1 John 3
3
Awanakwe Leza
1Silolani wino Umukwasi watukunda! Ulukundo lwakwe lwakulisya achino tukakwitwa swewanakwe Leza— wowonye, avino tuli. Achaleka awamunsi watatumanya: muno nu Leza-nye watamumanyile. 2Wakundwe wane, kanonzi swewanakwe Leza, chitani chimanyikwe ichete-chete vino tuliwa. Ukuwa twamanya ukuti ndi Klistu wizawiza, tulimukola, amuno tulimulola vino ali. 3Umuntu wensi wino ali nisuwilo lyoo mwakwe Klistu akuyitelefya, ndivino Klistu amutele.
4Wensi wino akachita uluwembu ayonona isundo lyakwe Leza; amuno uluwembu akuchila kwisundo. 5Mwamana kuno Klistu wizile kukusenda uluwembu lwawantu, mwakwe weliwe musi uluwembu. 6Achaleka wensi wino akakwikala mwakwe Klistu asilandalila muluwembu; ukuwa wensi wino akalandalila muluwembu asitela amulole nukumumanya atamumanya.
7Wanawatichi, atize wumwi awawachenjezya! Wensi wino akachita ichete amulungamane, ndivino Klistu amulungamane. 8Wino akalandalila muluwembu awakwe Satana, amuno Satana wawembusile ukufumilila pakutalika. Chochonye chino Umwanakwe Leza wizizile, alyakuti ayonone imilimo yakwe Satana.
9Wensi wino amwanakwe Leza asilandalila ukuchita uluwembu, amuno imiwele yenecho iyakwe Leza ili mwakwe weliwe; swinya muno Leza we Yisi, atanga alandalile nukuwembuka. 10Mwakwe chonye-choo amuno awanakwe Leza nawanakwe Satana wakamanyichila: wensi wino asichita ichete, pamwi atakunda umunyina, atela asi amwanakwe Leza.
Kundananji
11Amazwi yano mwivwile ukufumilila pakutalika-talika ayakuti tuwakundana. 12Tutize tukolane nu Keni; wino walinji awa Muwipe, wakomile umunyina. Ngamuno chani chino Keni wakomezile umunyina? Amuno imilimo yakwe yalinji amiwipe, ukuwa imilimo yamunyina yalinji amizima.
13Achaleka mutize muwazunguka, wanawitu, ndi awamunsi wawapata. 14Twamanya kuno twalufuma kumfwa twaya kuwumi; muno twakunda awana witu. Wensi wino asi nulukundo achili ali mumfwa. 15Wensi wino akapata umunyina wechikoma; mwamanya nukumanya kuno chikoma asi nuwumi wamuyayaya. 16Kwakwe chonye-choo akuno twamanyila ulukundo: Klistu watutayila uwumi wakwe. Naswenye fwandi twakana tuwatayila awanawitu uwumi witu! 17Ukuwa wino wachindama alanga akulola umunyina wasowelwa, ukuwa nanti kulanguluchila umunyina, nga angayinena wuli ati Nakunda Leza numwezo wane wonsi? 18Wanane! Ulukundo lwitu lutize luwe amazwi yapamulomo patupu; ukuwa lwazipila aluwa alukundo lwakusimichila, luno lukaloleka kwe vino tukachita.
Insimpo pankolelo pakwe Leza
19Amuno akwechonye-choo akuno tulimanyichilwa kuno swe wakusimichila. Mwakwe chonye-choo amuno tungapalamila kwakwe Leza nanti ntwitwi. 20Amuno ndi tuli nintwitwi, peni twamanya kuno Leza wakula walusya amelengania yitu, swinya wamanya nivintu vyonsi. 21Achaleka, wakundwe wane, ndi tusi nintwitwi, atutela tuli nukusinga pakuya papipi nu Leza. 22Tukapochelela chonsi chino tukalenga, amuno tukatontela amasundo yakwe swinya tukachita ukulonda kwakwe. 23Avino watukomelezya: ukuti tuwasuwila mwizina lya Mwanakwe e Yesu Klistu mbali nukukundana, ndimuno Klistu watukomelezezya. 24Wensi wino akatontela amasundo yakwe Leza akakwikala mwakwe weliwe nawe mwakwe weliwe. Mwakwe chonye-choo amuno tukamanyila kuno Leza akakwikala mwakwe sweswe: twamanya amuno watupile Muzimu.
Currently Selected:
1 John 3: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
