James 2
2
Uwusoche kuvyakuvuna imilandu
1Wanawitu! Mwewantu mwasuwila mu Mfumu yitu e Yesu Klistu, Imfumu yakuchindamikwa, chisi achizima ukupawunkania awantu, kumilolele yavyakumuwili. 2Angala umuntu muchindame wino azwite imbalaminwe yakwe golide mwikasa lyakwe nivizwalo vizima wiza muno muwungine, anyoke numusaluke wino azwite twasala wiza mwenemo; 3ngandi mwalanjizya umuchinzi kwewino azwite ichete, Muti, Zanga uyikale paa pachilimba chizima, nga munene umusaluke muti, Yimilila, pamwi yikala pansi pakwe nene, 4amutela muli numulandu wakupawunkania awantu nukuwapanzya namelengania mawipe.
5Aleni teyelezyani, wanawitu! Leza wasozile awalanda awamunsi moo ukuti wachindame mwisuwilo ukuti wawe nuwufumu wuno walayilizya ukupa wane wamukunda. 6Ukuwa mwenji mukakwelengula awasaluke! Wuzye wasi awachindame wane wakawakwelengula awawakwelekwesya awawatwala kwewakapanzya? 7Awano wakakwelengula izina zima lino lyapwa kwakwe mwemwe.
8Ukuwa ndi mukutontela amasundo yawufumu wakwe Leza, yano yawalikwa mumawaliko matele, yano yati, Uwakunda umuwuyo ndivino wayikunda wemwenecho, peni amutela mukuchita ichete. 9Ukuwa ndi mukuchita awantu mumilolechele yakulonde k utupu, amutela muli nuluwembu, namasundo ayatela yakuwasinila kuno mwewakachila wamasundo. 10Wensi wino akuluvya isundo lyonga atela akuluvya yonsinye. 11Amuno wino wasunzile ati, Utize uwazeleluka, awili weyonye wino watili, Utakoma. Amuno chingatenga usi wemuzelele, lelo ndi wechikoma utela ukuchila isundo. 12Vwanganji muwachita nukuchita ngati awantu wane wandi wapanzwe nisundo lino likakulula awantu. 13Amuno Leza ataliwa ninkumbu kumuntu wino asi ninkumbu; ukuwa inkumbu zyalyatanjila ipanzyo.
Isuwilo nimilimo
14Wanawitu! Nga kuli wuzima-chi ndi wumwi akuti, Indi nisuwilo, ukuwa imiwele yakwe ayavye? Wuzye isuwilonye lyolyo alino lingamutula? 15Mutele mwelenganie ndi achino muli nawanyonko pamwi inkazi zinu wano wazwaluka swinya wali nichinkumbili. 16Nga mungatela mukuwanena chizima-chi, pano mukuti, Leza awapepe! Muwalungula nanti kwivwa impepo swinya muwalya amwikuta!—ndi mutanga muwape vino wasowelwa? 17Wowonye avino chili nisuwilo: ndi isuwilo lyasowa imilimo, alitela lyafwa.
18Ukuwa wumwi angati, Umuntu wenga ali nisuwilo, nawe winji alinimilimo. Nenji itolelelo lyane alyakuti, Ale ndanjizya wino akulanga ali nisuwilo tupu imilimo pole. Nenji nandi mbalanjizye isuwilo nimilimo yane, 19Wuzye mwasuwila kuno kuli Leza wenganye-nsu? Achizima! Nawawipenye wakasuwila awalanga wakutina mbali nukuzakaza. 20Wemutumpe-we wuzye ukulonda ulole kuno ndi isuwilo lyasowa imilimo alitela lyawa alyavye? 21Ngafwandi etatakulu Abrahamu walungamisilwe nu Leza wuli? Walungamisilwe nimilimo yakwe, pano wafimile umwanakwe e Ayizeki pileza. 22Wuzye mwenji mutaweni chocho? Isuwilo lyakwe nimilimo yakwe vyawomvile apaliponga; isuwilo lyakwe lyafisizwe muno amilimo yakwe. 23Amawaliko Matele yafiswa yano yati, Abrahamu wasuwizile Leza, achaleka muno alisuwilo lyakwe, Leza wamupochelezile ngati amulungamane. Achaleka Leza witanga Abrahamu akuti, Chiwuza chane. 24Ale papo mwayilolela, kuno fwandi Leza awino akalungamika umuntu muno amilimo yakwe, isuwilo tupu pole.
25Swinya nuchilendenye e Rahabu. Leza wamulungamisile muno amilimo yakwe, muno wapochelezile intumi zya chi-Yuda aleka azipusuka azipita inzila yinji.
26Achaleka aleni fwandi, ndivino ndi umuwili wusi numuzimu awutela wafwa, nisuwilonye ndi lisi nimilimo alitela lyafwa.
Currently Selected:
James 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
