Revelation 20
20
Imyaka imyanda ikumi (1,000)
1Ngapano ndola umungeli akwika pansi akufuma mwiyulu, mwikasa lyakwe alemile ichakwiyulila izyolonjela, nga swinya alemile numunyololo wung'wame. 2Avumbatila ichizokanye chocho ichitali chino we Diabulosi pamwi Satana amunyepa kumyaka imyanda ikumi (1,000). 3Dmungeli amusumbila mwizyolonjela, afundika napenepo amatilila nichimanyilo, alyakuti atiza alandile ukukopeka imyiko yawantu swinya isuke imyaka imyanda ikumi (1,000) iyize isile. Ngapansizi apano ayize asapulwe kukapindi katichi.
4Ngapano ndola izyandulu, nawano wisile penepo; wapilwe amaka yakupanzizya. Nga nyoka ndola imizumu yakwe wano wapanzizwe kukukomwa muno wawizyanga ukusimichila kuno Yesu wawumbuzile mbali nukuwizya izwi lyakwe Leza. Watalumbulanga ichinyamananye chocho nanti alikolano lyakwe cholicho, nanti akupochelela ichimanyilo chachinyamananye chocho pampumi zyawo nant'apamakasa yawo watapochelezile. Awazyulupuka awateka ndivino izyamfumu zikateka apaliponga nu Klistu kumyaka imyanda ikumi (1,000) isila. 5(Awafwe wano wasyazile, watazyulupusile isuka imyaka imyanda ikumi isila.) Koo akuli kuzyulupulwa kwatukalika ikwawafwe. 6Imfwa yachitiwili isi namaka kwewoliwo; waliwa awasimapepo wakwe Leza nu Klistu, wizewateka apaliponga nawe imyaka imyanda ikumi (1,000).
Ukuchimba kwakwe Satana
7Pano imyaka imyanda ikumi (1,000) yiza yasila Satana ayize asapulwe afume muvingololo. 8ngapano ndiwiza wafuma awachenjezya imyiko yawantu wano wasatilamunsi yonsi, akuli kuti, e Gogi nu Magogi, Satana ayize awuwanganike wonsi apaliponga kukulwa isumo, awavule ndivino uluselesenga lwamumbali yakwe sumbi. 9Nga wasatile munsi waliwilizye inkambi yawantu wakwe Leza nakaya kano wakunda. Ukuwa umulilo awika pansi awufuma mwiyulu awuwalovya. 10Ngapano Satana wino wawakopekanga wasumbizilwe mwesumbi wamulilo waviwenzuluchile ivinunke, muno kali mwasumbizilwe ichinyamananye chocho numutumwa wawufi; wize wayimba umusanya nuwusiku, umuyayaya-we!
Ipanzyo lyakupelelechezya
11Ngapano ndola indulu nkulu intiswe, ndola nawino wisile penepo. Insi niyulu avisamala kuminso yakwe, nanti kuti viloleke swinya. 12Nga ndola awafwe, wasongo nawatichinye wimilile pankolelo pandulunye yoyo. Wakalata awiyulwa, ngapano kalata winji uwawawumi ayiyulwa. Awafwe awapanzwa ndimulyanye mwakwe vino wachita, ndimulyanye muno vyawalichilwa mwe wakalata. 13Ngapano sumbi ataya awafwe. Imfwa ninsi yawafwe navyonye avitaya awafwe wano vyalemile. Nga wonsi awapanzwa ndimulyanye muno wachitila. 14Ngapano imfwa ninsi yawafwe avisumbilwa mwakwe sumbi wamulilo. (Esumbinye weyo uwamulilo ayili 'mfwa yachitiwili.) 15Wensi wino izina lyakwe litawalisilwe mwekalatanye weyo uwawawumi wasumbizilwe mwesumbi wamulilo.
Currently Selected:
Revelation 20: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
