ငဝ်ႈၵမ်ႇၽႃႇ 35

ၽြႃးပဵၼ်ၸဝ်ႈ ပၼ်တၢင်းလီယႃႇၵုပ်ႈ

1ဝၢႆးၼၼ်ႉၽြႃးပဵၼ်ၸဝ်ႈလၢတ်ႈတီႈယႃႇၵုပ်ႈလႄႈဝႃႈ၊ မႂ်းလုၵ်ႉလႄႈၵႂႃႇယူႇၵႃႈတီႈပေႇသလႃႉပုၼ်ႉတႃႉ။ ႁဵတ်းယိတ်ႈပလၢင်ႇပုၼ်ႈၽြႃးပဵၼ်ၸဝ်ႈ ဢၼ်ပေႃႇမႃးတီႈမႂ်းၼႂ်းမိူဝ်ႈဢၼ်မႂ်း ဢွၵ်ႇပၢႆႈသေၵႃႈတီႈပီႈဢၢႆႈမႂ်းဢေးသေႃးၼၼ်ႉၵႃႈတီႈၼၼ်ႈတႃႉ၊ ဝႃႈၼင်ႇၼႆဢေႃႈ။- 2မိူဝ်ႈၼၼ်ႉယႃႇၵုပ်ႈႁွင်ႉဢဝ်ၵူၼ်းႁိူၼ်းၵူၼ်းယေးတင်းလၢႆဢိၵ်ႇတင်း ၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းတင်းသဵင်ႈတင်းလူင်ၼၼ်ႉလႄႈဝႃႈ၊ ပႄႇပႅတ်ႈၽြႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ပႃးတီႈသူၸိူဝ်းၼၼ်ႉသေတႃႉ။ ႁႂ်ႈမီးတၢင်းဢၼ် မူတ်းၸၢင်ႇလႄႈ ပုတ်ႈလၢႆႈၶူဝ်းလဵင်းတႃႉ။- 3ဢွၼ်ၵၼ်လုၵ်ႉလႄႈၵႂႃႇၵႃႈတီႈပေႇသလႃႉပုၼ်ႉတႃႉႁဝ်း။ ၵဝ်တၵ်းႁဵတ်းယိတ်ႈပလၢင်ႇပုၼ်ႈၽြႃးပဵၼ်ၸဝ်ႈ ဢၼ်ဢိူဝ်ၵဝ်ၼႂ်းၶိင်ႇၵႃႇလႃႉ မိူဝ်ႈဢၼ်ၵဝ်လႆႈၶၢမ်ႇ တုၵ်ႉၶႃႉတၢင်းၽၢၼ်လႄႈ မီးယူႇလူၺ်ႈၵၼ်တင်းၵဝ် ၼႂ်းသဵၼ်ႈတၢင်းဢၼ် ၵဝ်ၵႂႃႇၼၼ်ႉ ၵႃႈတီႈၼၼ်ႈဢေႃႈ၊ ဝႃႈၼင်ႇၼႆဢေႃႈ။- 4ၶဝ်ၼၼ်ႉၵေႃႈဢွၼ်ၵၼ်ဢဝ်ၽြႃးၵူၼ်းတၢင်ႇၸိူဝ်ႉတၢင်ႇၶိူဝ်း ၵႃႈဢၼ်ပႃးမႃးၵႃႈတီႈၶဝ် တင်းသဵင်ႈတင်းလူင်ဢိၵ်ႇတင်း ၶိူင်ႈဢၼ်ပၵ်းၵႃႈတီႈႁူ ၵႃႈမီးတင်းသဵင်ႈတင်းလူင် ပၼ်တီႈယႃႇၵုပ်ႈလႄႈ ယႃႇၵုပ်ႈၵေႃႈ ဢဝ်ၽင်ဝႆႉၵႃႈတႂ်ႈတူၼ်ႈမႆႉၼိမ် ဢၼ်မီးၵႃႈတီႈႁိမ်းဝဵင်းသေႇၶိမ်ႇၼၼ်ႉဢေႃႈ။- 5မိူဝ်ႈဢၼ်ၶဝ်ၶၢႆႉတီႈၵႂႃႇၼၼ်ႉၸိုင်၊ ၵူၼ်းဝဵင်းတင်းလၢႆဢၼ်မီးၵႃႈတီႈႁိမ်းႁွမ်းၼၼ်ႉ ၵူႈတီႈၵူႈလႅၼ်ၸိူဝ်းၼၼ်ႉ ၵူဝ်ႁႄၽြႃးပဵၼ်ၸဝ်ႈလႄႈ ယင်းဢမ်ႇႁတ်းလိုပ်ႈၸွမ်းလမ်းၸွမ်းလုၵ်ႈၸၢႆးယႃႇၵုပ်ႈၸိူဝ်းၼၼ်ႉလႄႈယူႇဢေႃႈ။- 6ယႃႇၵုပ်ႈတင်းၵူၼ်းဢၼ်ပႃးလူၺ်ႈၵၼ်တင်းမၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ႁွတ်ႈထိုင်ၵႃႈတီႈဝဵင်းလူႉၸႃႉဢၼ်မီးၼႂ်းမိူင်းၶႃႇၼၢၼ်ႇဢၼ်ဝႃႈ တီႈပေႇသလႃႉၼၼ်ႉဢေႃႈ။- 7မၼ်းႁဵတ်းယိတ်ႈပလၢင်ႇ ၵႃႈတီႈၼၼ်ႈလႄႈ သမ်ႉႁွင်ႉႁဵၵ်ႈၸိုဝ်ႈတီႈၼၼ်ႈ ဢေးလႃႉပေႇသလႃႉဢေႃႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈပေႃႇမႃးတီႈမၼ်းၼႂ်းမိူဝ်ႈဢၼ်မၼ်းဢွၵ်ႇပၢႆႈသေၵႃႈတီႈပီႈဢၢႆႈမၼ်းၵႂႃႇၼၼ်ႉ ၵႃႈတီႈၼၼ်ႈဢေႃႈ။- 8တေႇပေႃးရႃႇဢၼ်ပဵၼ်ၵေႃႉလူၵေႃႉထိင်းရေႇပႅၵ်ႉၵႃႉၼၼ်ႉတၢႆလႄႈ ၶၢမ်ႇတၢင်းဢၼ် သၢင်းၵျူဝ်ႇၵႃႈတႂ်ႈတူၼ်ႈမႆႉၼိမ် ၵႃႈတီႈပေႇသလႃႉၼၼ်ႉဢေႃႈ။ တူၼ်ႈၼၼ်ႉၸိုင်၊ ၶဝ်ႁွင်ႉႁဵၵ်ႈၸိုဝ်ႈ ဢႃႇလုၼ်ႇပႃႇၵုတ်ႉဢေႃႈ။

9ဝၢႆးသေယႃႇၵုပ်ႈလုၵ်ႉသေၵႃႈတီႈ ပႃႇတၼ်ႇဢႃႇရမ်ႇၶိုၼ်းမႃးယဝ်ႉၼၼ်ႉ၊ ၽြႃးပဵၼ်ၸဝ်ႈသမ်ႉပေႃႇမႃးတီႈမၼ်းလႄႈပၼ်တၢင်းလီတီႈမၼ်းထႅင်ႈသေယဝ်ႉ၊- 10ၽြႃးပဵၼ်ၸဝ်ႈလၢတ်ႈတီႈမၼ်းလႄႈဝႃႈ၊ တေႃႈလဵဝ်ၼႆႉၸိုဝ်ႈမႂ်းပဵၼ်ယႃႇၵုပ်ႈဢေႃႈ။ ၵမ်းလိုၼ်းၸိုင် ဢမ်ႇလႆႈႁွင်ႉႁဵၵ်ႈ ၸိုဝ်ႈမႂ်း ယႃႇၵုပ်ႈ။ တၵ်းလႆႈႁွင်ႉႁဵၵ်ႈ ဢီႉသရေႇလႃႉဢေႃႈ၊ ဝႃႈၼင်ႇၼႆလႄႈ ႁွင်ႉႁဵၵ်ႈၸိုဝ်ႈမၼ်း ဢီႉသရေႇလႃႉသေဢေႃႈ။- 11ၽြႃးပဵၼ်ၸဝ်ႈသမ်ႉလၢတ်ႈတီႈမၼ်းလႄႈဝႃႈ၊ ၵဝ်ပဵၼ်ၽြႃးပဵၼ်ၸဝ်ႈၸဝ်ႈဢၼၼ်ႇတႃႉတၼ်းၶူဝ်းဢေႃႈ။ ၵိူတ်ႇလဵင်ႉလုၵ်ႈလဵင်ႉလၢင်းလႄႈ ယႂ်ႇၽႄႈၼမ်ၵိုၼ်းမႃးတႃႉ။ ၵူၼ်းမဵဝ်းလဵဝ်ၵူၺ်းဢမ်ႇၵႃး၊ ၵူၼ်းမဵဝ်းၼမ်ၼႃႇတၵ်းဢွၵ်ႇပဵၼ်မႃးၵႃႈၼႂ်းမႂ်းဢေႃႈ။ ၶုၼ်ႁေႃၶမ်းတၵ်းပေႃႇဢွၵ်ႇပဵၼ်မႃးၵႃႈၼႂ်းၸိူဝ်ႉၶိူဝ်းမႂ်းဢေႃႈ။- 12ၵဝ်တၵ်းဢဝ်လိၼ်ဢၼ်ၵဝ်ပၼ်တီႈဢႃႇပြႃႇႁၢမ်ႇတင်းဢီႉၸၢၵ်ႈၼၼ်ႉပၼ်တီႈမႂ်းဢေႃႈ။ တီႈၸိူဝ်ႉၶိူဝ်းမႂ်း လိုၼ်းမႂ်းၼၼ်ႉၵေႃႈ၊ ၵဝ်တၵ်းဢဝ်လိၼ်ၼၼ်ႉပၼ်ဢေႃႈ၊ ဝႃႈၼင်ႇၼႆဢေႃႈ။- 13ၽြႃးပဵၼ်ၸဝ်ႈလုၵ်ႉသေၵႃႈတီႈဢၼ် တၵ်ႉလၢတ်ႈၵၼ်တင်းမၼ်းၸိူဝ်ႉၼင်ႇၼၼ်ၼၼ်ႉသေလႄႈ ၶိုၼ်ႈၵႂႃႇၵႃႈၼိူဝ်သေဢေႃႈ။- 14ယႃႇၵုပ်ႈဢဝ်သဝ်မၢၵ်ႇႁိၼ်ပၵ်း ၵႃႈတီႈဢၼ်ၽြႃးပဵၼ်ၸဝ်ႈ တၵ်ႉလၢတ်ႈၵၼ်တင်းမၼ်းၼၼ်ႉသေလႄႈ ဢဝ်တၢင်းပုၵ်ႈၸေႃႇဢၼ်သွၼ်းလေႃႇဢိၵ်ႇတင်း ၼမ်ႉမၼ်းထွၵ်ႇသႂ်ႇၵႃႈၼိူဝ်ပၢႆမၢၵ်ႇႁိၼ်ၼၼ်ႉဢေႃႈ။- 15ယႃႇၵုပ်ႈသမ်ႉၶိုၼ်းႁွင်ႉႁဵၵ်ႈတီႈဢၼ်လႆႈၶၢမ်ႇပျႃႇတိၵ်ႈၽြႃးပဵၼ်ၸဝ်ႈၼၼ်ႉၸိုဝ်ႈပေႇသလႃႉထႅင်ႈဢေႃႈ။

16ဝၢႆးၼၼ်ႉၶဝ်သမ်ႉလုၵ်ႉသေ ၵႃႈတီႈပေႇသလႃႉၼၼ်ႉၸွမ်းတၢင်းၵႂႃႇလႄႈမိူဝ်ႈဢၼ်လူဝ်ႇထႅင်ႈဢိတ်းၼိုင်ႈ တၵ်းႁွတ်ႈထိုင် ဝဵင်းဢေႇၽရတ်ႉၼၼ်ႉၸိုင်၊ ရႃႇၶေႇလႃႉၼၼ်ႉႁွတ်ႈထိုင်ၶိင်ႇဢၼ်မၼ်း တၵ်းၵိူတ်ႇလဵင်ႉလုၵ်ႈလႄႈလႆႈၶၢမ်ႇဝူၺ်ႇတၼႃႇ ဢၼ်ယၢပ်ႇၼႃႇလူင်လၢင်ဢေႃႈ။- 17ၼႂ်းမိူဝ်ႈဢၼ်မၼ်းလႆႈၶၢမ်ႇဝူၺ်ႇတၼႃႇဢၼ်ယၢပ်ႇၼႃႇ ယူႇၼၼ်ႉၸိုင်၊ မႄႈၵဵပ်းလၢတ်ႈလႄႈဝႃႈ၊ ယႃႇပေမႆႈၸႂ်။ မႂ်းလႆႈလုၵ်ႈၸၢႆးယဝ်ႉ၊ ဝႃႈၼင်ႇၼႆဢေႃႈ။- 18မၼ်းၼၼ်ႉ ၼႂ်းမိူဝ်ႈဢၼ်ယင်းတိုၵ်ႉတၢႆလႄႈ ၸႂ်ဝီႉၺိၺ်ႇဢွၵ်ႇယူႇၼၼ်ႉၸိုင်၊ ႁွင်ႉႁဵၵ်ႈၸိုဝ်ႈလုၵ်ႈၸၢႆးၼၼ်ႉ ပိၼ်ႇဢူဝ်းၼီႉဢေႃႈ၊ ပေႃႈမၼ်းၸမ်ႉ၊ ႁွင်ႉႁဵၵ်ႈၸိုဝ်ႈပိၼ်ႇယႃႇမိၼ်ႇဢေႃႈ။- 19ရႃႇၶေႇလႃႉတၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၼႂ်းသဵၼ်ႈတၢင်းဢၼ်ၵႂႃႇၸူးၵႃႈတီႈဝဵင်းဢေႇၽရတ်ႉဢၼ်ဝႃႈ ဝဵင်းပႅတ်ႉလႁႅမ်ႇၼၼ်ႉဢေႃႈ။- 20ယႃႇၵုပ်ႈၵေႃႈ ပၵ်းသဝ်းတီႈမၢတ်ႈတီႈတွင်းဝႆႉၵႃႈၼိူဝ်သၢင်းၶႅင်းမၼ်းဢေႃႈ။ သဝ်တီႈမၢတ်ႈတီႈတွင်းၼၼ်ႉၸမ်ႉ၊ ပဵၼ်သဝ်သၢင်းၶႅင်းရႃႇၶေႇလႃႉ ႁၢၼ်ႉတေႃႇဝၼ်းမိူဝ်ႈၼႆႉဢေႃႈ။- 21ဢီႉသရေႇလႃႉသမ်ႉၸွမ်းတၢင်းၵႂႃႇထႅင်ႈလႄႈ မုင်းမူဝ်းၵႃႇမၼ်းၵႃႈတီႈၽၢႆႇပုၼ်ႉထဵင်လၢင်းဢေးတႃႇဢေႃႈ။

ၸရၢင်းလုၵ်ႈၸၢႆးဢီႉသရေႇလႃႉတင်းလၢႆ

(တူၺ်း၊ 1 ရႃႇၶျုၵ်ႈ 2:1-2)

22မိူဝ်ႈဢၼ်ဢီႉသရေႇလႃႉ ယင်းယူႇၵႃႈတီႈမိူင်းၼၼ်ႉယူႇၼၼ်ႉၸိုင်၊ ရူႉပိၼ်ႇၵႂႃႇလႄႈ ၼွၼ်းလူၺ်ႈၵၼ်တင်း ပီႉလႁႃႇမေးၼွႆႉပေႃႈမၼ်းၼၼ်ႉဢေႃႈ။ သတၢင်းသဵင်ၶၢဝ်ႇၼၼ်ႉၸိုင်၊ ဢီႉသရေႇလႃႉလႆႈငိၼ်းဢေႃႈ။

23လုၵ်ႈၸၢႆးယႃႇၵုပ်ႈမီးသိပ်းသွင်ၵေႃႉဢေႃႈ။ လုၵ်ႈၸၢႆးလေႇဢႃႇၸမ်ႉ၊ ပဵၼ်ရူႉပိၼ်ႇ၊ လုၵ်ႈတူၼ်ႈယႃႇၵုပ်ႈ၊ ဢိၵ်ႇတင်းသီႉမုၼ်ႇ၊ လေႇဝီႉ၊ ယူႉတႃႉ၊ ဢီႉသၶႃႇ၊ ၸေႇပူႉလုၼ်ႇဢေႃႈ။- 24လုၵ်ႈၸၢႆးရႃႇၶေႇလႃႉၸမ်ႉ၊ ပဵၼ်ယူဝ်းသႅပ်ႈတင်းပိၼ်ႇယႃႇမိၼ်ႇဢေႃႈ။- 25လုၵ်ႈၸၢႆးပီႉလႁႃႇ မႄႈယိင်းၶႃႈရႃႇၶေႇလႃႉၸမ်ႉ၊ ပဵၼ်တၢၼ်ႇတင်းၼပ်ႉထလီႉဢေႃႈ။- 26လုၵ်ႈၸၢႆးၸီႉလပႃႉမႄႈယိင်းၶႃႈလေႇဢႃႇၸမ်ႉ၊ ပဵၼ်ၵၢတ်ႉတင်းဢႃႇသႃႇဢေႃႈ။ ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆးယႃႇၵုပ်ႈဢၼ်ၵိူတ်ႇလဵင်ႉမႃး တီႈမၼ်းၵႃႈၼႂ်းမိူင်းပႃႇတၼ်ႇဢႃႇရမ်ႇဢေႃႈ။

27လိုၼ်းၼၼ်ႉယႃႇၵုပ်ႈၵႂႃႇႁွတ်ႈထိုင် တီႈပေႃႈမၼ်းဢီႉၸၢၵ်ႈ၊ ၵႃႈတီႈမမ်ႇရေႇ၊ ဝဵင်းၵီႉရယႃႉသႃႇၽႃႇ၊ ဢၼ်ဝႃႈဝဵင်းႁေႇပြုၼ်ႇ၊ တီႈဢၼ်ဢႃႇပြႃႇႁၢမ်ႇ တင်းဢီႉၸၢၵ်ႈ သွၼ်ႈပိုင်ႈယူႇၼၼ်ႉဢေႃႈ။- 28ဢသၢၵ်ႈဢီႉၸၢၵ်ႈၼၼ်ႉလႆႈပၢၵ်ႇပၢႆပႅတ်ႇသိပ်းပီႊဢေႃႈ။- 29ဢီႉၸၢၵ်ႈမီးတၢင်းဢၼ်ဢသၢၵ်ႈၵႄႇထူၼ်ႈထဝ်ႈယဝ်ႉ ဢိၵ်ႇတင်း တၢင်းဢၼ်ၶိင်ႇၵႃႇလႃႉဝၼ်းမၼ်းတဵမ်ယဝ်ႉၸေးယဝ်ႉၼၼ်ႉလႄႈ ၶျုၵ်ႈၸႂ်တၢႆသေယဝ်ႉ၊ ႁွတ်ႈထိုင်ၵႃႈတီႈဢၼ် ၵူၼ်းမဵဝ်းမၼ်းတင်းလၢႆ ၸူႉတုမ်ၼၼ်ႉဢေႃႈ။ လုၵ်ႈၸၢႆးမၼ်းဢေးသေႃး တင်းယႃႇၵုပ်ႈၸိူဝ်းၼၼ်ႉဢဝ်မၼ်းသၢင်းၵျူဝ်ႇဢေႃႈ။

Currently Selected:

ငဝ်ႈၵမ်ႇၽႃႇ 35: CBMS

Highlight

Copy