Colossians 2
2
1Lekani mbanene ukuzunkuntika kwane muno amwemwe, nawantu wamwe Laodikiya, nawonsi wane watandola impumi yane. 2Nkuchita wowonye alyakuti wasimpe mumyezo yawo wakundana wawe nisuwilo lyenecho chikale chiti ndi muno akwivwichisya kuzima kuno wali nako. Apano wangamanya inkama yakwe Leza, wino we Klistu. 3Awili kii wakwiyulila ivifisame vyonsi vyamano ninjelu zyakwe Leza.
4Achaleka aleni, atize umuntu wumwi awawatumpika nimipanzi yawufi, chingatenga chiwe wuli. 5Amuno chingatenga nsipo mumuwili, ukuwa indi namwe mumuzimu, nkuzevya muno nkulola insimpo zinu zino mwimilila apaliponga nukusuwila Klistu.
Uwumi wenecho wuno wuli mwakwe Klistu
6Achaleka vino mwapochelela Klistu Yesu kuno a Mfumu, aleni yikalanji apaliponga nawe. 7Zisyani imisisi yinu mwakwe weliwe, simpani uwumi winu mwakwe weliwe, swinya muwomesye mwisuwilo linu, ndimuno mwasambilizizizwe. Muwalandalila nukusalifya.
8Achaleka chenjeleni, atize wumwi ayize awasende uwuntapwa awachenjezye namazwi mawipe ayamano yawuntu, yano yakafuma mumisambilizizye yawuntu, nakumizimu yamunsi, nanti ukufuma kwe Klistu. 9Amuno mumuwili wakwe Klistu amuno mwikala uwu Leza wonsi, 10swinya muli nuwumi wakusimichila wuno muli apaliponga nawe. Weni wakula walusya amawufumu yonsi ayamizimu nukupanzya konsi.
11Mwakwe weliwe amuno mwalembezilwe uwusilamo, uwusilamo wuno wusi awakulembwa nawantu, ukuwa nkandi uwusilamo wakulembwa nu Klistu-nye nalwakwe, ukwakukomolwa kumaka yamuwili woo. 12Amuno mwalile pano mwabatizwa, amuzikwa apaliponga nu Klistu, swinya mwibatizo amuno mwazyulupulizilwe nu Klistu muno alisuwilo linu lino mwasuwizile Leza wamaka, wino wazyulupuzile Klistu kuwafwe. 13Kali mwafwile kumuzimu muno aluwembu lwinu, swinya muno mwalinji mwemakandi nanti masundo. Ukuwa kanonzi Leza wawapunga uwumi apaliponga nu Klistu; e Leza watutetela uluwembu lwitu lonsi. 14Wavulunginie amawaliko ma wipe ayampa zitu, apaliponga niviwilo vyamwenemo ivikalambane, aya avipamantila pawuchingane, avifumya lyankani. 15Pawuchinganenye papo apano Klistu wayitawuzile kumawufumu yamizimu nukupanzya kwawo; wawasokolola palwenze wawakolezya ngati antapwa pampindi yakuchimvya kwakwe.
16Achaleka mutize muleke umuntu wumwi awawachitila amasundo yakwe vino mukulya navino mukung'wa, nanti avyamanda mimichile, nanti avyakuyitevya kwamyezi mipya, nanti avyapamanda yakusolezya. 17ivintunye vyoo vyonsi avizyungani vyavye ivyavintu vino vilipona; ukuwa ichintu chikulu we Klistu. 18Mutize muwaleka umuntu wumwi wino akayiwanzya nivilota vyakwe awawazinjilichizya nivyavye, akakopelezya ukuyichefya pamwi ukupepa awangeli. Umuntu wamwatanye woo akayikuzya apavye patupu, mumyelenganizizye yakwe iyawuntu wutupu, 19wapotwa ukulemasya Klistu, wino wekatwe. Mwakwe wino umuwili wonsi wukalelwa nawe nukulimbinkanwa apaliponga mumafundo, awuwakula ndimuno Leza akalondela.
Ukufwa swinya ukwikala nu Klistu
20Mwafwaapaliponganu Klistumwakululwa kumizimu yamunsi. Ngafwandi, amuno achani, chino mukwikala ngati mwe wamunsi yoo? Ngamuno achani chino mukatontela amasundonye ndivino yaa ayakuti, 21Kusikwezya ukulemelela choo. Kusikwezya ukulya choo. Kusikwezya ukumvya kwechoo? 22ivintu vyonsi ivyamwatanye woo vikawa avyavye, ndivyawombelwa. Amasundo yavye yano awantu wachita yano wakasambilizya. 23Kweni molimonye wakaloleka ngati wali namano mumipepele yawo pane wakawapatichizya ukupepa awangeli, nukuyichefya nukuyimvya umuwili; ukuwa vyovyo visi nachimwi ichakulesya ukulonda kuwipe ukwamuwili.
Currently Selected:
Colossians 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
