1 John 4
4
Umuzimu wakusimichila numuzimu wawufi
1Wakundwe wane: mutize muwasuwila imizimu yonsi, ukuwa yelezyanji umuzimu ndi wafuma kwe Leza. Amuno awatumwa wavule wasatila munsi. 2Akuno mwandi muwamanyila ndi amuzimu wakwe Leza: uwamuzimu wensi wino akavwanga palwenze kuno Yesu Klistu wizile ngati amulawa atela ali numuzimu wuno wafuma kwe Leza. 3Ukuwa wensi wino akukana vyonyevyoo ivyakwe Yesu atela asi numuzimu wuno wafuma kwe Leza. Wowonye ye amuzimu wuno wafuma ku Mulwani wakwe Klistu; awuno mwivwa kuno wuliyiza, nakanonzinye wiza munsi kali.
4Wanane, mwenji mwewakwe Leza, mwachimvya awatumwa wawufi; amuno Umuzimu wuno wuli mwakwe mwemwe wuli namaka makulu ukulusye umuzimu wuno wuli mwakwe wano wakunda ivya munsi. 5Wakavwanga ivyamunsi nawamunsi wakawateyelezya muno awamunsi. 6Ukuwa swenji swe wakwe Leza. Wensi wino wamanya Leza akatwivwa; wino asi awakwe Leza asitwivwa. Kwechonye-choo, akuno tukamanyila Umuzimu wakusimichila nga numuzimu wavye.
Leza we lukundo
7Wakundwe! Ndi tukundane: amuno ulukundo lwafuma kwe Leza. Wino ali nulukundo atela amwanakwe Leza, swinya atela wamumanya nukumumanya. 8Wensi wino asi nulukundo atela atamanya Leza, amuno Leza we lukundo. 9Mwakwe chonye-choo amuno Leza walanjizizya vino watukunda: Leza watumile Umwanakwe emusyupu munsi alyakuti tuwe nuwumi mwakwe weliwe. 10Avino ulukundo luli: asi amuno twakunda Leza, ukuwa amuno weliwe watukunzile atuma Umwanakwe wino mwakwe weliwe uluwembu lwitu lukatetelwa.
11Wakundwe, ndi Leza watukunzile wonye-woo, naswe twakana tuwakundandana. 12Pasi wumwi wino akatela alola Leza: Ndi twakundana Leza akakwikala mwakwe sweswe nulukundo lwakwe lwavulisya mwakwe sweswe.
13Mwakwe chonye-choo amuno tukamanyila kuno tukakwikala mwakwe Leza nawe mwakwe sweswe: watupa Umuzimu wakwe. 14Swinya twalola nukunena wanji kuno Umukwasi watumile Umwanakwe kukwiza tula awamunsi. 15Wensi wino akuwumbula Yesu a Mwanakwe Leza, Leza akakwikala mwakwe weliwe, nawe mwakwe Leza. 16Swinya sweswenye nalwitu twamanya twasuwila nukusuwila ulukundo luno Leza watukunda.
Leza alukundo, nawensi wino akwikala mulukundo atela akwikala mwakwe Leza, nu Leza akwikala mwakwe weliwe. 17Chino ulukundo lwavulisya mwakwe sweswe alyakuti twize tusimpe pawanda wipanzyo; twize tuwe ninsimpo amuno uwumi witu munsi moo wakolana nuwakwe Klistu. 18Mulukundo musi intete; ulukundo lwakusimichila lukawinga intete. Achaleka fwandi, wino akatina asi nulukundo luno wafika pakafiko, amuno awantete akatina ukusundwa.
19Twakunda amuno Leza watalisile atukunda. 20Ndi wumwi akuti, Nakunda Leza, ukuwa akupata umunyina, wechawufi. Amuno atanga akunde e Leza, wino atalola, ndi atakunda umunyina, wino akamulola. 21Achaleka tuli nisundo lino Klistu watupa; ilyakuti wino wakunda Leza akunde numunyinanye.
Currently Selected:
1 John 4: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
