawila chitu akupyunga twazipila tuwapyunga. Ndi akusambilizya. 8Ndi akusimpisya wanji, twazipila tuwachita wowonye. Wensi wino akwankania kuwawuye chino alinacho, wazipila ukwankania numwezo wusankane; nawe wino akapanzya, wazipila awawombesya; nawino ali ninkumbu, wazipila awa amusankane.

9Mwazipila ukuwa nulukundo lwakusimichila. Muwapata chino achiwipe, amulanga mulemasizye pechino achizima. 10Kundananji nulukundo lwenecho ulwawunyina mwakwe Klistu, swinya muwachindikana. 11Wombesyanji mutize muwawa mwewakata. Wombelanji Imfumu nu mwezo wonsi. 12Lekani isuwilo linu liwawapa ukusansamuka, muwazizimichizya muntazi zinu, muwapepa nanti kulechelezya. 13Muwapa awanyonko wano wasowelwa vimwi vino muli navyo, muwapochelela aweni mung'anda zinu.

14Pepelanji wano wakuwayimvya; nachawuzimanye, muwalambilizya Leza ukuti awapepa wane wakawayimvya, nanti kuwatipa. 15Zevyanji nawano wakuzevya, losyanji nawano wakulosya. 16Muwakunda wonsi nanti kusolowola. Mutize muwayitumvwa, wombanji imilimo yakuyichefya. Mutize muwayelengania kuno muli namano.

17Ndi wumwi wawachita chimwi, mutize muwalandula. Lekani awantu wonsi walola kuno mukuchita ichete. 18Muwalemasya ukwikala umutende nawantu wonsi. 19Mutize muwalandula, wanawitu, ukuwa muwawalechela uwukali wakwe Leza ukulandula konsi. Amuno avino Amawaliko Matele yavwanga yati, Ukulandula akwane, nenenye ndilandula, avino Imfumu yataka. 20Awowonye Amazwi Matele yati, Ndi umulwani wako ali ninzala, umulela; ndi ali nulusala, umupa aminzi ang'wa; amuno ndi ukuchita wonyewoo ye wandi umulundichile ukuwilima kwamakala pamutwe wakwe. 21Mutaleka uwuwipe wuwawachimvya; ukuwa, chimvyanji uwuwipe nuwuzima.

Currently Selected:

Romans 12: WWN82

Highlight

Copy