Colossians 4
4
1Wayisikulu, chitilanji awazya winu chino achizima. Muwakwizuka kuno namwenye muli nu Sokulu wino ali mwiyulu.
Ivyakukomelezya
2Muwalindila ukupepa, swinya muwapampuka pano mukupepa, amulanga mukusalifya kwe Leza. 3Swinya pampindi zino mukupepa amulanga mukutupepela naswe, alyakuti Leza angatupa ulongo luzima ulwakuwizizya Ilandwe lyakwe, ilyakuwumbula inkama yakwe Klistu. Muno achochonye achino nawela muvingololo. 4Achaleka fwandi, mpepelanji, alyakuti ndawumbula nukusimichila konsi.
5Muwawa namano yamichitile kwakwe wane wasi awasuwizi, muyilolele impindi. 6Umuvwango winu wuwawa awuzima wuno wukasechelesya, swinya muwatolelela wilamuntu ichete.
Umulamu wakupelelechezya
7Umwanawitu umukundwe, e Tikikasi umupyunzi musuwilwa, swinya umuwomvi wunji mumulimo wa Mfumu, wandi ayize awalandile ivyane vyonsi, 8Achaleka namutuma kwemwemwe, ukuti ayize awasansamusye ndiwawanena vino sweswe tuli. 9Namutuma apaliponga nu Onesimasi, umwanawitu umusuwilwa swinya umukundwe, uwakumwinu. Wandi wize wawalandile vyonsi vino vili koo.
10E Aristarikasi, wino ali muvingololo apaliponga nani, akuwalamuka, nu Marko-nye, umuvyala wakwe Bamaba. (Nawakomelezya kali, ukuti ndiwiza mwize mumupochelele.) 11Nu Joshuanye wino akakwitwa ilyakwe Jastasi, akuwalamuka. Wanye-waa wotatu awa Yuda wano watontolokwa awano wakuwomba umulimo wa Wufumu wakwe Leza apaliponga nani, swinya wakanjavwa nkaninye.
12Epafurasi uwakumwinu, umuwomvi wakwe Klistu Yesu, nawenye akuwalamuka. Akawapepela impindi zyonsi, alanga akuwalambilizizya kwe Leza ukuti awasimpisye-ndi, muwome, mufike napakafiko, muwachita ukulonda kwakwe konsi. 13Nkupanichisya nkaninye kuno akawa zunkuntichila molimonye, swinya nukuzunkuntichila awantu wa mwe Laodikiya na wamwe Hierapoli. 14Nu Luka-nye, umukundwe witu mbali sing'anga, nga nu Demasi wakuwalamuka.
15Tulamuchilani awanawitu wane wakakwikala mwe Laodikiya, mutulamuchile nu Nimfa, apaliponga ni Klezia lino likawungana mung'anda yakwe. 16Ndimwawazya ekalatanye wee, niupanichisye kuno swinya mwawazizya Iklezia lyamwe Laodikiya. Swinya muwazye nukalata wino wafuma kwe Laodikiya. 17Muize munene Arkipasi kuti, Wazipila ukumalizya umulimo wuno wapilwe ukuwombela Imfumu.
18Anenenye ne Pauli nkuwawalichila nikasa lyane: nkuwalamuka. Mutize mwiwilile kuno indi muminyololo!
Sivyo e Leza awafwila inkumbu mwensi.
Currently Selected:
Colossians 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
