Revelation 12
12
Umwanachi nichitumbu
1Ngapano ichamayele chikulu achiloleka mwiyulu. Kwalinji umwanachi wino wazwite ilanzi wino swinya walyatanjizile umwezi, nako akamba kakwe kalinji antanda ikumi naziwili. 2Impindi yakwe iyakupapa yatezile yapalamila, uwulumila nukunyongolonkana kwakupapa akuleka akuta iyapamutwe.
3Ichamayele chinji achiloleka mwiyulu. Kwalinji achitumbu chikulu nkani chino chalinji nimitwe munenulambali nimpembe nutwawi kumitwe yonsi munenulambali. 4Nichimusinda chakwe, achikwema ichipya chakwe vitatu ichantanda achizisumbila pansi. Achiya achimilila pankolelo pamwanachinye we yo wino impindi yakupapa kwakwe yatezile yapalamila, alyakuti chilye umwanakwe paponye pano wakwatwa. 5Ngapano umwanachi apapa umwanamonsi, wino aliwa amfumu yamyiko yonsi iyamunsi awapanzya nunchinda wachela. Ukuwa umwananye weyo asompolwa atwalwa kwe Leza nindulu yakwenye. 6Umwanachi asamalila mulumpalang'ang'a; kuno Leza wamuyanizizye amasyo, ayakulelelwa kokonye amanda imyanda ikumi nayiwili namanda amakumi mutanda (1,260).
7Ngapano isumo alikatuka mwiyulu! E Mikaeli apaliponga nawangeli wakwe awalwisya ichitumbu, chino nachonye chalwisizye apaliponga nawangeli wakwe; 8ukuwa ichitumbu achichimba, achiwingwa apaliponga nawangeli wakwenye nanti kuzumilizwa ukwikala mwiyulu swinya. 9lchitumbunye chocho ichikulu achisumbwa kunzi! Ichitumbunye chocho achizoka chikali, chino chikakwitwa Muwipe pamwi Satana, wino wakopeka insi yonsi. Wasumvilwe munsi, apaliponga nawangeli wakwe.
10Ngapano njivwa izwi kalambane mwiyulu likuti, Kanonzi ukutula kwakwe Leza kwiza! Kanonzi Leza walanjizya amaka yakwe! Amuno kanonongola wino wanonongolanga ivyawana witu wino wimililanga pankolelo pakwe Leza alanga akunonongola ivyakunonongola uwusiku numusanya, wasumbilwa munsi ukufuma mwiyulu. 11Awana witu awamuchimvya muno awazi wa Mwana-ng'onzi, swinya muno akuwizya kuno wawizyanga nukusimichila; swinya walondesyanga ukusumba uwumi wawo ukuti ndakufwa wafwange. 12Achaleka saleni fwandi zevyanji, mwe wamwiyulu, namwensinye mwewantu mwikala mwenemo! Lelo akalanda kasikolo kwakwe mwemwe mwensi nusumbi! Amuno mwinjililwa nu Muwipe, wika kwakwe mwemwe, wiza ichikalazi, muno amanyile kuno impindi yakwe yasyala ntichi.
13Achila ichitumbu chamanya kuno chasumbwa pansi, achitalika ukusambula umwanachinye weyo wino wakwasile umwanamonsi. 14Umwanachi wapilwe amapa makulu yawili ayanzwanga alyakuti apapuchile aye kumas yo yakwe mulumpalang'ang'a, ukuti akuno akasungwe kumyaka yitatu nimyezi mutanda, alyakuti apusuke kukusandikwa nichizokanye chocho. 15Ngapano ichizokanye chocho achiwukulila umwanachi iviminzi avifuma mumulomo wakwe ngati aluzi, alyakuti umulamba waminzi wukunkulizye umwanachi. 16Ukuwa insi iyavwa umwanachi, iyasamula umulomo wakwe imilula aminzi yano yafumile muchilomo chachitumbu. 17Ichitumbu achivitilwa umwanachi, achiya mukulwisya awizikulu wakwe wano wasyazile, wonsi wano wakatontela amasundo yakwe Leza swinya nukusuwila ukusimichila kuno Yesu wawumbuzile. 18Nga ichitumbu achiya achimilila sweka pachituntu chakwe sumbi.
Currently Selected:
Revelation 12: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
