2 Wakorinte 1
1
1E kalata wee wafuma kwe Pauli wino muno akulonda kwakwe Leza amupostile wakwe Klistu Yesu, nakumwanawitu e Timoti—
Kwi Klezia lyakwe Leza lino lili mu Korinte, nakuwantu wakwe Leza wonsi wane wali nsi yonsi iyawa Griki. 2Sivyo e Leza e Tata ni Mfumu e Yesu Klistu awawafwila inkumbu amuwa umutende.
Ukusalifya kwakwe Pauli kwe Leza
3Lekani tuwasalifya Leza Umukwasi wa Mfumu yitu e Yesu Klistu, Umukwasi wankumbu, e Leza wino ukwavwa kwitu kukafuma! 4Akatwavwa muntazi zitu zyonsi, alyakuti naswe tuwe namaka yakwavwa wanji wane wali nintazi ndekane-lekane, atulanga tukuwombela ukwavwa ukulikonga kuno naswe twapochelela kwe Leza. 5Ndivino amayimbo yakwe Klistu yavula kwakwe sweswe, awowonye avino Klistu akalanga akutwavwa nukwavwilizya kukulu. 6Nditukuyimba, atutela tukuyimbila mwemwenye ukuti tuwavwe mupusuke; nditwavwiwa, namwenye amutela mwavwiwa swinya mwapwa insimpo zyakuzizimichizya nuwuchimyamya ukuyimba ukulikonganye kuno naswenye tukazizimichizya. 7Achaleka ukulolela kwitu kwakwe mwemwe kusiyinganwa; twamanya kuno pane mukayisanzya mumatamyo yitu, swinyanye tukakwankana ukwavwiwa kuno tukapochelela.
8Wanawitu, tukasi tuwizusye, ivyantazi zino zyatuponezile muchipya chansi ya Asia. Twavinzilwe nkaninye nukung'wamilwa kuno twang'wamizilwe, nisuwilo lyawulanzi witu alisila. 9Twatayile imyezo yitu atuti twapanzizwa ikukomwa. Ukuwa chalinji awonye-woo alyakuti, tutize tuyimililile sweswe swenga, ukuwa nkandi kwe Leza, wino akazyulupula awafwe. 10Watutuzile kuntazi zyamipamba zyozso, swinya wandi alange akatutula; naswe isuwilo litu lili mwakwe weliwe ukuti alitutula swinyanye, 11pano mukutwavwilizya namapepo yano mukutupepela. Achaleka Leza alipochelela amapepo mavule yano awantu wakatupepela atupepe; nawawulenye walisantula amazwi yawo wasalifye Leza amuno asweswe.
Pauli ayelengania inzila zinji izyakuwombela
12Choo achino tukuyitumvizya: choo achino tukupanichisya nanti nsoni; mwakwe vyonsi vino tukachita munsi, nkani nkani vino tukawachitila tukuvwanga ivintu chilungampumi nukusimichila konsi kuno Leza watupa. We Leza-nye awino akatufwila inkumbu atupa namaka, yasi amana yamulawa. 13Swenji tusinakuwawalichila chimwi nkandi chino mugawazya swinya mwivwichisye. Swinya nkusuwila kuno mwandi mwivwichisye 14chino kanonzi musikwivwichisya, alyakuti pawanda wa Mfumu e Yesu mwize muwayitumvya amuno asweswe; naswe twize tuwayitumvya muno amwemwe.
15Nawasuwizile mwensi achaleka pakutalika nelenginie ukuti ntele njize mbasyungule alyakuti mupochelele ukupepwa impindi ziwili. 16Amuno nelenginie ukuti njize mbasyungule pano nkuya ku Makedonia swinyanye napano nkunyoka, ukuti mwize munjavwilizye kuvyamusinzo wane uwakuya mwe Yudeya. 17Wuzye pano nelenginie wonye-woo nalinji nimyezo yiwili? Wuzye pano nkakwelengania wonye-woo, nkakwelengania mumwata wawuntu, echizumile-zumile pamwi echikane-kane impindi iyiliyonganye? 18Muno Leza awakusimichila, ilayilizyo lyane lino nawalayilizizye litalinji alyawuchizumilezumile nanti awuchikane-kane. 19Amuno e Yesu Klistu, Umwanakwe Leza wino e Sailasi, nu Timoti ponga nani twawawizizizye, asi wechizumile-zumile nanti achikanekane. Amuno kweni e Lez pakutuma Yesu wazumizile-nto; 20amuno weliwenye awino wekuzumil wamalayilizyo yakwe Leza yonsi. Achaleka mwizina lyakwe Yesu Klistu amuno tukazumilila atuti, Amen, pak utumvya Leza. 21Amuno we Leza awino akatuwomya apaliponga namwe, mwakwe Klistu; we Leza-nye nalwakwe awino watupawula, 22wawika nichimanyilo chakwe pesweswe, swinya watupa nu Muzimu Mwimichile mumyezo yitu kukupanichisya vyonsi vino akulonda ukutupa.
23E Leza-nye awili kalola wane wino wamanya umwezo wane! Muno nalondanga ukuwalechelezya achino ntizizile ku Korinte. 24Tusinakulonda ukuwapatichizya mumisuwilile yinu; amuno mwasimpa ichetenye mwisuwilo. Ukuwa swewawomvi wawuyo awakuwasansamusya.
Currently Selected:
2 Wakorinte 1: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
