ငဝ်ႈၵမ်ႇၽႃႇ 34
34
တီႉၼႃႉလႆႈၶၢမ်ႇတၢင်းဢၼ်တဵၵ်းၵၼ်ႉ
1 တီႉၼႃႉလုၵ်ႈယိင်းဢၼ်လေႇဢႃႇ ၵိူတ်ႇလဵင်ႉမႃးတီႈယႃႇၵုပ်ႈၼၼ်ႉဢွၵ်ႇၵႂႃႇႁႂ်ႈလႆႈလူလႆႈတူၺ်း လုၵ်ႈယိင်းၸိူဝ်ႉၶိူဝ်းၵူၼ်းမိူင်း ၼၼ်ႉဢေႃႈ။- 2သေႇၶိမ်ႇလုၵ်ႈၸၢႆးႁႃႇမေႃႇ၊ ၵူၼ်းႁိတ်ႉတီႉ၊ ၶုၼ်ဢၼ်ဢုပ်ႉၵႃႈၼိူဝ်မိူင်းၼၼ်ႉႁၼ်တီႉၼႃႉလႄႈ ဢဝ်မၼ်းၵႂႃႇသေယဝ်ႉ၊ ႁဵတ်းတၢင်းဢၼ်ၼွၼ်းလူၺ်ႈၵၼ်တင်းမၼ်းလႄႈ ယႃႉသရေႇမၼ်းဢေႃႈ။- 3လိုၼ်းၼၼ်ႉ ၸႂ်ဢၼ်ႁၵ်ႉပႅင်းတီႉၼႃႉလုၵ်ႈယိင်းယႃႇၵုပ်ႈၼၼ်ႉ ဢမ်ႇသုတ်းဢမ်ႇသဵင်ႈ၊ ႁၵ်ႉပႅင်းမႄႈယိင်းဢွၼ်ႇၼၼ်ႉယူႇသေႇသေႇလႄႈ ဢဝ်ၵႂၢမ်းလၢတ်ႈၶျေႃးဢဝ်ႁူဝ်ၸႂ်မၼ်းယူႇဢေႃႈ။- 4တီႈပေႃႈမၼ်းၶုၼ်ႁႃႇမေႃႇၼၼ်ႉၵေႃႈသေႇၶိမ်ႇလဝ်ႊဝႃႈ၊ ၼင်ႇႁိုဝ်မႄႈယိင်းဢွၼ်ႇၼႆႉတၵ်းလႆႈပဵၼ်မေးၵဝ်ၶႃႈၸိုင်၊ ယွၼ်းပၼ်သေၵမ်းၶႃႈ၊ ဝႃႈၼင်ႇၼႆဢေႃႈ။- 5ယႃႇၵုပ်ႈၼၼ်ႉ ပိၵ်ႉသမ်ႉႁူႉငိၼ်းလွင်ႈဢၼ်သေႇၶိမ်ႇယႃႉသရေႇလုၵ်ႈယိင်းမၼ်းတီႉၼႃႉၼၼ်ႉသေၵေႃႈ၊ ၵွပ်ႈပိူဝ်ႈဢၼ်လုၵ်ႈၸၢႆး မၼ်းတင်းလၢႆယင်း မီးယူႇလူၺ်ႈၵၼ်တင်းတရိၵ်ႈသၢၼ်ႇၵႃႈတီႈထိူၼ်ႇလႄႈ ယူႇတဵတ်ႇတဵတ်ႇပႂ်ႉထႃႈၶဝ်ယူႇဢေႃႈ။- 6လိုၼ်းၼၼ်ႉ ၶုၼ်ႁႃႇမေႃႇ ပေႃႈသေႇၶိမ်ႇၼၼ်ႉ ဢွၵ်ႇမႃးႁႂ်ႈလႆႈတၵ်ႉလၢတ်ႈယႃႇၵုပ်ႈဢေႃႈ။- 7လုၵ်ႈၸၢႆးယႃႇၵုပ်ႈၸိူဝ်းၼၼ်ႉမိူဝ်ႈဢၼ်ငိၼ်းသတၢင်းသဵင်ၶၢဝ်ႇၼၼ်ႉၸိုင်၊ ဢွၼ်ၵၼ်လုၵ်ႉသေၵႃႈတီႈထိူၼ်ႇၶိုၼ်းမႃးႁွတ်ႈထိုင်ဢေႃႈ။ ပိူဝ်ႈဢၼ်ၵေႃႉၼၼ်ႉလႆႈၼွၼ်းလူၺ်ႈၵၼ်တင်းလုၵ်ႈယိင်းယႃႇၵုပ်ႈလႄႈ ႁဵတ်းဢမူႉဢၼ်မိူၵ်ႈၼႂ်းၸိူဝ်ႉၶိူဝ်း ဢီႉသရေႇလႃႉဢၼ်ဝႃႈ ဢမူႉဢၼ်ဢမ်ႇထုၵ်ႇလီႁဵတ်းၼၼ်ႉလႄႈ ၶဝ်ၼၼ်ႉၸဵပ်းၸႂ်လႄႈ တေႃးသႃႉ တင်းၸႂ်မႆႈဢွၵ်ႇဢေႃႈ။- 8ၶုၼ်ႁႃႇမေႃႇၵေႃႈတၵ်ႉလၢတ်ႈၵၼ်တင်းၶဝ်လႄႈဝႃႈ၊ ႁူဝ်ၸႂ်လုၵ်ႈၸၢႆးၵဝ်သေႇၶိမ်ႇၼၼ်ႉၸပ်းၸွႆးလုၵ်ႈယိင်းသူယႂ်ႇၼႃႇလူင်လၢင်ဢေႃႈ။ ဢဝ်ဢၢပ်ႈပၼ်ႁႂ်ႈပဵၼ်မေးမၼ်းသေၵမ်း။- 9သူတင်းႁဝ်းၼင်ႇၵၼ်ၵၼ်ႁဵတ်းတၢင်းဢၼ်သွင်ႇမင်ႇၵလႃႇဢဝ်ၵၼ်လႄႈ ပၼ်ႁဝ်းဢဝ်လုၵ်ႈယိင်းသူသေၵမ်း။ လုၵ်ႈယိင်းႁဝ်းၵေႃႈ၊ သူဢဝ်သေၵမ်း။- 10သူယူႇလူၺ်ႈၵၼ်တင်းႁဝ်းလႄႈၵႃႈတီႈမိူင်းၼႆႉ၊ ယင်းဢမ်ႇမီးဢၼ်ႁႄႉဢၼ်ၶႅၼ်၊ ၶျႃးတီႈယူႇႁဵတ်းလွင်ႈသိုဝ်ႉပိူင်ၶၢႆ ယူႇသေလႄႈ ႁႂ်ႈမီးတီႈဢၼ်ဢုပ်ႉဢၼ်ပိူင်ႇသေၵမ်း၊ ဝႃႈၼင်ႇၼႆဢေႃႈ။- 11သေႇၶိမ်ႇၵေႃႈလၢတ်ႈတီႈပေႃႈမႄႈယိင်းဢိၵ်ႇတင်းပီႈၸၢႆးမၼ်းတင်းလၢႆၼၼ်ႉလႄႈဝႃႈ၊ ႁႂ်ႈၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃ သူၸဝ်ႈသေၵမ်း။ ၵဝ်ၶႃႈတၵ်းပၼ်ၵႃႈဢၼ်သူၸဝ်ႈယွၼ်းၼၼ်ႉၶႃႈဢေႃႈ။- 12ဢုၵ်ႉၸႃႇဢၼ်ၵၼ်ႇတေႃးသေဢမ်ႇဝႃႈ၊ လၢၵ်ႈသွင်ႇသေဢမ်ႇဝႃႈ၊ ၵေႇႁိုဝ်ၼမ်ႁိုဝ်ဢမ်ႇဝႃႈ၊ ၵႃႈဢၼ်သူၸဝ်ႈယွၼ်းၼၼ်ႉၸိုင်ၵဝ်ၶႃႈတၵ်းပၼ်ၶႃႈဢေႃႈ။ ၵူၺ်းၵွမ်ႉပၼ်မႄႈယိင်းၼႆႉ တီႈၵဝ်ၶႃႈၵူၺ်းသေၵမ်းၶႃႈ၊ ဝႃႈၼင်ႇၼႆဢေႃႈ။
13လုၵ်ႈၸၢႆးယႃႇၵုပ်ႈၸိူဝ်းၼၼ်ႉ၊ ၵွပ်ႈပိူဝ်ႈဢၼ်သေႇၶိမ်ႇယႃႉသရေႇၼွင်ႉယိင်းၶဝ်တီႉၼႃႉၼၼ်ႉလႄႈ ဢဝ်တင်းပရီႉယႄႇၶိုၼ်းလၢတ်ႈတီႈသေႇၶိမ်ႇ တင်းပေႃႈမၼ်းႁႃႇမေႃႇၼၼ်ႉလႄႈဝႃႈၸမ်ႉ၊- 14ႁဝ်းဢမ်ႇႁဵတ်းလွင်ႈတၢင်းၼႆႉဢၼ်ဝႃႈလွင်ႈတၢင်းဢၼ် ဢဝ်ၼွင်ႉယိင်းႁဝ်းၶႃႈ ဢၢပ်ႈပၼ်တီႈၵေႃႉဢၼ်ဢမ်ႇပႆႇၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းၼၼ်ႉလႆႈၶႃႈ။ ပေႃးပၼ်ၸိုင်၊ ပဵၼ်လွင်ႈဢၼ်လီသႄႉလီသွမ်းၶႃႈဢေႃႈ။- 15မီးလွင်ႈၼိုင်ႈၵူၺ်းဢၼ်ႁဝ်းၶႃႈ တၵ်းႁပ်ႉတုင်းဢဝ်ၸမ်ႉ၊ ပေႃးသူၸဝ်ႈတၵ်းႁဵတ်းၸွမ်းၼင်ႇ ၽႃႇသႃႇႁဝ်းၶႃႈလႄႈ ၵူၼ်းၸၢႆးၵူႈၵေႃႉ ၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းၼၼ်ႉၸိုင်၊- 16ႁဝ်းၶႃႈတၵ်းဢဝ်လုၵ်ႈယိင်းႁဝ်းၶႃႈဢၢပ်ႈပၼ်တီႈသူၸဝ်ႈလႄႈ လုၵ်ႈယိင်းသူၸဝ်ႈၵေႃႈ၊ ႁဝ်းၶႃႈတၵ်းဢဝ်ဢေႃႈ။ ၵမ်းၼၼ်ႉ ႁဝ်းၶႃႈတၵ်းယူႇလူၺ်ႈၵၼ်တင်းသူၸဝ်ႈလႄႈ ပဵၼ်မဵဝ်းလဵဝ်ၵၼ်ဢေႃႈ။- 17ပေႃးဢမ်ႇၼၼ် ပေႃးဢမ်ႇထွမ်ႇဢဝ်ၵႂၢမ်းႁဝ်းၶႃႈလႄႈ ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၸိုင်၊ ႁဝ်းၶႃႈတၵ်းဢဝ်လုၵ်ႈယိင်းႁဝ်းၶႃႈသေလႄႈၵႂႃႇၶႃႈယဝ်ႉ၊ ဝႃႈၼင်ႇၼႆဢေႃႈ။
18ၵႂၢမ်းၶဝ်ၼၼ်ႉထုၵ်ႇၸႂ်ၵျိူၵ်ႈၸႂ်ၶုၼ်ႁႃႇမေႃႇတင်းလုၵ်ႈၸၢႆးမၼ်းသေႇၶိမ်ႇၼၼ်ႉလႄႈ၊- 19လုၵ်ႈၸၢႆးမၼ်းၵေႃႈပိူဝ်ႈဢၼ်ႁၵ်ႉပႅင်းလုၵ်ႈယိင်းယႃႇၵုပ်ႈ ယႂ်ႇၼႃႇလူင်လၢင်ဢိၵ်ႇတင်း ပိူဝ်ႈဢၼ်မၼ်းမီးသရေႇတွၼ်းလိူဝ်သေပိူၼ်ႈ ၼႂ်းၸိူဝ်ႉၶိူဝ်းပေႃႈမၼ်းတင်းသဵင်ႈတင်းလူင်ၼၼ်ႉလႄႈ ဢမ်ႇႁဵတ်းၵွႆႈႁဵတ်းထိူင်း။
20မိူဝ်ႈၼၼ်ႉ ၶုၼ်ႁႃႇမေႃႇတင်းလုၵ်ႈၸၢႆးမၼ်းသေႇၶိမ်ႇၼၼ်ႉၵႂႃႇၵႃႈတီႈႁူးၽၵ်းတူဝဵင်းၶဝ်ၼၼ်ႉလႄႈ တၵ်ႉလၢတ်ႈၵူၼ်းဝဵင်းတင်းလၢႆလႄႈဝႃႈ၊- 21ၵူၼ်းၸိူဝ်းၼႆႉထုၵ်ႇမေႃၵၼ်တင်းႁဝ်းယဝ်ႉ။ ပိူဝ်ႈၼႆလႄႈ ႁႂ်ႈၶဝ်ယူႇၵႃႈတီႈမိူင်းႁဝ်းၼႆႉလႄႈ ႁဵတ်းလွင်ႈသိုဝ်ႉပိူင်ၶၢႆသေၵမ်း။ တူၺ်းလူး၊ မိူင်းႁဝ်းၼႆႉၵႂၢင်ႈထၼ်ႈပေႃး ၶဝ်တၵ်းယူႇဢေႃႈ။ ဢွၼ်ၵၼ်ဢဝ်လုၵ်ႈယိင်းၶဝ်တင်းလၢႆလႄႈ ပဵၼ်ႁိူၼ်းပဵၼ်ယေး လူၺ်ႈၵၼ်တႃႉႁဝ်း။ လုၵ်ႈယိင်းႁဝ်းတင်းလၢႆၵေႃႈ ဢွၼ်ၵၼ်ဢၢပ်ႈပၼ်တီႈၶဝ်တႃႉႁဝ်း။- 22ၵူၺ်းၵွမ်ႉမီးလွင်းၼိုင်ႈၵူၺ်းဢၼ်ၶဝ်တၵ်းႁပ်ႉတုင်းဢဝ်လွင်ႈဢၼ် ၶဝ်တၵ်းယူႇလူၺ်ႈၵၼ်တင်းႁဝ်းလႄႈ ပဵၼ်မဵဝ်းလဵဝ်ၵၼ် တင်းႁဝ်းၼၼ်ႉၸမ်ႉ၊ ၸိူဝ်ႉၼင်ႇဢၼ်ၶဝ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉ၊ တီႈႁဝ်းၵူၼ်းၸၢႆးၵူႈၵေႃႉတၵ်းလႆႈၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းဢေႃႈ။- 23ၸႃႉၸဵမ်ၽုင်သူဝ်းၽုင်ဝူဝ်းၶဝ် တရိၵ်ႈသၢၼ်ႇၶဝ်တင်းလၢႆ ဢိၵ်ႇတင်းဢုၵ်ႉၸႃႇၶူဝ်းလဵင်းၶဝ်ၼၼ်ႉ တၵ်းပဵၼ်ၶွင်ႁဝ်း ဢမ်ႇၸႂ်ႈႁိုဝ်။ ဢွၼ်ၵၼ်ၸွမ်းဢလူဝ်ႇၶဝ်တႃႉႁဝ်း။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶဝ်တၵ်းယူႇလူၺ်ႈၵၼ်တင်းႁဝ်းဢေႃႈ၊ ဝႃႈၼင်ႇၼႆလႄႈ၊- 24ၶဝ်ၸိူဝ်းဢၼ်ဢွၵ်ႇၽၵ်းတူဝဵင်းၼၼ်ႉ တင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ၵႂၢမ်း ဢၼ်ၶုၼ်ႁႃႇမေႃႇတင်းလုၵ်ႈၸၢႆးမၼ်းသေႇၶိမ်ႇ လၢတ်ႈၼၼ်ႉလႄႈ ၵူၼ်းၸၢႆးၵႃႈမီးဢၼ်ဝႃႈၶဝ်ၸိူဝ်းဢၼ် ဢွၵ်ႇၽၵ်းတူဝဵင်းၼၼ်ႉတင်းသဵင်ႈတင်းလူင် ဢွၼ်ၵၼ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းဢေႃႈ။
25ပေႃးလႆႈသၢမ်ဝၼ်းယဝ်ႉ၊ မိူဝ်ႈဢၼ်ၶဝ်ယင်းတိုၵ်ႉၸဵပ်းၼႃႇယူႇၼၼ်ႉၸိုင်၊ လုၵ်ႈၸၢႆးယႃႇၵုပ်ႈသွင်ၵေႃႉ၊ သီႉမုၼ်ႇတင်းလေႇဝီႉ ပီႈၸၢႆးတီႉၼႃႉၼၼ်ႉ၊ ယိပ်းၵမ်ဢဝ်လၢပ်ႇဢဝ်လႅဝ်း၊ ယေႈၵေႃႉယေႈမၢၵ်ႈသေလႄႈ ၶဝ်ႈၵႂႃႇၵႃႈၼႂ်းဝဵင်းႁတ်းႁတ်းႁၢၼ်ႁၢၼ်သေယဝ်ႉ၊ ဢဝ်ၵူၼ်းၸၢႆးၵႃႈမီးတင်းသဵင်ႈတင်းလူင်တၢႆဢေႃႈ။- 26ၶုၼ်ႁႃႇမေႃႇတင်းလုၵ်ႈၸၢႆးမၼ်းသေႇၶိမ်ႇၵေႃႈ၊ ၶဝ်ဢဝ်တၢႆလူၺ်ႈလၢပ်ႇလူၺ်ႈလႅဝ်းပႅတ်ႈသေယဝ်ႉ၊ ၼုၵ်ႈဢဝ်တီႉၼႃႉ ၵႃႈၼႂ်း ႁိူၼ်းသေႇၶိမ်ႇၼၼ်ႉလႄႈ ၶိုၼ်းမိူဝ်းၵႂႃႇဢေႃႈ။- 27ပိူဝ်ႈဢၼ်ၶဝ်ၼၼ်ႉယႃႉသရေႇၼွင်ႉယိင်းၶဝ်လႄႈ၊ လုၵ်ႈၸၢႆးယႃႇၵုပ်ႈၸိူဝ်းၼၼ်ႉသမ်ႉၶိုၼ်းၵႂႃႇၵႃႈတီႈ ၶဝ်ၸိူဝ်းဢၼ်ဢဝ်တၢႆ ပႅတ်ႈယဝ်ႉၼၼ်ႉလႄႈ ႁိမ်ဢဝ်ႁူင်ႇဢဝ်ဝဵင်းၼၼ်ႉဢေႃႈ။- 28ၶဝ်သိမ်းဢဝ်ၸႃႉၸဵမ်ၽုင်သူဝ်း၊ ၽုင်ပႄႉ၊ ၽုင်ဝူဝ်း၊ လီႈတင်းလၢႆဢိၵ်ႇတင်းဢုၵ်ႉၸႃႇၶူဝ်းလဵင်းၵႃႈဢၼ်မီးၵႃႈတီႈဝဵင်း တင်းဢုၵ်ႉၸႃႇၶူဝ်းလဵင်းၵႃႈဢၼ်မီးၵႃႈတီႈတူင်ႈၼႃး၊- 29ၸေးၸိမ်ႇၶဝ်တင်းသဵင်ႈတင်းလူင် ဢိၵ်ႇတင်းမေးၶဝ် တင်းလုၵ်ႈဢွၼ်ႇၶဝ်တင်းသဵင်ႈတင်းလူင်လႄႈ ႁိမ်ဢဝ်ႁူင်ႇဢဝ် ၵႃႈဢၼ်မီးၵႃႈတီႈႁိူၼ်းၶဝ်တင်းသဵင်ႈတင်းလူင်ၼၼ်ႉဢေႃႈ။- 30မိူဝ်ႈၼၼ်ႉ ယႃႇၵုပ်ႈလၢတ်ႈတီႈသီႉမုၼ်ႇတင်းလေႇဝီႉလႄႈဝႃႈ၊ သူၼႆႉၼိၵ်ႈၸၢၵ်ႈငႅၼ်းသႄးၵဝ်လႄႈ ႁဵတ်းထၼ်ႈပေႃးႁႂ်ႈၵဝ်ပဵၼ် တီႈဢၼ်လီႁင်ႈဢဵတ်ႇသဵတ်ႇၵႃႈတီႈၵူၼ်းမိူင်းၼႆႉ ဢၼ်ဝႃႈၵူၼ်းၶႃႇၼၼီႉတင်းၵူၼ်းၽေႇရၸီႉၸိူဝ်းၼၼ်ႉလူင်ပႄႇ။ ပိူဝ်ႈဢၼ်ၵူၼ်း ၵႃႈတီႈၵဝ်ၼႆႉၵေႇၼႃႇလႄႈၶဝ်ၼၼ်ႉတၵ်း ၸူႉၵၼ်တုမ်ၵၼ်လႄႈ တိုၵ်းတေႃးယႃႉပႅတ်ႈၵဝ်ဢေႃႈ။ ၵဝ်တၵ်းလႆႈၶၢမ်ႇတၢင်းဢၼ် ယႃႉပႅတ်ႈတင်းႁိူၼ်းတင်းယေးယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 31ၶဝ်ၵေႃႈၶိုၼ်းလၢတ်ႈလႄႈဝႃႈ၊ မၼ်းတၵ်းလႆႈမၢတ်ႈၼွင်ႉယိင်းႁဝ်းၼႆႉပဵၼ်ၸိူဝ်ႉၼင်ႇ မႄႈမွၵ်ႇယႃႈလႄႈ ႁဵတ်းႁိုဝ်။ ဝႃႈၼင်ႇၼႆဢေႃႈ။
Currently Selected:
ငဝ်ႈၵမ်ႇၽႃႇ 34: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
