Colossians 3
3
1Mwazyulupulwa apaliponga nu Klistu. Fwandi aleni, wikani imyezo yinu kuvintu vyamwiyulu, kuno Klistu wikala pandulu kwikasa lyandilo ilyakwe Leza. 2Yelenganianji pakwe vyonye-vyoo vitupu, mutize muwakwelengania ivintu vyamunsi. 3Amuno mwafwa, nuwumi winu wavwama apaliponga nu Klistu mwakwe Leza. 4Uwumi winu uwakusimichila we Klistu, wino ndiwiza-wiza, apano namwenye muliloleka apaliponga nawe mukuchindamikwa kwakwe.
Uwumi wukali nuwumi wupya
5Achaleka fwandi, mule muwakoma ukulonda konsi ukwamunsi kuno kuli mwakwe mwemwe, uwuzelele, ikombezya, ichilaka chiwipe, ukulonda kuwipe, ukumilichisya (amuno ukumilichisya akulumbula amakolania). 6Muno avintunye vyoo uwukali wakwe Leza wuliyiza kwakwe wane wasinakumutontela. 7Avino namwenye kali mwapitanga mukulonda kwamyata yonye-yoo, pano mwavinzilwe nivintunye vyoo,
8Ukuwa kanonzi fumyani ivintunye vyoo vyonsi: ukuvitwa, uwukali, namelengania yalupato. Mumilomo yinu mutize muwafuma intusi numukwelengula. 9Mutize muwawipizyania, amuno kanonzi mwazula uwuntu wukali nimiwele yakwe yonsi, 10mwazwala umuntu mupya. Wenye wee awili muntu mupya wino e Leza umwelewuzi, akamwelewula uwupya wawukola wakwe impindi zyonsi, alyakuti mumumanyichisye. 11Muno achochonye, kusi ikandi nanti amu Yuda, umusilamo nanti awino atalembwa uwusilamo, imbuzi zyawantu, ninyama zyawantu, awazya, nanti awanangwa, ukuwa Klistu wevyonsi swinya ali mwakwe wonsi.
12Mwenji mwewantu wakwe Leza; wawakunzile awasola ukuti muwe mwewakwe. Achaleka fwandi, muwe numwezo wachilanda, inkumbu, ukuyichefya, ukutechela, nukuzizimichizya. 13Yavwananji, swinya tetelananji, ndi wumwi ali nakakukwinuluka wumwi. Mule muwatetelana ndivino namwe Imfumu yawatetela. 14Napakwe vyoo vyonsi, muwawa nulukundo, luno lukasanzinkania ivintu vyonsi apaliponga muchikunga chenecho. 15Muleke umutende wuno Klistu akupanga awuno wuwapanzya mumyezo yinu; muno amutendenye woo Leza wawita mwensi apaliponga mumuwili wonga. Muwasalifya. 16Ndi amazwi yakwe Klistu, yakwikala mumyezo yinu, nukusimichila konsi. Sambilizyanianji mbali nukuchinchizyania namano yinu yonsi. Yimbilanji amalumbo, nindwimbo, nindwimbo zyamuzilo; yimbilanji Leza, mbali nukusalifya mumyezo. 17Vyonsi vino mukuchita navino mukuvwanga, mule muwachitila mwizina lya Mfumu e Yesu, mwakwe weliwe amuno muwasalifizya e Leza Umukwasi.
Imiwele yakuchitilana muwumi wupya
18Wanachi, tontelanji wawakwinu, amuno vino mwe wa Klistu mwazipila muwachita wowonye.
19Wonsi, kundanji wawakwinu, mutize muwakalaluka kwewoliwo.
20Wana, amulimo winu mwe wa Klistu ukutontela awakwasi winu penye, amuno chochonye achino chikasechelesya Leza.
21Wakwasi, mutize muwasonkomola awana winu, alyakuti watize watentemulwa.
22Wazya, tontelanji wasokulu wakumuwili muvintu vyonsi, mutize muwachita wowonye pano wakulola patupu pole, ukuti ngawasuwile, ukuwa muwachita nimyezo yinu yonsi, kukuchindika Imfumu. 23Wombanji chonsi chino mukuwomba nimyezo yinu yonsi, muwawomba ngati mukuwomba ku Mfumu e Leza, kuwantu pole. 24Yizukanji kuno Imfumu e Leza aliwalambula; mulipochelela chino wasengulila awantu wakwe. Amuno Klistu awili sokulu wino mukuwombela. 25Nawensi wino akawomba uwuwi, nanti awe wuli, alilambulwa kuwuwipe wakwenye wuno akachita; amuno Leza akapanzya wonsi uwuliwonga.
Currently Selected:
Colossians 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
