Philippians 2
2
Ukuyichefya kwakwe Klistu nuwukulu wakwe
1Wuzye mukasimpa muno we Klistu? Wuzye ulukundo lwakwe lukawasansamusya? Wuzye muli nuwuchiwuza nu Muzimu? Wuzye mukafwilana inkumbu nuluse? 2Nkuwakomelezya, ukuti muwawa namelengania ayaliyonga, mbali nukukundana, numwezo wonga nama no ayaliyonga, apano ingasankana ni chimwemwe chikulu. 3Mutize muwayikunda, nanti akuyitumvya muvyavye; ukuwa muwatontelelana, nanti kuyikuzya ukulusye wanji. 4Muwasechelesya wanji, nanti kuyisechelesya mwewenecho mwenga. 5Muwe nimiwele yino nu Klistu Yesu walinji nayo:
6Weni wakoline nu Leza pe,
lelo atelenganianga nanti akuyitutuwalika ukuti alingane nu Leza.
7Ukuwa weni, wayichefizye,
awa ngati amuwomvi.
Akolana numuntu,
awaloleka ngati amulawa.
8Wayichefizye mbali nukutontela ukwizafika nimfwa yakwe—
yino wafwizile pawuchingane.
9Muno achochonye Leza wamukuzizye awa papela ukulusye vyonsi,
amupa izina lino lyakula lyalusya amazina yonsi.
10Achaleka muno akuchindamikwa kwizina lyakwe Yesu,
ivitumbulwa vyonsi ivyamwiyulu, nivyamunsi, nivyamunsi pansipansi
viwamusokowalila,
11vyonsinye vize viyizumilile kuno Yesu Klistu a Mfumu,
viwachindika e Leza Umukwasi.
Muwakwaka ngati mwenkozyo zyamunsi
12Achaleka, aleni wakundwe wane, ndivilyanye vino mwantontelanga penye pano nalinji namwe, kanonzi chingazipa chilusye ndimukuntontela, napano nsiponye. Wombanji, mbali nintete nukuzakaza, alyakuti ukutulwa kwinu kufike napakafiko, 13amuno Leza akawomba mwakwe mwemwe penye ukuti muwalondesya ukutontela ukulonda kwakwe, muwamukonka.
14Muwachita ivintu vyonsi nanti kukwinuluka swinya nanti mipanzi, 15alyakuti muwe mwewantatala mulandu muwe mwewatele, ndivino awana wakwe Leza wano wasi nindema yimwi wane wakakwikala munsi mbipe iyawantu wawipe. Muwawawalila ndivino intanda zino zikawala mupela, 16muwawawilila Ilandwe lyawumi. Ndi mwachita wowonye, nandi imbe nichilumba chizima mwakwe mwemwe pawanda wakwe Klistu, amuno chililanjizya kuno ntalangananga awowo nanti akuyipulansya apavye.
17Pamwi ingafima uwazi wane ukuti witululilwe panzuwi yinu iyisuwilo yino mukapa kwe Leza. Ndavino chingawa nkuzewela, swinya nkuzevya, apaliponga namwe mwensi. 18Namwenye, zewelanji mbali nukuzevya apaliponga nani.
E Timoti nu Epafrodito
19Nkusuwila mu Mfumu e Yesu kuno nandi mbatumile Timoti nanti kuzimba, alyakuti njize nsankane ndinivwa muno muwezile. 20We Timoti wenganye-nsu wino akakwelengania ndivino nene, weyonye awino akawasayila nukulondesya konsi. 21Amuno wanji wonsi wakapechela ivyawo vitupu, wasipechela ivyakwe Yesu Klistu. 22Ukuwa mwamanya kuno Timoti amuntu wakusimichila, mwamanya kuno weliwe nani, tuli ndivino umwana nuyisi, tukawombela apaliponga Ilandwe zima, 23Weyonye awino nkulolela ukuti mutume kwemwemwe zuwa, ndinalola muno chawela kwakwe nene. 24Swinya nkusuwila mu Mfumu ukuti nenenye nemwenecho nandi njize nanti kuzimba.
25Ukuwa kanonzi nkwelengania ukuti mbatumile umwanawitu Epafrodito, wino wawombesya nkaninye mbali nukulwisya apaliponga nani, swinya antumi yinu yino mwantumizile ukuti ayize anjavwe. 26Akuwaluchila mwensi ukuti ayize awalole, amuno walinji namalanda nkaninye pano mwivwile kuno walwala. 27Nachawuzimanye waIwile, iyakufwa. Ukuwa Leza wamufwizile inkumbu, atamufwizile inkumbu weliwewenga mutupu, ukuwa nkaninye, alyakuti ntize imbe namalanda ndutilizye. 28Achaleka nkasi mutume kwemwemwe nukulondesya konsi, alyakuti mwize mumulole muzewele, apano naninye mpepuchilwe amalanda yane. 29Aleni weyo, mupochelelani nichimwemwe chonsi, ngati amunyonko mu Mfumu. Muwachindika awantu wane wali ngati weliwe, 30amuno watayile uwumi wakwe awalonda nukufwa, muno amulimo wakwe Klistu, alyakuti anjavwe muno mwenji mutalinjipo.
Currently Selected:
Philippians 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
