1 Peter 3
3
Awanachi nawalume
1Avino namwenye mwewanachi tontelanji wawakwinu, alyakuti ndiwumwi asinakutontela amazwi yakwe Leza, asuka asuwila muno amyata yinu. Kusi akukuvwanga, 2ukuwa wayilolele akakope nimyata yinu. 3Mutize muwayiyemvya nukuyemba kwakulonde ukwakuluka inyele, nukuzwala iviyembwa, nanti akusakamikwa nivyakuzwalazwala. 4Ukuwa, lekani ukuyemba kwinu kuwe akwakusimichila ukwamukasi-kasi, mumyezo, ukuyemba kwamwezo wuno watekana kusisila swinya akwawuzi wukulu pankolelo pakwe Leza. 5Amuno kali awanachi wane wayipile kwe Leza, awamusuwila, awalanga wakuyiyemvya wonye-woo, awalanga wakutontela awalume. 6Ndivino Sera walinji; watontelanga Abrahamu nukumwita ukuti, Tatakulu. Namwenye kanonzi mwewanakwe ndachino mukuchita ichete nanti kutina chimwi.
7Namwenye mwewalume, yikalanji nawawakwinu ichete muwamanya kuno awanachi watonta kumuwili. Achaleka mwazipila muwawachindika, amuno nawonye walipochelela, apaliponga namwe, ichilambu chakwe Leza ichawumi. Muwachita wowonye alyakuti amapepo yinu yatize yafundichilwa.
Uwuzima wukaletelela
8Pakupelelechezya: muwe mwewamwezo wonga namelengan ia ayaliyonga; muwakundana ngati mwewanyma, muwawelana inkumbu nukuyichefya. 9Ndi wumwi wawawifya mutize namwe mumuwifye; pamwi ndi wumwi wawatuka mutize namwe mumutuke; ukuwa mwenji muwawapepela amuno kwakwe chonye-choo akuno Leza wawitila. 10Ndivino amawaliko matela yavwanga yati,
Wensi wino wakunda uwumi
swinya akalonda ukulola amanda mazima,
wazipila ukufuntuka kukuvwanga iviwipe nukuwipa uwufi.
11Wazipila ukuleka ukuchita uwuwi awachita ivizima;
ndi alange akavwamba umutende awawukonka.
12Amuno aminso ya Mfumu yali pawalungamane
akulanga akuteyelezya kumapepo yawo;
ukuwa akafontomochela wane wakachita uwuwi.
13Ngaweni angawachisa ndimukuchita ichete? 14Ukuwa ndi mukuyimbila uwulungamane peni ye mwewalongo! Mutize muwatina awantu, nanti akupangamala mutize muwapangamala. 15Ukuwa yimichilani Klistu mumyezo yinu, muleke awe a Mfumu yinu. Swinya muwayisengania mukutolelela wonsi wane wakulonda ukuti muwalandile ivyakulolela kwisuwilo linu. 16Muwawatolelela numuchinzi mbali nakakope. Muwayipanzya ichete, alyakuti wawonye wane wakuwakwelengula nintusi, wane wakuwavwanjila uwuwi muno mwewasuwizi wakwe Klistu muwasonzye insoni kwakwe vino wakuvwanga. 17Amuno chazipa chalusya ukuyimbila uwulungamane, ndi avino ukulonda kwakwe Leza avino kungawa ukulusye ukuyimba pano mwawifya. 18Amuno nu Klistu-nye watela wawafwila, wawafwila kuluwembu lwinu lyonga-nye nsu, umulungamane wafwila awawembu, alyakuti awakolelele kwakwe Leza. Wakomilwe kumuwili, ukuwa azyulupulwa namaka ya Muzimu, 19swinya mu Muzimu amuno wayile awizizya imizimu yino yalinji muvingololo. 20Imizimunye yoo ayino kali itatontelanga Leza, pano wasulanga mumanda yakwe Nowa pano wawazanga uwato. Muwato mwalinji awantu watichi—wonsi ponga walinji kananimonsi—wawonye awano aminzi yawatuzile. 21Avino chili nibatizyonye, alili lino likawafyusya kanonzi, Kusi akupwizya iviko vyakumuwili, ukuwa alilayilizyo kwakwe Leza ilyamelengania mazima. Likawafyusya muno akuzyulupuka kwakwe Yeau Klistu, 22wino waya mwiyulu swinya wikala kwikasa lyandilo ilyakwe Leza, akupanzya awangeli wonsi nizyamfumu nawakapanzya wamwiyulu.
Currently Selected:
1 Peter 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
