2 Timothy 1
1
Paul‑em Tuungliit Latangi Timothy‑mun
1Ukut latat Paul‑meng pinguut apostle‑nganeng Christ Jesus‑em Kiyaghneghem piyukellghakun. Kayagtekaqaanga aapghesqelluku akequsaqegkaq unguvalleq Christ Jesus‑melnguq.
2Timothy‑mun piniqepigtekamnun ighnemnun. Kiyaghneghem Atam, Christ Jesus‑emllu Atanemta quyasliten, nangllekliten, nekeggmellelguslitenllu.
Iqamsiqayulleqlu Kayemelleqlu
3Unugtuumaan, aghneghtuumaan yughallemkun iqamsiqayugvikaqaqa Kiyaghneq elpeneng. Qepghaataqaqa seghleghyullngunanga, katam sivunemtun. 4Esghaghyupigtaqamken allameng, qayughllak neqamikaqa pellghututaqngamtung qiyakaalghiiten. Enkaam quyaghllagllequnga qerngughunneqigtekumtung. 5Neqamikaqa ugpeqillepiigen. Taananguuq ataasiq ugpeqilleq nengyughpek Lois‑em, naagpeklu Eunice‑em atuqegkangak. Liisimakngwaaghaqa elpeklu atuqngwaan. 6Tamaaken apalluqluku neqangughsugamken, atuqumanginaghhu tunusan Kiyaghneghmeng, tuunegkaqaa iigtighaqngamken. 7Kiyaghneghem taghneghalitellghitiinkut alingyugnalghiimeng. Itupill Taghneghagkenka imiqaqiinkut aghtughyaghqaanghilleghmeng, piniqelleghmeng, nuqetelleghmengllu.
8Kayngukegpenaan ungipaqigu Ataneghput, talwa kaynguyagutegpenanga anusimingllaghaagunga Christ‑a apalluqluku. Itupill aghtughyaghqaanghillghakun Kiyaghneghem ikfiqelgusighnga Pinilghiit Ungipat apalluqluki. 9Kiyaghneghem yugulikaqiinkutlu nakmikegkaqiinkutlu pelungitesqelluta. Tawaten pikaaguq apalluqluki ellmi katam uspeqellenillu piniqillenillu, nakaan qepghalleghput apalluqluku. Piniqegkaqiinkut Christ Jesus‑kun sivutghulluku piinlilleghqaan nunam. 10Iwernga whaa piniqelleni liitestaa whangkunnun tagillghakun Yugulighistemta Christ Jesus‑em. Christ‑am naafqegkaqaa tuqulleq, taagken Pinilghiitgun Ungipatgun liitestiinkut tuqungigalngughmeng unguvalleghmeng.
11Pinilghiit Ungipat apalluqluki Kiyaghneghem nakmikegkaqaanga ungipaqistengulunga, apostle‑ngulunga, apeghtughistengulungallu. 12Taakut apalluqluki ikfiqnguunga. Iwernga kaynguyunghitunga qayughllak liisimakaqa kinangutanga ugpeqegkaqa. Liisimakngwaaghaqa ellngan kelengaksaqlegwaa sangwaa neghyukutkaqa ellnganun kenlanga kingulighmun Aghneghmun. 13Maligtiki apeghtuusapiget nagaquqaghten whangamneng. Usputaagut atughqaqaten. Apeghtuusaqiki ugpeqilleghqunllu piniqelleghqunllu allgeghtekaqaten Christ Jesus‑meng. 14Kelengakigu ipapilleq neghyukutkaq elpenun. Kelengakigu kayutkellukek Agleghnalghiik Taghneghak kiyaghlleghhiik ilumnni.
15Liisimakan qamagtevzighluteng ugpeqat Asia‑melnguut kayusighyugnaniimaatnga, talwa Phygelus‑enkuk Hermogenes‑enkuk. 16Yughaatkengngwaanka Ataneghmun nangllegyagutesqelluki Onesiphorus‑em nengllugutangi, qayughllak uglaghngaan ilutughsaghaqaanga. Kaynguyagusimangitaallu anusimingllaghaamalqa. 17Kaataqngami Rome‑emun ivanꞌghiighutkaqaanga kenlanga naalkelleghminun. 18Ataneghmun yughaatkaqaqa Onesiphorus nangllegyagutesqelluku tawani Aghneghmi! Liisimakan kayutkeghllakaqaqa Ephesus‑mi.
Currently Selected:
2 Timothy 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
