Revelation 19
19
1Pansizi pakwe choo njivwa chi nochapunzile ngati alizwi Iyiwumba kulu ilyawantu mwiyulu, wakuti, Tumvyanji Leza! Ikomolwa, nuwukankala, namaka, avyakwe Leza witu! 2Amapanzyo yakwe ayakusimichila sw inya amayane! Wasinila echilalwe-lalwe mukulu wino wononanga insi nuwuzelele wakwe. Leza wamusunda muno wakomile awawomvi wakwe. 3Awanyoka awapunda swinya awati, Tumvyanji Leza! Ichusi chino chasukanga chikufuma pakayanye kako pano kapyanga achisuchila mupela wekaya wayile, umuyayaya-we! 4Wasongo wawo amakumi yawili nawani nivitumbwa vipuma vyovyo vini avifukama pansi avilumbula Leza wino wapungime pandulu, aviti, Amen! Tumvyaji Leza!
Ichakulya chakutevya ichawinga wa Mwana-ng'onzi
5Ngapano akwiza ukupunda kumwi ukwizwi ukufuma pandulu, akuti, Tumvyani Leza witu, mwewawomvi wakwe, namwewantu mwensi, wasongo nawatichi, mwewantu mukamutina. 6Ngapano njivwa chino chapunzile ngati alizwi lyiwumba kulu, swinya ngati akupoma kwachipoma chikalambane, ngati akuwuluma kukalambane ukwantalala. Injivwa vyati, Tumvyanji Leza! Amuno Umulali e Leza witu uwamaka yonsi Amfumu! 7Ndi tuwazewela swinya tusankane; saleni tuwatumvya uwukulu wakwe! Amuno impindi yiza iyawinga wa Mwana-ng'onzi, nu nawinganye nawe ayiyinie kuwinga. 8Enawinga wapwa ivizwalo viswepe vino vikulangalila ivitelepe ukuti azwalile. (ivitelepe amilimo milungamane iyawantu wakwe Leza.)
9Ngapano umungeli anena ati, Walika choo uti, Awalongo awano witwa kuchakulya chawinga wa Mwana-ng'onzi! Nga umungeli ayonjelezya ati, Amazwi yaa ayakwe Leza ayakusimichila.
10Imfukama pansi pamanama yakwe inti, mulumbule, ukuwa anena ati, Utize uwandumbula! Nemuwomvi muwuyo, mbali muwomvi wawanyonko, wonsi wano walemasya ukusimichila kuno Yesu wawumbuzile. Lumbulanga Leza!
Amuno ukusimichila kuno Yesu wawumbuzile akuno kukapanichisya awatumwa.
Ekakwelela wakwe kavwalo mutiswe
11Ngapano ndola iyulu Iyiyuka, palinji nukavwalo mutiswe, wino wakwelezile penepo witwanga ilyakwe, Musuwilwa nilyakwe Kusimichila, awino akapanzya mbali nukulwa isumo nanti kuchichilizya. 12Aminso yakwe yalinji ngati ambiwi yamulilo, wazwite nutwamba utuvule pamutwe wakwe, Izina lyawalisilwe pakwe weliwe ukuwa pasi wumwi wino wamanyile muno chiwezile suka umwenechonye wenga. 13Umwinjilo wakwe wakandamisile nuwazi. Izina fino akakwitwa alyakuti, Welizwi lyakwe Leza. 14Imisika yamwiyulu yamukonsile pakwe wakavwalo watiswe, swinya wazwite nivizwalo vitiswe, iviswepe ivitelepe. 15Ulupanga lukole alufuma mumulomo wakwe, luno alichimvizya imyiko yawantu. Awateke nunchinda wachela, swinya ayize afine ivyakung'wa pachifinilo chawukaliwakufulichilwa kwakwe Leza wamaka yonsi. 16Pamwinjilo wakwe napachinama chakwe pawalisilwe izina lyakuti, Mfumu yazyamfumu, Mulali wawalali.
17Ngapano ndola umungeli ayimilile mwilanzi. Apunda nizwi kalambane kuvinyunyi vyonsi vino vikapapuka mupela mwilewelewe, ati, Zanji, mwize muwungane apaliponga kuchakulya chikulu ichakutevya ichakwe Leza! 18Zanji mwize mulye imiwili yazyamfumu, niyakwe wamusika, niyavita, nimiwili yakwe wakavwalo niyakwe wano wakakwelela pakwe wakavwalonye, imiwili yawantu wonsi awazya nawanangwa, wasongo nawanawatichi!
19Ngapano ndola ichinyamana nizyamfumu zyamunsi nimisika yawo wawungine ukuti walwisye wino akwelezile pekwavwalo walwisye numusika wakwe. 20Ichinyamananye chocho achilemwa apaliponga numutumwa wawufi, wino wetetusile ivyakuzunguka paminso yakwe cholicho. (Ivyakuzungukanye vyovyo avino wachenjezezizye wano walinji nichimanyilo chachinyamananye chocho, nawano walumbulanga ikolano lyachinyamananye chocho.) Ichinyamananye chocho numutumwa wawufi avisumbilwa avipuma mwesumbi wamulilo wino akupyanga nivintu vimwi ivinunke. 21Imisika yawo yakomilwe nulupanga luno lukafuma mumulomo wakwe wino akakwelela pekavwalo; nga inyunyi zyonsi aziwasompa azikuta.
Currently Selected:
Revelation 19: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
