Revelation 18
18
Ukupona kwakwe Babeloni
1Pansizi pakwe vyoo indola umungeli winji akwiza akufuma mwiyulu; wapilwe amaka makulu, nukuzikimila kwakwe kwawalizile insi nuwukulu. 2Apunda nizwi kalambane ati, Wapona! E Babeloni wapona! Akusunsuntilwa nimizimu miwipe nimikombele; inyunyi zyamisango yonsi imbipe zyozyo impatikwe zyikala mwakwe weliwe. 3Amuno wapa awantu wonsi ivyakung'wa vyakwe wang'wa ipala lule lyawuzelele wakwe. Imfumu zyamunsi zyazelelukanga nawe, nawalonsi wamunsi wawotochela kunyengwa yakwe.
4Ngapano njivwa izwi linji lyafumamwiyulu lyati,
Fumilani kunzi, mwe wantu wane! Fumani kweweliwe!
Mutize muyisanzye kuluwembu lwakwe;
mutize musanjile ukusundwa kwakwe!
5Amuno uluwembu lwakwe lwalundinkana lwafika namwiyulu,
nu Leza akakwizuka imiwele yakwe imiwipe.
6Muchitanji ndivino wawachisile;
mumuchitile mulusye kawili konsi ukulusye vino wawachisile mwemwe.
Yizuzyani ipala lule mulupindi lwakwe kawili konsi ukulusye lino wawapile mwemwe.
7Lekani awayimba swinya awe namalanda
vilingane ndimuno wayitutuwalichilanga mbali nukuyitopwa.
Amuno akayinena akuti,
Ne-waa, njisile paa, nemfumu-kazi!
Insi nemwanachi mufwilwe wakwane,
ntalitela ndole amalanda!
8Muno achonye-choo, impungo zyakwezilimuponela uwanda wonganye zyonsi,
izyandwala, amalanda, nichipowe.
Ayize ayochwe numulilo,
amuno Imfumu e Leza, wino akamupanzya, awamaka yonsi.
9Imfumu zyamunsi zino zyazelelukanga nawe ninyengwa nkulu ziliwalila ziwalosya akayanye kako pano zyalola ichusi chasuka pano kakupya. 10Awimilila ukutali muno wakutina ukuyimba kwakayanye kako, awati, Kalandawe! Chawipa wuli-mwe! Akaya kakulunye kaa akamaka e Babeloni! Wekaya kakulu awoo wasundwa mukapindi katichinye!
11Awalonsi wamunsi nawonye awakalilila awakalosya, amuno pasi wumwi wino akakala insawo yawo swinya; 12nawumwi uwakuti akale golide wawo, nusilivara wawo, namawe malangalile ayawuzi wukulu: insawo yawo iya myenda mitelepe, nimiwenzuluke, niyakwe silika, nimmyenda miwenzu inkalala, nimisango yamiti yonsi imipanze iyawuzi wukulu, nimisango yavintu vino vikachitwa kumino yanzovu nimiti yawuzi wukulu, numukuwa, nivyela, namawe malangalile; 13nichilolo, nintwilo, nuwusule, navinji ivinunchile, nuwubani, nivyakung'wa, namafuta, nuwusu ningano, ing'ombe, ningonzi, wakavwalo, namagereta, awazya nuwulanzi wawalawa. 14Awalonsi awanena akayanye kako awati, ivintu vyonsi vizima vino waluchilanga ukuti uwe navyo vyasowa napano vyalyata, ninsawo yako yonsi nivyaminso lawa yako vyinjila pansi, utalitela uvilole swinya! 15Awalonsi wano wawotochelanga mukayanye kako, waliyimilila akatalamuchila muno wakutina ukuyimba kwakayanye kako, Waliwalila walosya 16wawati, Yekalanda-we, chawipa wuli kukaya kakulu! Kazwalanga ivizwalo vitelepe niviwenzuluke navino vili-che, swinya kayembanga nugolide, namawe malangalile ayawuzi wukulu! 17Mukapindi katichinye amuno insawonye yoyo yasowa napano yalyata!
Aweni mawato wonsi nawantu wano wasendwanga, nawano wasikanga amawato nawantu wonsi wanji wano wazanilanga umuzano wawo mwesumbi awimilila akatalamuchila, 18awapunda pano walola ichusi chakupya kwakayanye kako, awati, Kusitela kuwe akaya kanji kano kali ngati akayanye kaa akakulu! 19Awayikunchila itukumbu kumitwe yawo, awalila wakulosya nukulosya, wakuti, Yekalanda-we! Ye chawipa wuli kukaya kakulu! Akaya kano wonsi wano wakapita mwesumbi wawotochelanga munsawo zyakwe koliko! Akapindi katichinye ivintu vyonsinye vyasowa napano vyalyata!
20Sankana weliyulu muno ukulowa kwakwe kolipo; sankanani mwewantu wakwe Leza, namwe wapositile namwe watumwa amuno Leza wakapanzizya kwakwe vino kawachitila!
21Ngapano umungeli mukazawane anyamula iwe lino lyalinji ngati wenyina wiwe uwakusila alisumbila mwesumbi, ati, Avino akaya kakulu e Babeloni alisumbwa ichikalazi, katalitela kaloleke swinya. 22Ukulila kwamapango yakwe wakimbila, nawakalizya wakwe wapembe ninkangang'ombe, vitalitela vivwike mwakwe weliwe swinya! Pasi umuwomvi mumulimo wawulonsi wino alitela aloleke mwakwe we we swinya; nukulila kwakwe nyina wiwe kutalitela kwivwike swinya! 23Ukuwala kwalukozyo kutalitela kuloleke swinya mwakwe wewe; izwi lyakwe nawinga nilyakwe siwinga yatalitela yivwike swinya mwakwe wewe. Awalonsi wako walinji namaka walusizye insi yonsi, nga swinya wachenjezyanga awantu wonsi awamunsi namanjelengwe yako ayawufi!
24E Babeloni wasunzilwe muno uwazi wawatumwa nuwawantu wakwe Leza wazanilwe mukayanye kako; molimonye uwazi wakwe wonsi wano wakomwa munsi.
Currently Selected:
Revelation 18: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
