Ephesians 5
5
Muwapita mukuwala
1Achaleka vino mwewanakwe Leza awakundwe, mwazipila amukolana nawe. 2Muwawa nulukundo, ndivino Klistu watukunzile ayifima umwenecho muno asweswe, anzuwi nunchile iyifungo zima lino likasechelesya Leza.
3Achaleka vino mwewanakwe Leza awoo, kutize kuwawa uwuzelele, nanti alikombezya, nanti alikumbuchila mwakwe mwemwe, nanti akutakwa vitize viwatakwa. 4Amuno vitawayana nanti akuwayana ukuti mungatukana, nanti akuvwanga kwawuwelewele, nanti amazwi mawipe. Ukuwa mwazipila muwasalifya Leza. 5Manyichisyani kuno pasi umuzelele nanti amuntu wikombezya, nanti akukumbuchila kuwipe (amuno wino akakumbuchila ali ngati akupepa ikolania) atanga apyane mu Wufumu wakwe Klistu nu Leza.
6Mutaleka umuntu wumwi awawachenjezya namazwi yavye; muno avintu vyamwatanye woo amuno uwukali wakwe Leza wuliponela wano wasimutontela. 7Achaleka mutize muwasanzinkana nawantu wamwata wowonye. 8Kali mwalinji mumfinzi, ukuwa kanonzi pano mwawa mwe wantu wa Mfumu mukapita mumusanya. Achaleka mwazipila ukupita ndivino awantu wano wakapita mumusanya. 9Amuno umusanya awuno wukaleta ivizawalo vizima nkani, nuwulungamane, nukusimichila. 10Muwakwelezya ukusambilila vino vikasechelesya Imfumu. 11Mutize muwachita imilimo miwipe iyamfinzi yino wanji wakachita. Ukuwa, nkani-nkani muwavifumya palwenze. 12(Achansoni pakutaka ivintu vino wakachita munkama.) 13Ukuwa ndi ivintu vyonsi vyasokololwa palwenze, apano vikamanyikwa ichete muno vyawela, 14amuno wila chintu chino chaloleka palwenze chikutela chaswepa. Achaleka chavwanga chati,
Ziwuka wemuntu uponechile, ukutauke kuwafwe!
Klistu wandi awale pakwe wewe.
15Achaleka muwalolechesya ichetechete muno mukupitila. Mutize muwawa wakwe wane wasi namano, ukuwa nkandi awamano. 16Muwapampuka impindi zyonsi, amuno amanda yaa amawipe. 17Achaleka mutize muwatumpa, ukuwa vwambanji muno ukulonda kwa Mfumu kwawela.
18Mutize muwakolwa ipala, mwakwe vino muli ukononeka: ukuwa, mwizuzwe nu Muzimu. 19Muwavwanzyania amazwi yamumalumbo, nayamundwimbo, nindwimbo zyakwe-Leza; muwakwimbilila Imfumu indwimbo namalumbo, mbali nukutumvya Imfumu mumyezo yinu. 20Swinya muwasalifya Leza Umukwasi kwevyonsi mwizina lya Mfumu yitu e Yesu Klistu.
Awanachi nawalume
21Muwatontelana, amuno akuli kuchindika Klistu.
22Wanachi tontelanji wawakwinu, ndivino ku Mfumu. 23Amuno umonsi ali namaka kumuchi wowonye avino Klistu alinamaka kwi Klezia lino awuli muwili wakwe. 24Ndivino i Klezia likatontela Klistu, awowonye avino ndi awanachi watontela awalume kuvintu vyonsi.
25Wonsi kundanji wawakwinu, ndivino Klistu nawe wakunzile Iklezia ayifima muno lyolilyo. 26Wachisile wowonye alyakuti alyimichile kwe Leza, mumazwi yakwe, ndiwatela walipwizya naminzi lyaswepa, 27alyakuti Iklezia liwe alyakwe, nuwuzima wakwe lyolilyo wonsi, liwe alitele nanti kasinza, inzyoto nanti nkwinya, nanti achintu chimwi ichamwatanye woo. 28Avino awonsi wakana wakunda awachi ndivino wakunda imiwili yawonye. Umonsi wino wakunda umuchi atela wayikunda umwenecho. 29(Pasi umuntu wumwi wino wapata umuwili wakwe. Ukuwa, akawulela nukuwusunga ichete, ndivino nawe Klistu akachita Iklezia; 30amuno swevyawi vyamuwili wakwe.) 31Amawaliko Matela yavwanga yati, Muno achonye-choo umonsi akasya yisi nunyina, ayisanzya, wowili awawa wewenga. 32Mumawaliko Matele-nye yaa muli ukusimichila kwenecho, yakataka ivyakwe Klistu ni Klezia. 33Swinya yakataka mwemwenye: umonsi wensi wazipila awakunda umuchi ndivino wayikunda umwenecho, nawe umuchi wazipila awachindika umulume.
Currently Selected:
Ephesians 5: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
