1 Peter 4
4
Imiwele mipya
1Muno Klistu wayimvile kumuwili, namwenye fwandi mwazipila muwalemasya mumyezo yinu muwakw izuka ukuyimba kwakwe; amuno wensi wino akuyimba kumuwili atela asi nuluwembu. 2Achaleka fwandi ukufumilila kanonzi ukuya kunkolelo, mwazipila muwulanzi winu wuno wasyala uwamunsi moo muwatungululwa nukulonda kwakwe Leza, ukulonda kwamuwili pole. 3Amuno yawa ampindi ntali pano mwanda mukachita vino imintamanya Leza ikachita. Wakonkanga ukukulungana nukulonda kuwipe, ukukolwa, nutuwukutwe, nukung'wa kwakuyitopwa, mbali numwata wuwipe uwakupepa amakolania. 4Achaleka kanonzi amakandi yakazunguka muno mwaleka ukuyisanzya kumyata yawunyamana iyamiwele miwipe, wakawakwelengula nukuwakwelungula. 5Ukuwa waliyiluwululila imilimo yawn pakwe Leza, wino alipanzya awapuma nawafwe. 6Amuno akwakwe chonye-choo achino Ilandwe zima lyawizizizwe nawafwenye, wawo wane wapanzizizwe kumuwili ndivino awantu wonsi wakapanzwa; Ilandwe zima lyawizizwe nakwakwe woliwo alyakuti imizimu yawo iwe ndivino Leza ali.
Wakasunga wazima wavyawila vyakwe Leza
7Insilo yavintu vyonsi yapalamila. Achaleka muteke imyezo munda musinge, muwe namaka yakupepa. 8Ukulutilizya ivintu vyonsi, kundananji nkaninye, amuno ulukundo lukavwimbila amawembuko mavule. 9Muwapochelelana mung'anda zinu, nanti kukwinuluka. 10Wensi wapochelela ichawila chimwi kwakwe Leza achaleka wazipila ukuchiwombela kukuchitila wanji ivizima ukuti awe amuwomvi musuwilwa wakwe. 11Wensi wino akuwizya ale awawizya amazwi yakwe Leza-nye; wensi wino akupakata, ale awapakata namaka yano Leza wamupa, alyakut muvintu vyonsi Leza awachindamichilwa mwakwe Yesu Klistu, wino uwukankala namaka avyakwe penye. Amen.
Ukuyimba kwa wa Klistu
12Viwuza vyane, mutize muwazunguka kukwelezwa kwakuyimba kwinu, muwalola ngati achintu chinji chawaponela. 13Ukuwa zewelanji amuno mwewakankana wakuyimba kwakwe Klistu, alyakuti mwize mwizule nichimwemwe pano ukuchindamikwa kwakwe kwiza kwaloleka. 14Mwewalongo ndi mukukwelengulilwa muno we Klistu; choo chikusula kuno ukuchindamikwa kwakwe Muzimu, e Muzimu wakwe Leza, awino ali pakwe mwemwe. 15Ukuwa wumwi uwakwe mwemwe atize awayimbila uwuchikoma wakwe, pamwi uwung'o wakwe, pamwi uwusimusoka, pamwi ukuwa numone pamulimo wakwe wanji. 16Ukuwa ndi mukuyimba amuno mwe wa Klistu, mutize muwafwa insoni, ukuwa muwasalifya Leza muno mwasenda izina lyakwe Klistu.
17Impindi yakupanzizwa yapalamila, yino awantu wakwe Leza-nye nalwakwe awano walitalichila ukupanzwa. Ndipanzyo lyatalichila pakwe sweswe, nga ye chiliwa wuli kwakwe wawo wane wakana ukusuwila Ilandwe zima lino lyafuma kwe Leza? 18Ndivino amawaliko mate le yavwanga yati,
Ndi chatalila awantu wazima ukutulwa;
ngafwandi, chiliwa wuli kuwantu wane watamanya Leza awawembu?
19Achaleka fwandi, wane wakuyimbila ukulonda kwakwe Leza, wazipila ukulanjizya imilimo yawo imizima kuno wakusuwila Katumbula wawo, wino akafisya ilayilizyo lyakwe nanti kupotwa.
Currently Selected:
1 Peter 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
