1 Wakorinte 16
16
Ukufima ivyakwavwa awasuwizi
1Aleni kanonzi kuvyakusangula kwandalama zyakwavwa awantu wakwe Leza wane wali mwe Yudeya: muwachita ndivino nanenile ama Klezia ya mu Galatiya ukuchita. 2Mumasabata yonsi wilamuntu ale awapawula indalama zimwi awika payo, ukulingana numuzano wakwe, alyakuti asengula, alyakuti pano niza-niza kutize kwize kuwe uk uwunganika indalama. 3Pano niza nafika ndituma wane mwasola, mbape wakalata wachimanyilo, awano wize watwale ivyawila vinu kwe Yerusalemu. 4Ndi naninye chiza chanzipila ukuti njize mpite, ye tulipita nawo.
Vino Pauli walondanga ukuchita
5Ndiyiza kwemwemwe ndi natela napita mwe Makedonia—amuno nkulonda njize mpite. 6Nche ndiyiza njikale namwe impindi yimwi, pamwi ichisiku chonsi, alyakuti mwize munsuchilile konsi kuno nkuya, nakuno ndilungama pansizi. 7Amuno nsinakulonda ukuwalola ulumpitwa. Nkulondesya ukuti njize njikale namwe impindi ntali, ndi Imfumu yazumilizya.
8Ukuwa nditela ndange njisile mwe Efeso ukwizafika pawanda wakwe Pentekosti. 9Amuno kuli ulongo lukulu ulwakuwomba umulimo wukalambane wuno wazipila pampindinye yoo, chingatenga mwenemo muli wachivulungania wavule.
10Ukuwa ndi Timoti wiza kwemwemwe, mwize mumupochelele ichete, amuno aliyiza mukowomba umulimo wa Mfumu, ndivino nkawomba. 11Atize umuntu wumwi ayize amusalule, mwize mulange mukumusuchilila mumusinzo wakwe umutende, alyakuti asuke ayize kwenene swinya; amuno nenenye nawanawitu tukumulindilila.
12Ukuwa Apolo weni wanawitu, nkamuchinchizya nkaninye ukuti ayize awasyungule mwemwe apaliponga nawanawitu, ukuwa weni asinakulonda ukwiza kanonzi. Ukuwa aliyiza pano wiza walola impindi nzima.
Amazwi yakupelelechezya
13Yimililani ichete, simpisyania mwisuwilo, musinge, muwe namaka. 14Vyonsi vino mukuchita muwachita nulukundo.
15Mwamanya ivyakwe Stefano nichiwanza chakwe; awali wantu wakutalichila ukutontolokwa ukuwa awa Klistu munsi yawa Griki, swinya wayipa kukuwombela awantu wakwe Leza. Achaleka nkuwalambilizya, wanawitu, 16mukonke awantu wamwatanye woo apaliponga nawinji wensi wino akawomba ndivino woliwo.
17Swinya nkusechela nukwiza kwakwe Stefano, nu Fortunato, nga nu Akayiko, wane wiza kwenene chingatenga mwemwe mutizile; 18wateka umwezo wane munda, ndivino namwenye wawatesile imyezo munda. Awantu wamwatanye woo wazipila ukuwanzwa.
19Ama Klezia yamuchipya chansi yamwe Asia yakuwalamuka; e Akwila nu Prisila apaliponga ni Klezia lino likawungana munga'nda yawo likuwalamuchila mwakwe Klistu. 20Nawanawitu wonsi koo wakuwalamuka.
Lamukananji nukukukulana kwawunyina.
21Anenenye ne Pauli nkuwawalichila nikasa lyane, nkuti Nenenye ne Pauli nkuwalamuka.
22Ndi umuntu wumwi atakunda Imfumu—ndi atipwe!
Maranatha—kuno akuli kuti Zanga Mfumu yitu!
23Imfumu e Yesu awawafwila inkumbu.
24Ulukundo lwane luwe namwe mwensi mwakwe Klistu Yesu.
Currently Selected:
1 Wakorinte 16: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
