James 1
1
1E kalata wee wafuma kwe Jemusi umuwomvi wakwe Leza ni Mfumu e Yesu Klistu:
Akulamuka awantu wakwe Leza wonsi wane wasatila munsi yonsi nuwukulu,
Isuwilo namano
2Wanawitu! Yelenganianji kuno mwewalongo ndi amatamyo yamisangomisango yakuwaponela, 3amuno mwamanya kuno ndisuwilo linu likuchimvya mukwelezwa kwinu, amutela muli namaka yakuzizimichizya, 4Muzizimichizye mufike nakunsilo nanti kupotwa, alyakuti muwe mwewayane, nanti kusowelwa chimwi. 5Ukuwa ndi wumwi wasowelwa amano, wazipila apepa kwe Leza, wino angamupa amano, amuno Leza weni akapa wonsi chipepe mbali ninkumbu. 6Pano mukupepa muwawa nisuwilo, nanti kuvwilika. Wensi wino akuvwilika atela ali ngati aling'wimbi lyakwe sumbi lino likasendwa mwalwe numuza. 7-8Umuntu wamwatanye wowo atela awamyezo yiwili, wino, asipanichisya chino akuchita, weyonye atanga awafwa nukusuwila ukupochelela chimwi ku Mfumu.
Ukusowelwa nukutavuzya
9Umwanawitu umulanda wazipila awasechela ndi Leza wamukatusya, 10numuchindamenye ndi Leza wamuchefya. Amuno ukuchindama kukapita ndivino iluwa lyalonde, 11Ilanzi likafuma nichilungula chakwe alyochelela piluwa; niluwa alilukuta, nukuyemba kwakwe Iyolilyo akononeka. Avino numuntu muchindame aliyononwa pano akupinkintika nimilimo yakwe.
Ukwelezwa
12Awalongo umuntu wino akulanga ali nisuwilo pano akwelezwa, amuno ndiwachimvya wachita ichete alipochelela ichilambu chawumi chino Leza walayilizya wane wamukunda. 13Ndi umuntu welezwa wowonye atazipila ati, We Leza awino akumwelezya. Amuno Leza asikwelezwa nuwuwipe, nawenye Leza asikwelezya umuntu wumwi. 14Ukuwa umuntu akwelezwanga ndiwakwemwa watitichizwa nuwuwipe wakulonda kwakwe. 15Ngapano ukulonda kwakwe ukuwipe akula kwakula akusokolola uluwembu; nga alula uluwembu nalo lwakula, aluleta imfwa.
16Wanawitu, mutize muwachenjezwa! 17Ivyawila vyonsi ivizima nivilambu vyonsi vikafuma mwiyulu; vikafuma kwe Leza, ekelewula wakuwala kwamwiyulu. Weni asikawuka nanti akusikuka pano akusenuka. 18Kukulonda kwakwe watwelewula nizwi lyakwe ilyakusimichila, alyakuti tuwe swewakutalika pavitumbulwa vyakwe vyonsi.
Ukwivwa chino amazwi yakusula nga nukutontela
19Wanawitu, yizukanji choo! Muwakampuka ukwivwa, ukuwa muwatechela pakuvwanga, swinya muwatechela pakuvitwa. 20Ukuvitwa kwamuntu kusileta uwulungamane kwe Leza. 21Achaleka, funtukanji kumyata yawukwelengusi nimiwele miwipe yonsi. Chimbani kwe Leza mupochelele izwi lino akulembeka mumyezo yinu, lino lili namaka yakuwafyusya.
22Mutize muwayichenjezya nukwivwa izwi lyakwe kutupu, Ukuwa, muwalitontela. 23Amuno wensi wino akul'ukwivwa kutupu nanti kutontela wakolana numuntu wino akayilola pachilola ayilola vino ali. 24Ayilolechesya ichetenye apita, ukuwa nanti kuzimbanye ayiwilila vino ali. 25Ukuwa wensi wino akulolechesya mumasundo mayane yano yakaleka awantu awalufuma, wino akulanga akuyatontela, nanti kwivwa kutupu ayiwilila nukwiwilila, ukuwa weni alanga akachita ndivino amasundo yakutaka—umuntunye weyo alipepwa nu Leza kumilimo yakwe.
26Wuzye pali wumwi wino akuyelengania kuno amulungamane? ukuwa ndi atanga ayisunge ululimi lwakwe, uwulungamane wakwe wowo awutela awavye wukumutumpika awowo. 27Uwulungamane wenecho wuno e Leza e Tata wakundisya awoo: ukusayila wandekwa nawano wafwilwa awamule mukuyimba kwawo, nukuyisunga kuviwipe vyonsi ivyikombezya lyamunsi.
Currently Selected:
James 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
