Romans 13

Muwatontela wakateka wansi

1Lekani wilamuntu awatontela wakateka wansi, amuno pasi uwufumu wuno wukalandalila ndi Leza atazumilizizye, uwufumu wonsi wuno walandalila awutela wimikwa nu Leza. 2Wensi wino akakanuzya amaka yamfumu atela akukanuzya chino Leza wimika; nawensinye weyo atela akuyiletelela ipanzyo. 3Amuno wakapanzya wasitetemya wano wakachita ichete ukuwa nkandi wano wakawifya. Wuzye nkulonda ukuti utize uwasaya amaka yakwe kateka wamunsi? Chitanga chiwe achizima, uleke awakuwanzya. 4Amuno amuwomvi wakwe Leza wino akakuwombela ivizima. Ukuwa ndi ukuchita uwuwi, ungatina, amuno ali namaka yakukusundila. Amuwomvi wakwe Leza wino akachita uwukali wakwe kukusunda awawipe. 5Achaleka muno achonye-choo mwazipila ukutontela wakateka wansi—lelo asi amuno awukali wakwe Leza wutupu, ukuwa nawemwenechonye wayimanyila.

6Muno achonye-choo achino mukatula imitulo, amuno wakateka wakawombela Leza ndiwakufisya imilimo yawo. 7Achaleka, tulanji imitulo yonsi; muwawatula imitulo yinu nga nimisonko, mbali nukuwachindika.

Ukwavwana

8Mutize muwawa nimpa kwewumwi—suka ampa yakukundana. Wensi wino wakunda umuwuye atela akutontela amasundo. 9Amasundo yakuti, Utize uwazeleluka; utize uwakoma: utakwiwa; utakumbuchila—yonsinye yaa, swinya ndikuli isundo linji, yonsinye yasanzwa apaliponga mwisumdo lyonga, ilyakuti, Uwakunda umuwuyo

idivino wayikunda. 10Amuno wensi vino wakunda umuwuye atanga amu.hite ichiwipe chimwi. Ulukundo, akuli kuntontela kwamasundo yonsi.

11Mule muwachita wonye-woo, amuno mwamanya impindi: impindi yafichila iyakuti muziwuchile mutulo twinu. Amuno kanonzi impindi yakutulilwa yapamilala ukulusye impindi yino twasuwizile. 12Kwaswepuluka, yawa amachacha. Achaleka tuleke ukuwomba imilimo yamfinzi, tuzwale ivyanzo vyakulwila umusanya. 13Tuwapita ichetechete, ndivino wane wakapita mumusanya; akasanga nukukolwa pole, inyengwa nuwuzelele pole, ulombwa nant' awuzuwa pole. 14Ukuwa sendani ivyanzo vya Mfumu e Yesu Klistu, muwapupuzya kumiwele yakulonda kuwipe ukwamiwili yinu, ukuti nche mungayitevya.

Currently Selected:

Romans 13: WWN82

Highlight

Copy