2 Timothy 2

Ataasiighmetelleq Christ Jesus‑mun

1Enkaangam elpek ighnemni, iknaqi atuqelleghpegun piniqellgha Christ Jesus‑em. 2Elpeklu tawantutkatlu nagatkaqasi apeghtuusanka. Enkaam apeghtuusanka neghyukutiki ataasiighmelngughnun. Taagken ellngita apeghtuusaqlegulleqiit ilameggnun.

3Ikfiqelgusighqut pinilghiitun pilluwaghtengatun Christ Jesus‑em. 4Pilluwaghtem ilatngalghiim pilluwaghtenun efqughsugaqaa umiileni, enkaam akumghhuusigatuq pilluwaghtengunghilnguut kiyaghtaallghitnun. 5Kayaalqiiraaghta kilgaaqumun malighqutaqenghilkumi liilightuusameggnun, allgeghunnaanghituq qaghpanganeng kayaalqiistem. 6Ughleghiighllakaq piitesighaghta nengighyuwhaaghyaghqaaguq unataqata. 7Sumeghtaaghaatkiki sameng pillghenka qayughllak Atanghem liigiksagutesleqaaten sameng tamaghhaaneng.

8Neqamikluku Kiyaghneghem unguvaghtestekaqaa Jesus Christ‑a tuqulleghmeng, kingunqaa David‑em. Tamaakunguut ungipaqaqegkenka apenemki Pinilghiit Ungipat. 9Ikfiqnguunga qayughllak ungipaqegkenka Pinilghiit Ungipat. Talwa qiipraghusighlunga ayuqunga liilightuusameng naafqiistetun. Iwernga akuzitangi Kiyaghneghem qiipraghutngitut. 10Enkaam ikfiqusiqsugluku ayuqaqa sangwaa tamaghhaan Kiyaghneghem nakmikegkii yugulillengesqelluki Christ Jesus‑kun. Yugulilleghmegteggun nighughqellengellequt kenlengilngughmeng.

11Maakut pillghet ipanguut: Tuqulgusiimakumteggu, kiyaghtelgusighlleqaghput. 12Iilqayunghilkumta, igleghutilgusighlleqaghput. Nallunqegkumteggu, ellnganllu nallunqelleqiinkut. 13Ataasiighmenneghilkumta, ellnga ataasiighmetaquq qayughllak taaqnaanghituq ataasiighmenneghmeng.

Itagnaqegkaq Qepghaghta

14Kitumun alngunak puygustegpenaki tamaakut. Kiyaghneghem nagasimanghani, kelengasaaghqi qaniqututkefqiita akuzitet pisqelluki. Qaniqutellghat kayutngunaanghituq, naafqengnginaghlleqaat ugpeqillghat nagallghiit. 15Taakunginaghhaagneng qepghaa Kiyaghneghmun itagnaqesqelluten. Qepghaghtengu kayngukingigalnguq qepghaqamineng. Elqughaghllukullu apeghtuusaqigu Kiyaghneghem ungipaghpigaa. 16Iqitngaluten temngitwhaneng, sameng pisiinghilngughneng aleghquutelleghneng. Tawatelnguut aleghquutellghet uyavaataghaghlleqiit yuget Kiyaghneghmeng. 17Tawatelnguut temngitwhat apeghtuusat aqnighneghestun ayuqut mingitkayuget maamyaghqaanghilnguut. Hymenaeus‑enkuk Philetus‑enkuk apeghtughillghik tawatelnguugut. 18Pegtekaqiik apeghtuusapiget qayughllak piiquk siingenllu tuqukat unguvaghtesimaniluki. Enkaam ilangitnun ugpeqnanightestekaqaak ipapilleq. 19Iwernga ayugilnguq tunemaq Kiyaghneghem nekegtekaa qapragtepagningituq. Taaggun tunemakun igaqngaat akuzitet:

“Atanghem liisimakii ellmi pini.”

Whatenllu igaqngaaq,

“Kina alngunak tuqlughilghii aatghaneng Ataneghem, seghletun pineghmeng taaqli.”

20Mangteghaghllagmi allaaghhiinaghmeng salghutaghtuuq: ilangi ulimaaghuut gold‑meng, silver‑meng, unaghsimeng, qikumengllu. Ilangi salghutat megnunalghiinun atuugut, ilangi samun alngungak. 21Kina alngunak ellmineng katam pelungighsaqumi seghleghmeng, salghutaghtun atughqaaghllequq megnunalghiimun. Aaftekaaghllequq atuuluni mangtegham yuganun. Taagken atughqaaghllequq alngunak pinilghiimun qepghaqamun. 22Iqitngaluten sameng seghleghmeng anglinghhat atuqsugaqegkangitneng. Quunpeng atuqaqigu elqughutngalleq. Ataasiighmelluten, piniqingaluten, nekeggmellutenllu. Tamaakut atuqiki, maligulluten tuqlughilghiinun Ataneghmun qamaken pelungilngughmeng ilumeggneng. 23Iqitngaluten temngitwhaneng aleghquutellghitneng yuget akuzitkilghiineng liigikumangilkemeggneng. Liisimakaten aaghtiiraaghutestikayuguut. 24Atanghem qepghaghtenga aaghtiiraaghtengunghituq. Itupill nangllegtaghyaghqaaguq tamanganun. Pinilghiinguyaghqaaguq apeghtughista. Nuqenneghtuyaghqaaguq. 25Atanghem qepghaghtenga kavyugisaghqaaguq apeghtughikumi kipullginaalghiinun. Walluumllu Kiyaghneghem avuteghqestaqliki ugpeqesqelluku ipapilleq. 26Enkaam liisaaghaghyaqumeng anagnayaghaat Tughneghaam negaghaa. Tughneghaam naapsimaneghminiki aaghqutaqaqii.

Currently Selected:

2 Timothy 2: ess

Highlight

Copy