Philippians 3
3
Uwulungamane wakusimichila
1Wanawitu, ichakupelelechezya, achakuti sivyo Imfumu iwasansamusya. Nsinakutonta pakunyochelela chino nawalisile kali, amuno chochonye achino chingawatula. 2Chenjelani kwewakawomba waviwipe wawo, imbwa zyozyo, awantu wane wakunda ukulembania imiwili. 3Ukuwa swenji, weni pole, aswewantu twalembwa uwusilamosilamo, amuno tukalumbula Leza mu Muzimu wakwe, swinya tukazevya mwakwe Klistu Yesu. Tutapechela vino vitachitwa kunzi kutupu. 4Kweni nanti anenenye, ndinkasi, ingawika insingo kuvyakunzi. Ndi umuntu wumwi akwelengania akuti angawika insingo kuvyakunzi, lelo fwandi nenji ngalusya. 5Nalemvilwe uwusilamo pano namala amanda kananimonsi. Newachiwanza chakwe Israeli, uwamwiko wakwe Benjemani, ne mu Hebere-nye umwenecho. Ukuwa kuvyakusunga amasundo ya wa Yuda, nalinji ne muFalisi, 6kuvyachangwe nayimvyanga Iklezia. Achaleka ndi umuntu angalungamika awatontela amasundo, nenji nalusizye. 7Ukuwa ivintu vyovyo vyonsi vino napendanga nkuti avyakusanduluka; ukuwa kanonzi nazana kuno avyavye amuno we Klistu. 8Vyovyo vitupu pole; lelo muno achintu chocho ichikulu uwuzi, ichakumanya Klistu Yesu Imfumu yane, nalola kuno vyonsi avyavye. Muno we Klistunye nasumba vyonsi; nalola kuno vyonsinye avikona, alyakuti nzane Klistu, 9imbe apaliponga nawe. Naleka ukwelengania ukuti ne mulungamane palwene nenga, amuno akutontela kwamas undo. Kanonzi ne mulungamane muno alisuwilo lino nkasuwila Klistu. We Leza nye awino akandungamika, muno alisuwilo. 10Chino nkasi ukumanya we Klistu namaka yakwe nukuzyulupuka kwakwe; ukuyisanzya mukuyimba kwakwe imfwe ndivino wafwile, 11mbali nukulolela kwakuti naninye njize nzyulupulwe kumfwa, imbe nuwumi.
Ukusamala ukufika pakafiko
12Nsinakuvwanga nkuti nachimvya, nafika napakafiko. Lelo nchili nkuyipatichizya ukwelezya ndi achino ngazana ichilambu chino Klistu Yesu waleka nawa newakwe. 13Awenche, wanawitu, nsinakwelengania ukuti napochelela; ukuwa kweni ichintu chonga chino nkachita, akwiwilila ivintu vino vili kunsizi nkukunzuluchila kuvintu vino vili kunkolelo. 14Achaleka nkusamala ndungamine wowo nkuya kuchipimo alyakuti nchimvye mpochelele ichilambu, chalwito lwakwe Leza mwakwe Klistu Yesu ukuti nkawange mwiyulu.
15Sweswe swensi swewantu twakula kumuzimu twazipila tuwe wonye-woo. Ukuwa, ndikuli wamwi wano wakwelengania vinji, Leza aliwawumbulila chonye-choo. 16Ukuwa kanonzi, lekani tulange tukupita munzila zino twapitanga mwenemo ukufika nilelo.
17Wanawitu, nkolanianji nene. Twawalanjizya vino mwazipila ukuwa, achaleka pechelanji muwalola wane wakukonka ichilolelo. 18Nawanena chonyechoo impindi mvule, swinyanye nkunyochelela ukuwanena, mbali nkulila: kuli awavule wano imiwele yawo ayawulwani wamfwa yakwe Klistu pawuchingane. 19Wawonye insilo yawo akulowa mwilowelwe, amuno weni kaleza kawo akulonda kwawo ukwakumuwili, weni wakatumbila vino vikawaletela insoni, wakapechela ivintu vyamunsi yoo. 20Ukuwa swenji, swewakaya wamwiyulu, muno tukalindilila Katula ukuti ayize ayike afume mwiyulu, Imfumu e Yesu Klistu. 21Ayize apilule imiwili yitu imitonte yino ikafwa iwe ngati amuwili wakwe uwakuchindamikwa, awomvye amaka yakwe aleke vyonsi vimufukamile.
Currently Selected:
Philippians 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
