1 John 2
2
Klistu wekavwa witu
1Wanane, nkuwawalichila Ivintu vyonye-vyoo alyakuti mutawembuka; ukuwa ndi wumwi wawembuka, tuli nu Yesu Klistu, umulungamane, wino akatulambilizizya ku Mukwasi. 2E Yesu-nye umwenecho awili wino mwakwe weliwe tukatetelwa uluwembu lwitu, sweswe swenga pole, ukuwa nuluwembu lwawantu wonsi.
3Ndachino tukutontela amasundo yakwe Leza, peni tungapanichisya kuno twamumanya. 4Ndi wumwi akuti, Namumanya, ukuwa nanti kutontela amasundo yakwe, umuntunye weyo atela wechawufi nukusimichila kusi mweweliwe. 5Ukuwa wensi wino akutontela izwi lyakwe weyonye awino wakundisya Leza wafika napakafiko. Chochonye achino chikatupanichisizya kuno tuli mwe Leza: 6Wensi wino akuti akakwikala mwe Leza wazipila ukuwa ndivino Yesu Klistu walinji mumyikalile yakwe.
Isundo-pya
7Wakundwe wane, isundonye lyoo lino nawawalichila lisi ali pya; ukuwa alikali, lino mwalinji nalyo napakutalikanye. Isundo kali amazwi yano mwivwa kali. 8Ukuwa naponye, isundo lino nawawalichila alipya, lino ukusimichila kwakwe Iyolilyo kwaloleka mwe Klistu swinya nakwakwe mwemwe. Amuno imfinzi ikupita, nukuwala kwakusimichila koo kulipo.
9Wensi wino akuti ali mukuwala, ukuwa wapata umunyina, atela achili mumfinzi nakanonzinye. 10Wensi wino wakunda umunyina akakwikala mukuwala, nichakupunuzya wumwi chisi mweweliwe. 11Ukuwa wensi wino wapata umunyina atela ali mumfinzi; atela amuno akapita nanti kumanya nakuno akuya, amuno imfinzi yamufumpa paminso.
12Wanane, nkuwawalichila, amuno amawembuko yinu yatetelwa muno alizina lyakwe Klistu. 13Nkuwawalichila mwemwe, watata, amuno mwamumanya wino walandalila ukufumilila pakutalika. Nkuwawalichila mwemwe walumendo, amuno mwachimvya u Muwipe.
14Nawawalichila mwemwe, wana watichi, amuno mwamanya Tata. Nawawalichila mwemwe, watata, amuno mwamanya wino walandalila ukufumilila pakutalika. Nawawalichila mwemwe walumendo, amuno mwawoma nizwi lyakwe Leza Iyikala mwakwe mwemwe mwachimvya nu Muwipe.
15Mutize muwakonchelela wano wakakana Leza munsi nanti kuvwamba ivintu vyamunsi. Ndi wakunda wano wakakana Leza munsi, ulukundo lwa Mukwasi alutela lusi mwakwe wewe. 16Vyonsi vino wano wakakana Leza wakachita munsi—ivyakulonda kuwipe ukwamuwili, vino awantu wakalola awavikumbuchila, nivintu vyonsi ivyamunsi vino awantu watumbila—vyoo visifuma ku Mukwasi; ukuwa avyakwe wano wakakana Leza. 17Insi navyonsi vino vili mwenemo vino awantu wakakumbuchila vilizimanjika; ukuwa wensi wino akachita ukulonda kwakwe Leza alilandila.
Umulwani wakwe Klistu
18Wanane, insilo yapalamila! Ndimuno mwivwila kuno umulwani wakwe Klistu akwiza; nakanonzinye awalwani wavule awakwe Klistu wakatuka, achaleka twamanya kuno insilo yapalamila. 19Nachawuzimanye awantunye waa watalinji awamwiwumba litu, achaleka watusile; ndiwatele walinji awitu, wanga walange wali naswe. Ukuwa wafumile alyakuti chimanyikwe kuno patalinji wumwi uwakwe woliwo wino walinji awitu.
20Ukuwa Klistu wawapungulizile Muzimu Mwimichile, achaleka mwensinye-pyu mwamanya ukusimichila. 21Nsinakuwawalichila, muno mutamanya ukusimichila; ukuwa amuno mwamanya ukusimichila, swinya mwamanya kuno uwufi wusifuma mukusimichila.
22Ngafwandi, chawufi weweni? Chawufi awino akutanji Yesu asi we Klistu. Weyonye awili Mulwani wakwe Klistu —akakana wonsinye Umukwasi nu Mwana. 23Amuno wensi wino akakana Umwana atela akukana Umukwasi; nawino akupochelela Umwana atela kupochelela nu Mukwasinye.
24Ukuwa panichisyani, musunge mumyezo yinu amazwi yano mwivwile ukufumilila pakutalika. Ndimwasunga vino mwivwile ukufumilila pakutalika, peni muliwakwikala apaliponga nu Mwana nu Mukwasi. 25Chonye-choo achino e Klistu-nye nalwakwe walayilizya ukupa—uwumi wamuyayaya,
26Nawawalichila vyonye-vyoo ivyakwe wano wakulonda ukuwachenjezya. 27Ukuwa mwenji, Klistu wawapungulila Muzimu. Naponsi pano Muzimu ali namwe, mutanga muwafwa nukuti muwalonda wumwi uwakuwasambilizya. Amuno Umuzimu wakwe awuno wukawasambilizya ivintu vyonsi, navino akasambilizya avyakusimichila, nanti wufi. Tontelanji isambilizyo lya Muzimu, ngapano muwakwikala mwakwe Klistu.
28Molimonye, wanane, yikalanji mwakwe weliwe, alyakuti ndiwiza wiza twize tusimpe nanti kuvwama muno ansoni pawanda wuno aliyiza. 29Mwamanya-nye kuno Klistu amulungamane; achaleka fwandi mwazipila ukumanya, kuno wensi wino akachita ichete atela amwanakwe Leza.
Currently Selected:
1 John 2: WWN82
Highlight
Copy
Compare
Share
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
