2 Timothy 3

Kinguliit Aghneghet

1Liisimakesugamken kingulighni aghneghni seghleliighllaguyaghqaaguq. 2Yuget ellmeggneng piniqellequt, maniyuneghtullequt, yamrratullequt, aangaayugllequtlu. Seghlequughlleqiit ilateng, qaatkennaanghitiit angayuqateng, iqamsiqayugnaanghitut, waaknanighlleqaatlu Kiyaghneq. 3Piniqinaanghitut, seghevutinaanghitut, iqlengiqutkillequt, suugllugullequt, amyuqetiqellequt, ugumikelleqaatlu sangwaa alngunak pinilghii. 4Uveghpagulleqiit ilateng, nangyiighullequt, qukaayugteghllagllequt, teghigniqelleq piniqataghaghlleqaat pakiggulluku Kiyaghneghmeng. 5Qaaymegteggun ugpeqaayugllequt, iwernga kiyaghtaallghita apeghlleqaat avangitulngi Kiyaghneghem aghtughyaghqaanghillghaneng. Iqitngaluten tawatelngughneng yugneng. 6Ilangi tamaakut nenun iitghaataghllequt aaghqutaqepigesnaghnaluki nallekaghnilnguut aghnat. Tamaakut aghnat seghleghqellghita uqigtuqusighllaglleqii, seghleghemllu piyukellelghutngita aaghqutaqelleqii. 7Tamaakut aghnat nagallequt apeghtughillghanun kitum alngunak, taawanginaq liinnaanghitaat ipapilleq. 8Tamaakut apeghtughilghiit ellngitnun kipullginaaghlleqaat ipapilleq, katam Jannes‑enkuk Jambres‑enkuk kipullginaallghegketun Moses. Umyugaghlluugllequt, ugpeqillghatlu ipangunghillequq. 9Iwernga tawaten pillghat mulunaanghituq. Temngitwhallghat aliillequq tamanganun, katam Jannes‑enkuk Jambres‑enkuk temngitwhallghak aliitngallghatun.

Paul‑em Kinguliit Apeghtuusii

10Iwernga elpek liisimakngwaaghaten apeghtughillghenka, kiyaghtaalqa, apallaallu kiyaghtelleghma. Liisimakanllu ugpeqilqa, iilqayunghitelqa, piniqilqa, aghuliilkaamalqa. 11Liisimakan amyuqetaatkesilqa, ikfiqelqallu. Liisimakan tawaten pikaqaatnga Antioch‑mi, Iconium‑emi, Lystra‑millu. Uglaghngaan amyuqetaatkellengegkaagunga, tawalliima Atanghem yugulikaqaanga tamaghhiitneng. 12Tamaghhaghmi amyuqetaatkellengellequq kiyaghsulghii Kiyaghneghem piyukellghatun Christ Jesus‑kun. 13Seghleghet yuget, puughtistetlu, seghleghughtaghaghllequt. Puughqughllequt, ellngitlu puughtellengellequt. 14Iwernga elpek atuqumanginaghqi apeghtuusat liitkaghten, ugpeqepiikaghten. Liisimakaten ipangutangi, qayughllak liisimakaten kinkungutangi apeghtughistekegkaghten. 15Ima taghnughhaategpeneng liisimakegkaqaten agleghnalghiit Akuzitet Igaqegkat. Akuzitet Igaqegkat apeghtughyaqlegwaaten yugulilleghqameng ugpeqilleghpegun Christ Jesus‑kun. 16Qamaglluteng Akuzitet Igaqegkat Kiyaghneghem aneghziilqii. Enkaam apeghtughisighqaagut, aghyuughusighqaagut, nallghusaasighqaagut anaggutelleghmun, apeghtughisighqaagutlu pinitun kiyaghtaalleghqamun. 17Enkaam atuqluki Akuzitet Igaqegkat, Kiyaghneghem qepghaghtenga peghqigsaghwaaghngallequq, yataaghqengngallequqlu tamaghhaanun aneghneghqilleghmun.

Currently Selected:

2 Timothy 3: ess

Highlight

Copy