Romans 11
11
Leza afwila awa Israeli inkumbu
1Nyoka mbuzya inti, Wuzye Leza wakankamuzile awantu wakwe? Atatela awakankamule nanti katichi-tichi. Nenenye nalwane ne mu Israeli, uwikwata lyakwe Abrahamu, uwamuchiwanza chakwe Benjemani. 2Leza atatela akankamule awantu wakwe, wano wasozile pakutalika-talika. Mwamanyanye-nto vino Amawaliko Matele yavwanga kuvyakwe Eliya pano wasumbichizile awa Israeli kwakwe Leza ati, 3Mfumu Leza, awa Israeli-nye waa wakoma awatumwa wako swinya wamongolania utuvuwa twako; nasyala anenenye nenga-nsu, naninye wakulonda ukunkoma. 4Nga Leza wamutolelezile chani? Watili, Nayisunjizile nemwenecho awantu imyanda ikumi impindi munenulambali (7,000) wane wasitela wafukamile e Baali kaleza kawufi. 5Nakanonzinye avino chili: kuli watichi wane Leza wasola, kunkumbu zyakwe. 6Ukusola kwakwe akwankumbu zyakwe, kusi akumulimo wumwi wuno wachita. Amuno ndi Leza aka solela kwechino awantu wachita, yefwandi inkumbu zyakwe zisi ankumbu zyakusimichila.
7Ngafwandi twati wuli? Vino awa Israeli watatela wazane chino wavwambanga, Aliwumba tichinye lino Leza wasozile alino lyazanile chino wavwambanga; wanji wonsi wafundisile amakutwi yawo nanti kwivwa ulwito lwakwe Leza. 8Ndivino Amawaliko Matele yavwanga yati,
Leza wawapile imyezo mitumpe namano yavye; nilelonye lyoo watanga walole naminso yawo nanti akwivwa namakutwi yawo. 9Nawe Davidi wavwanga wati,
Sivyo awalemwa muvipingo pane wakulya ichakulya chakuyitopwa;
sivyo awapona, sivyo awasunda.
10Sivyo paminso yawo apafitikwawapotwa ukulola;
swinya uwatotowalike insizi zyawo awinamila pansi amanda nuwinji, awalola intazi zyawo.
11Swinya nkuwuzya nkuti, Wuzye pano awa Yuda wapunuzile waponile lyankani? Nanti katichi-tichi! Ukuwa amuno wawembusile, ikomolwa liza kumakandi, alyakuti awa Yuda wawakwine. 12Uluwembu lwa wa Yuda lwawosya insi nuwukulu, nako ukupotwa kwisuwilo kwawosya amakandi. Ye, fwandi kulikula wuli ukupepwa, pano awa Yuda wonsi wiza wasanzinkana nawo apaliponga.
Ukutulwa kwamakandi
13Kanonzi nkunena mwemwenye mwemakandi: muno nemupositile kumakandi nandi ndayitumvya kumulimo wane. 14Nche pamwi ingaleka awantu wamwiko wane wawe ninkwini, alyakuti mpususye wamwi. 15Ndi wawakankamuzilwe, Leza wakukutizizye awantu wanji; ngafwandi, yechiliwa wuli ndiwiza wapochelelwa? Chiliwa ndivino ukuzyulupuka kumfwa!
16Ndi Leza wapwa akapandwi kakutalika akakwe buledi, yefwandi nubuledi wensinye umupuma awakwe: swinya ndi Leza wapwa imisisi yamuti, yeninsambanye azyakwe. 17Insamba zimwi izyamungungu wulembeke zyakonyoka, nulusamba lwamungungu walonde lwakambatikwa kweneko. Avino namwenye mwemakandi muli ngati amungungu walonde, kanonzi mwatikana apaliponga nawa Yuda, mukalelwa numuvundo uwuliwonga. 18Achaleka aleni fwandi, kusikwezya ukusoweka wane wakonyosile ndivino insamba. Nga mungayitumvizya chani? Vino mwensamba zyavye; musikwavwilizya imisisi—ukuwa imisisi ayino yaleka mulipo.
19Ukuwa mungati, Molimonye, lelo ngavino insamba zyakonyosile azinsila amasyo ukwakuti nkambatikwe. 20Choo achakusimichila. Zyakonyosile amuno zitalinji nisuwilo, pano mwenji muli mumasyo yinu muno alisuwilo. Ukuwa mutize muwawa namelengania yakuyitumvya muno achochonye, awe, tinanji. 21Vino Leza atalechelezizye awa Yuda, wane walinji ngati ansamba nkali; wuzye mukwelengania mukuti mwenji Leza aliwalechelezya? 22Pakwe chonye-choo apano twalolela inkumbu zyakwe Leza nuwukali wakwe. Leza amukali kwewano wapona, ukuwa ali ninkumbu kwemwemwe-ndinamwe mwalanga muli munkumbu zyakwe; ukuwa ndimwakana, namwenye mulikonyolwa. 23Na wa Yuda-nye, ndiwalechelezya ukuntasuwila kwawo, walinyoswa mumasyo yano walinji mwenemo, amuno Leza ali namaka yakuwanyosya mwenemo swinya, 24Mwemakandi, ala muli ngati amungungu walonde wuno wakonyoka, ukuwa mumwata wunji, awuya awukambatikwa kumungungu wuno walembesilwe muchalo. Awa Yuda wakolana numungungu wulembeke; achaleka fwandi, chiliwa achipepuke kwakwe Leza ukunyoka akambatike insamba nkonyoke kumasyo yawo kuchisinko.
Inkumbu zyakwe Leza azyawantu wonsi
25Wanawitu, nkasi mumanye ukusimichila kwankama. Alyakuti muleke ukwelengania ukuti muli namano. Inkama ayoo iyakuti: ukuyitutuwalika kwa wa Israeli kuliputuka, ukuyitutuwalika kwawo kulilanga kulandalizile wasuke amakandi yonsi wize wazumile Leza. 26Paponye apano awa Israeli wonsi walifyuka. Ndivino Amawaliko Matele yavwanga yati,
Katula alifuma mwe Zioni,
ayize afumye uwuwipe wonsi wufume mwikwata lyakwe Jekapu.
27Lyoo alili layano lyane lino ndilayana nawo,
pano ndifumya uluwembu lwawo.
28Amuno wakankamuzile Ilandwe Zima, awa Yuda awalwani wakwe Leza muno amwemwe, mwemakandi. Ukuwa muno e Leza awino wawasozile, wawa aviwuza vyakwe muno awayisikulu wakali. 29Amuno Leza weni asi wechiluchilu wino angivwila wane wasola pamwi wapepa. 30Ukuwa mwenji mwemakandi, kali mwakanile ukutontela Leza; ukuwa kanonzi Leza wawafwila inkumbu amuno nawo awa Yuda wakanile ukumutontela. 31Avino chili, amuno Leza wawafwila inkumbu, awa Yuda wakana ukutontela kanonzi, alyakuti na wa Yuda-nye nawo kanonzi Leza awafwila inkumbu. 32Amuno Leza waleka ukuti awantu wonsi wize wanyepwe kukuntatontela kwawo, alyakuti awafwile wonsi inkumbu.
Ukutumvya Leza
33Ye, uwukankala wakwe Leza wakula wuli! Nako ukuvula kwamano yakwe akwakuzungusya! Ngaweni angalondolola vino Leza wachita? Ngaweni angiluka inzila zyakwe? 34Ndivino Amawaliko Matele yavwanga yati,
Ngaweni wamanya amelengania ya Mfumu?
Ngaweni wino angamupa ilango?
35Ngaweni wino akatela amupa chimwi,
ichakuti angamulambulila kwechimwi?
36Amuno weliwenye awino welewula ivintu vyonsi, navyonsinye vili nuwumi mwakwe weliwe, vyeni avyakwe. Ndi Leza awachindikwa penye! Amen.
Currently Selected:
Romans 11: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
