Revelation 13
13
ivinyamana viwili
1Ngapano ndola ichinyamana chikufuma mwesumbi. Chalinji nimpembe ikumi nimitwe munenulambali, nutwawi kumpembe zyonsi, namazina mawipe yawalisilwe pamitwe yakwe cholicho. 2Ichinyamananye chocho chino naweni chakoline ninkampu, nayo amatamba ngati amatamba yakwe chiwuli, numulomo nawo ngati amulomo wachimbwi. Ichitumbunye chocho achipa ichinyamana amaka yakwe, nindulu yakwe, nuwukankala wakwenye wonsi. 3Umutwe wonga uwachinyamana walinji ngati wakomwa, ukuwa ichilonda chino chaponzilwe achipola. Insi yonsi iwazunguka ikonka ichinyamananye chocho. 4Awantu wonsi awafukamila ichitumbunye chocho amuno chapile amaka yakwe kuchinyamana. Awafukamila nichinyamananye, wakuti, Ngaweweni weyo wino wakolana nichinyamana? Ngaweweni wino angalwa nacho?
5Ichinyamananye chocho chazumilizizwe ukutukana intusi mbipe izyakuzunguka, swinya achizumilizwa ukuwa namaka kumyezi amakumi yani nimyezi yiwili. 6Achitalika achiwatuka Leza, nukutuka izina lyakwenye, nukutuka amasyo yano Leza akakwikala mwenemo, achituchinkania nawonsinye wano wakakwikala mwiyulu. 7Achizumilizwa ukulwisya awatu wakwe Leza ukuti chiwachimvye, swinya achipwa amaka pawantu wamyiko yonsi, wansi zyonsi nindimi zyonsi nawamiwili milekane-lekane. 8Awantu wonsi wano wikala munsi waliwachifukamila, akuli kuti, wonsinye wano amazina yawo yatawalikwa, ukufumilila kuluwandi lwansi, mwekalata wawawumi wa Mwana-ng'onzi wino wakomilwe.
9Achaleka fwandi si aleni teyelezyani, ndimuli namakutwi yakwivwila! 10Wensinye wino wazipila ukulemwa uwuzya, alila ale alemwe uwuzya; wensinye wino wazipila ukukomwa nulupanga, alila ale akomwe nulupanga. Vyoo avyawantu wakwe Leza wano wakazizimichizya mwisuwilo.
11Ngapano ndola ichinyamana chinji chikufuma munsi. Chalinji nimpembe ziwili, zino zyalinji ngati ampembe zyamwanang'onzi, nako ukuvwanga kwakwe cholicho chavwanganga ngati achitumbu. 12Achiwombela amaka makulu ayachinyamana chakutalika pano nachochonye chili penepo. Achipatichizya insi nawonsi wano wikala mwenemo ukuti wafukamila ichinyamana chakutalika, chino itote lyachilonda lyapozile. 13Ichinyamananye choo ichachitiwili achichita ivizunguko vikulu: achileka umulilo awufuma mwiyulu awupona munsi, pano awantu wonsi wali. 14Achinyoka achichenjezya awantu wonsi munsi nivizungusyo vino chazumilizizwe ukuchita pankolelo pachinyamana chakutalika. lchinyamananye chocho achinena awantu wamunsi wonsi ukuti welewule ikolano kukuchindika ichinyamana chino chalasilwe nulupanga, ukuwa nanti kufwa. 15Ichinyamana chachitiwili chazumilizizwe ukuti chifutile uwumi mwikolano lyachinyamana chakutalika, alyakuti ikolanonye lyolyo liwavwanga swinya liwakoma wano wakukana ukulifukamila. 16Ichinyamananye chocho achipatichizya awantu wonsi, awatichi nawasongo, awachindame nawasaluke, awazya nawanangwa, ukuti wawe nichimanyilo chimwi pamakasa yawo ayakwe ndilo napampumi zyawo. 17Umuntu wumwi atanga akale ichintu chimwi nanti akukazya chimwi suka wino ali nichimanyilo, akuli kuti, izina lyachinyamana pamwi impendwa yino ikusula izina lyachinyamananye.
18Choo chikulonda amano. Wensi wino wasalapuka mumano angazana chino impendwa yachinyamana ikusula, amuno impendwa alili zina lyamuntu. Impendwa yakwe amyanda mutanda namakumi mutanda nimfumila mutanda (666).
Currently Selected:
Revelation 13: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
