James 3
3
Muwasunga ululimi
1Wanawitu! Mutawa mwewasambilizya wavule, mwazipila ukumanya kuno swewasambilizya tulipanzwa tulutilizye. 2Penye swewavule tukawifya. Umuntu wino asiwifya mumumvwango wakwe atela wafika pakafiko, swinya atela ali namaka yakuyania nuwuntu wakwe wonsi. 3Tukula ndi twawika ivyela vyakulemela kavwalo mumulomo wakwe ukuti nga awatutontela, apano tukamutwala konsi kuno tukasi. 4Mutele mwelenganie nuwukulu wawato, vino wukasendwa numuza, wukapilulwa nakasichilo katichi, awulanga wukuya konsinye kuno umweniwato akulonda ukuya. 5Wowonye avino chili nululimi: chingatenga lwachepa awoo, lungayitumvya ivintu vikulu.
Mutele mwelenganie vino umusitu wukulu wukakochwa nakamulilo katichi! 6Ululimi lwakolana nulupya. Ululimi awuli wufumu wuwipe, wuno wikala mumiwili yitu swinya nukusasya uwuwipe monsi monsi. Wukasonteka ulupya monsi muno tukwikala numulilo wuno wukafuma mwilungu lyilowelwe, 7Umuntu awino akateka, wateka nukuteka, ivitumbulwa vinji vyonsi—inyama zyalonde ninyunyi, ivikulisi ninswi. 8Ukuwa pasi umuntu nanti wenga wino akawelezya ululimi aluteka. Ulumi aluwipe lusitekwa, Iwizula nuwanga wawuchikoma-pwi. 9Lolonye aluno tukanyoka atusalifizya Imfumu yitu Umukwasi nalo, swinya mbali nukutipila awantu wanji, wane watumbulwa kwikolano lyakwe Leza. 10Amazwi yakusalifizya nayantipo vikakwituluka ukufuma mumulomo uwuliwonga. Wanawitu! Mutize muwachita wonye-woo! 11Wuzye nakamfunwe waminzi akafumya aminzi mazima namalule? Awe! 12Silolani wanawitu, ngavino umukunyu wusikoma amangungu; nanti amuti watukomwa tutichi tuno wakasuta ipala wutanga wukome amaku; nanti aminzi makantuke yatanga yalete aminzi mazima.
Amano yano yafuma mwiyulu
13Wuzye mwakwe mwemwe muli wumwi uwamano mbali nukwiluka? Ndalipo wazipila ukuyilanjizya mumiwele yamyikalile yakwe, mumilimo yakwe yino akawomba ninjelu zyakuyichefya. 14Ukuwa ndi mumyezo yinu mwizula uwuzuwa, uwululu, nukuyikunda, ndavino muli, mutize muwayitumvya muwawipizya ukusimichila. 15Amano yamwatanye woo yatafuma mwiyulu; amana yamunsinye moo, yayo yasi amana yawuzimu ukuwa ayakwe chiwa. 16Konsi kuno kuli uwuzuwa nukuyikunda, akutela kuli ukuntazumilizyania nimilimo miwipe. 17Ukuwa amana yano yakafuma mwiyulu yeni amatele, ayamutende amatechele, swinya ayakukundana: 'yali ninkumbu mvule swinya yakawosya imilimo mizima; yasikopeka. 18ivizawalo vyawuzima avino vikafuma mumbeyu yino wakatasya wamutende wakatanda numutende.
Currently Selected:
James 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
