2 Wakorinte 2
2
1Achaleka nelenginie: kuno chitalinji achizima ukuti njize koko swinya mbape amalanda. 2Amuno ndinaleka mwawa namalanda, ngachani chingansankania? Amwemwenye mwewantu mbapile uwulanda. 3Achaleka nawawalichizile kalata—ntalondanga ukwiza kwemwemwe ukuti njize imbe namalanda kuwantunye wane ingalonda wansansamusya. Amuno napanichisya ukuti ponsi pano indi nichimwemwe, namwenye mwensi mukusankananga. 4Pano nawawalichilanga kalatanye weyo nalinji nintazi mvule mumwezo mbali nichilanda, naminsozi mavule, ntalondanga ukuti muwe namalanda, ukuwa nakasi mumanye vino nawakundisya mwensi.
Muwatetela wano wakuwafyenga
5Kanonzi, ndi umuntu wumwi akuleka umuntu muwuye awa namalanda, ye atachitila nene ukuwa atela wawachitila mwemwe mwensi; pamwi inti wachitila wamwi awakwe mwemwe, amuno nsinakulonda ukumukalaluchila nkani. 6Ampela uk usundwanye kuno umuntunye weyo wasunzilwe nawavule awakwe mwemwe chasila. 7Achaleka aleni fwandi, mwazipila mumutetele swinya mumusimpisye, alyakuti mumusansamusye atize alale walechelezya. 8Achaleka mwazipila ukuti mumulanjizye kuno mwamukunda molimonye. 9Chochonye chino chalesile mbawalichila kalata: nalondanga ukuti mbelezye indole ndi mukatontela amazwi yane. 10Ndi mukutetela wumwi wino akuwifya, naninye ntela namutetela. Amuno ndi namutetela—ndi nachawuzimanye avino nazipila ukuchita ntela namutetela vyonsinye—muno amwemwe, pankolelo pakwe Klistu, 11ukulesya Satana ukutwilichizya; amuno twamumanya vyonsi vino akalonda ukuchita.
Achisakamika Pauli nkaninye mukaya kakwe Trowasi
12Nalanga pano nafika mwe Trowasi kukuyawizya Ilandwe Zima ilyakwe Klistu, nzana kuno Imfumu iyolozile inzila kali iyakuwomba umulimo wakwe kweneko. 13Ukuwa napangamile nkaninye amuno ntazanile umwanawitu e Taitasi. Achaleka ndaya awantu wakweneko, ndaya ku Makedonia.
Ukuchimvya kwitu kwawela mumaka yakwe Klistu
14Twazipila ukusalifya Leza! Mwakwe Klistu-nye amuno Leza akatusapulila muwuzya atumukonka atuwalafya. Leza awino akaleta ukuti tuwasasya Ilandwe lyakwe Klistu konsi-konsi, likwile ngati alifungo nunchile. 15Amuno tuli ngati alifungo nunchile ilyawubani wuno Klistu akochelanga Leza, lino likatambilila wane wakutulwa nawano wakusowanye. 16Amuno kwe wane wakusowa, weni ifungonye lyolyo alifungo wole lino likakoma; ukuwa kwe wanowatulwa, weni alifungo zima lino likapa uwumi. Ngafwandi weweni wino wachinchila ukuwomba umulimonye woo? 17Swenji tutakolana tusi ndivino awantu wanji awavule, wane wakalemela amazwi yakwe Leza kukanyanyangala ngati avintu vyawuzi wutichi; ukuwa muno we Leza awino watutuma, tukuvwanga nukusimichila konsi pakwe weliwe, muno swewawomvi wakwe Klistu.
Currently Selected:
2 Wakorinte 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
