Ephesians 6
6
A wana nawakwasi
1Wana, amulimo winu uwawu Klistu akutontela awakwasi winu, amuno chonye-choo achino chayana ukuchita. 2Uwachindika eso nunyoko alili sundo lyakutalika lino lili nilayilizyo. 3Alyakuti uwawa ichete, mbali nukuwa nuwulanzi munsi.
4Namwe mwewayisi, mutize muwafyenga awana winu amuleka wavitwa. Ukuwa, muwawalelela mwisundo lyawu Klistu muwawasochela nukuwasochela.
A wazya na wayisikulu
5Wazya, tontelanji wasokulu wamunsi, muwawatina nukuzakaza; muwawawombela numwezo wonga, ngati mukuwombela Klistu-nye. 6Chisi achizima ukwengupa paminso patupu pano wakulola, alyakuti vwile wawawanzye; ukuwa muwawomba ndivino Leza akalonda nimyezo yonsi, amuno mwe wazya wakwe Klistu. 7Mwe wazya muwawomba imilimo nanti kukwinuluka, muwawomba ninsansa ngati mukuwombela Imfumu, umuntu pole. 8Yizukanji kuno Imfumu ililambula wila muntu, umuzya, nanti amwanangwanye, muno amilimo mizima yakwe yino akachita.
9Namwe mwewayisikulu, chitilanji awazya winu ivintu ivilivyonga; lekani ukuwazakazya. Yizukanji kuno mwemwenye nawazya winu muli nusokulo wenga wino ali mwiyulu, wino akapanzya wonsi uwuliwonga.
Ivyanzo vyakwe Leza
10Ichakupelelechezya, simpani amaka yinu mu Mfumu, namumaka yakukazawana kwakwe. 11Zwalani ivyanzo vyonsi vino Leza wawapa, alyakuti muwe namaka yakulwisya imichenjelo nikopeko lyakwe Satana. 12Amuno ukulwisya kwitu kusi akwawuntu, ukuwa akwakulwisya ivita vyamizimu miwipe yino ili munsi yamwiyulu, nawakapanzya, nizyamfumu, namaka makulu ayamfinzi yampindi yoo. 13Achaleka yangufyani, sendani ivyanzo vyakwe Leza! Alyakuti ndi uwanda wuwipe wiza-wiza, mulisyanjisya pano umulwani akuwalwisya, nga ndimwiza mwalwisya mwafika napakupelelechezya, mulilanga mulyatizile paponye.
14Achaleka simpisyanji: amazwi yakusimichila yawe amupango wakuzutila mumitembeleko yinu; muzwale uwulungamane wuwe a chakuchinga pa chifuwa, 15muyisenganie kukuyawizya Ilandwe Zima ilyamutende liwe ngati andyatu zino mwazwala kumanama yinu. 16Penye muwasenda isuwilo ndivino inkelwa; lino liliwapa amaka yakuchinjilila imivwi yamulilo yino ikavwintwa nu Muwipe. 17Muwapochelela itulwa liwe achisote chakumutwe nizwi lyakwe Leza aluno luwe alupanga luno Muzimu wawapa. 18Muwachitila vyoo mumapepo, amulanga mukulambilizya kwe Leza ukuti awavwe. Penye, muwapepela mwakwe Muzimu wino akawatungulula. Achaleka muno achonyechoo muwalanga mupampusile nanti kulechelezya; muwapepela awantu wakwe Leza penye. 19Naninye mpepelanji, alyakuti Leza ampe amazwi, pane nati ndavwanga, alyakuti mfumpule umulomo wane nukusinga imbumbule ivyankama vyilandwe zima. 20Muno alilandwe zimanye lyoo, nene nentambikwa, chingatenga nanti nemunyepwe wonye-woo. Mpepelanji alyakuti ndavwanga nukusinga, ndivino nazipila.
Ukulaya kwakupelelechezya ukwakwe Pauli
21E Tikikasi, umwanawitu umukundwe swinya umuwomvi musuwilwa mumulimo wa Mfumu, awino wandi ayize awanene Ilandwe lyonsi vino indi, alyakuti mumanye vino nkuwa. 22Achaleka namutumila kwakwe mwemwe—ukuti ayize awamanyisye vyonsi muno tuwezile, nga awasimpisye mumyezo.
23Sivyo e Leza Umukwasi ni Mfumu yitu e Yesu Klistu awapa awana witu wonsi umutende mbali nulukundo nisuwilo. 24Sivyo Leza awafwila inkumbu wonsi wakunda Imfumu yitu e Yesu Klistu nulukundo lwamuyayaya.
Currently Selected:
Ephesians 6: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
