ငဝ်ႈၵမ်ႇၽႃႇ 36

ၸရၢင်းၸိူဝ်ႉၶိူဝ်းဢေးသေႃး

(တူၺ်း၊ 1 ရႃႇၶျုၵ်ႈ 1:34-37)

1ဢထုၵ်ႉပတ်ႈတီႉၸိူဝ်ႉၶိူဝ်းဢေးသေႃး ဢၼ်လႆႈၸိုဝ်ႈဢေႇတုမ်ႇၼၼ်ႉၸမ်ႉ၊- 2ဢေးသေႃးဢဝ်ဢႃႇတႃႉ၊ လုၵ်ႈယိင်းဢေႇလုၼ်ႇ၊ ၵူၼ်းႁိတ်ႉတီႉ၊ တင်းဢႃႁေႃးလီႉပႃႇမႃႉ၊ လုၵ်ႈယိင်းဢႃႇၼႃႉ၊ ဢၼ်ပဵၼ်လုၵ်ႈယိင်းၸီႉၽွင်ႇ၊ ၵူၼ်းႁီႉဝီႉ၊ သွင်ၵေႃႉၼၼ်ႉ ၵႃႈၼႂ်းလုၵ်ႈယိင်းၸိူဝ်ႉၶိူဝ်းၶႃႇၼၢၼ်ႇ- 3ဢိၵ်ႇတင်းပႃႇသမတ်ႉ၊ ၼွင်ႉယိင်းၼပႃႇယုတ်ႉ ဢၼ်ပဵၼ်လုၵ်ႈယိင်းဢီႉသမေႇလႃႉၸိူဝ်းၼၼ်ႉလႄႈ ပဵၼ်ႁိူၼ်းပဵၼ်ယေး ဢေႃႈ။- 4လုၵ်ႈၸၢႆးဢၼ်ဢႃႇတႃႉၵိူတ်ႇလဵင်ႉမႃးတီႈဢေးသေႃးၸမ်ႉ၊ ပဵၼ်ဢေးလီႉၽတ်ႉဢေႃႈ။ လုၵ်ႈၸၢႆးဢၼ်ပႃႇသမတ်ႉၵိူတ်ႇလဵင်ႉမႃးၸမ်ႉ၊ ပဵၼ်ရူႉဢေးလႃႉဢေႃႈ။- 5လုၵ်ႈၸၢႆးဢၼ်ဢႃႁေႃးလီႉပႃႇမႃႉၵိူတ်ႇလဵင်ႉမႃးၸမ်ႉပဵၼ်ယူႉသႃႉ၊ ယႃႇလၢမ်ႇတင်းၵေႃးရႃႉဢေႃႈ။ ၶဝ်ၸိူဝ်းၼႆႉၸမ်ႉ၊ ပဵၼ်လုၵ်ႈၸၢႆး ဢၼ်ၵိူတ်ႇလဵင်ႉမႃး တီႈဢေးသေႃးၵႃႈၼႂ်းမိူင်းၶႃႇၼၢၼ်ႇဢေႃႈ။

6 ဢေးသေႃးၼၼ်ႉ ဢဝ်မေးမၼ်းတင်းလုၵ်ႈလၢင်းမၼ်းတင်းလၢႆ၊ ၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ဢိၵ်ႇတင်းၸႃႉၸဵမ်သူဝ်းဝူဝ်းတရိၵ်ႈသၢၼ်ႇၵႃႈမီးတင်းသဵင်ႈတင်းလူင်လႄႈ ဢုၵ်ႉၸႃႇၶူဝ်းလဵင်းဢၼ်မၼ်းလႆႈ ၵႃႈၼႂ်းမိူင်းၶႃႇၼၢၼ်ႇၵႃႈမီး တင်းသဵင်ႈတင်းလူင်လႄႈလုၵ်ႉသေၵႃႈတီႈၼွင်ႉၸၢႆးမၼ်းယႃႇၵုပ်ႈ ၶၢႆႉၵႂႃႇတၢင်ႇတီႈတၢင်ႇမိူင်းသေဢေႃႈ။- 7လွင်ႈမၼ်းၸမ်ႉ ၵွပ်ႈပိူဝ်ႈဢၼ်ဢုၵ်ႉၸႃႇၶူဝ်းလဵင်းသွင်ၶႃ ၼမ်ၼႃႇလူၼ်ႉလိူဝ်ၵႂႃႇလႄႈ သွင်ၶႃဢမ်ႇယူႇတီႈလဵဝ်ၵၼ်လႆႈ။ ၵွပ်ႈပိူဝ်ႈ ဢၼ် တရိၵ်ႈသၢၼ်ႇသွင်ၶႃၼမ်ၼႃႇလႄႈလိၼ်တီႈဢၼ်သွင်ၶႃယူႇၼၼ်ႉဢမ်ႇပေႃးဢမ်ႇၵုမ်ႇလႆႈ။- 8ပိူဝ်ႈၼႆလႄႈ ဢေးသေႃးဢၼ်လႆႈၸိုဝ်ႈဢေႇတုမ်ႇၼၼ်ႉယူႇၵႃႈၼိူဝ်လွႆၸီႉရႃႉဢေႃႈ။

9ၸရၢင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်ဢေးသေႃးဢၼ်ပဵၼ်ပေႃႈၵူၼ်းမဵဝ်းဢေႇတုမ်ႇၵႃႈၼိူဝ်လွႆၸီႉရႃႉၼၼ်ႉၸိုင် တၵ်းလၢတ်ႈလူးၵွၼ်ႇဢေႃႈ။- 10ၸိုဝ်ႈသဵင်လုၵ်ႈၸၢႆးဢေးသေႃးတင်းလၢႆၸမ်ႉ၊ ပဵၼ်ဢေးလီႉၽတ်ႉလုၵ်ႈၸၢႆးဢႃႇတႃႉ မေးဢေးသေႃး တင်းရူႉဢေးလႃႉ လုၵ်ႈၸၢႆး ပႃႇသမတ်ႉ မေးဢေးသေႃးၼၼ်ႉဢေႃႈ။- 11လုၵ်ႈၸၢႆးဢေးလီႉၽတ်ႉၸမ်ႉ၊ ပဵၼ်တေႇမၢၼ်ႇ၊ ဢေႃးမရႃႉ၊ ၸေႇၽေႃႇ၊ ၵႃႇတမ်ႇ တင်းၵေးၼတ်ႉဢေႃႈ။- 12တိမ်းၼႃႉ ပဵၼ်မေးၼွႆႉ ဢေးလီႉၽတ်ႉလုၵ်ႈၸၢႆးဢေးသေႃးၼၼ်ႉလႄႈ လုၵ်ႈၸၢႆးဢၼ်မၼ်းၵိူတ်ႇလဵင်ႉမႃး တီႈဢေးလီႉၽတ်ႉၼၼ်ႉၸမ်ႉ၊ ပဵၼ်ဢႃႇမလႅၵ်ႉဢေႃႈ။ ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်း ဢၼ်သိုပ်ႇလူင်းမႃးၵႃႈတီႈ ဢႃႇတႃႉမေးဢေးသေႃးၼၼ်ႉဢေႃႈ။- 13လုၵ်ႈၸၢႆးရူႉဢေးလႃႉၸမ်ႉ၊ ပဵၼ်ၼႃႇႁတ်ႉ၊ ၸေးရႃႉ၊ သၢမ်ႇမႃႇ တင်းမိတ်ႉၸႃႉဢေႃႈ။ ၶဝ်ၸိူဝ်းၼႆႉပဵၼ်ၸိူဝ်ႉၶိူဝ်းဢၼ်သိုပ်ႇလူင်းမႃး ၵႃႈတီႈပႃႇသမတ်ႉမေး ဢေးသေႃးဢေႃႈ။- 14လုၵ်ႈၸၢႆးဢၼ်မေးဢေးသေႃး ဢႃႁေႃးလီႉပႃႇမႃႉ လုၵ်ႈယိင်းဢႃႇၼႃႉ ဢၼ်ပဵၼ်လုၵ်ႈယိင်းၸီႉၽွင်ႇၼၼ်ႉၵိူတ်ႇလဵင်ႉမႃးတီႈ ဢေးသေႃးၼၼ်ႉၸမ်ႉ၊ ပဵၼ်ယူႉသႃႉ၊ ယႃႇလၢမ်ႇ တင်းၵေႃးရႃႉဢေႃႈ။

15ၼႂ်းလုၵ်ႈၸၢႆးဢေးသေႃးတင်းလၢႆၼၼ်ႉတၵ်းလၢတ်ႈလူၺ်ႈၶဝ်ၸိူဝ်းဢၼ် ႁဵတ်းပူဝ်ႇၼၼ်ႉလူးၵွၼ်ႇဢေႃႈ။ လုၵ်ႈၸၢႆး ဢေးလီႉၽတ်ႉ ဢၼ်ပဵၼ်လုၵ်ႈတူၼ်ႈဢေးသေႃးၼၼ်ႉၸမ်ႉ၊ ပဵၼ်ပူဝ်ႇတေႇမၢၼ်ႇ၊ ပူဝ်ႇဢေႃးမရႃႉ၊ ပူဝ်ႇၸေႇၽေႃႇ၊ ပူဝ်ႇၵေးၼတ်ႉ၊- 16ပူဝ်ႇၵေႃးရႃႉ၊ ပူဝ်ႇၵႃႇတမ်ႇတင်း ပူဝ်ႇဢႃႇမလႅၵ်ႉဢေႃႈ။ ၶဝ်ၸိူဝ်းၼႆႉပဵၼ်ပူဝ်ႇဢၼ်သိုပ်ႇဢွၵ်ႇတီႈဢေးလီႉၽတ်ႉ ၵႃႈၼႂ်းမိူင်း ဢေႇတုမ်ႇလႄႈပဵၼ်ၸိူဝ်ႉၶိူဝ်းဢႃႇတႃႉဢေႃႈ။- 17လုၵ်ႈၸၢႆးရူႉဢေးလႃႉဢၼ်ပဵၼ်လုၵ်ႈၸၢႆးဢေးသေႃးၼၼ်ႉၸမ်ႉ၊ ပဵၼ်ပူဝ်ႇၼႃႇႁတ်ႉ၊ ပူဝ်ႇၸေးရႃႉ၊ ပူဝ်ႇသၢမ်ႇမႃႇ တင်းပူဝ်ႇမိတ်ႉၸႃႉဢေႃႈ။ ၶဝ်ၸိူဝ်းၼႆႉပဵၼ်ပူဝ်ႇဢၼ်သိုပ်ႇဢွၵ်ႇတီႈ ရူႉဢေးလႃႉ ၵႃႈၼႂ်းမိူင်းဢေႇတုမ်ႇလႄႈ ပဵၼ်ၸိူဝ်ႉၶိူဝ်း ပႃႇသမတ်ႉမေးဢေးသေႃးဢေႃႈ။- 18လုၵ်ႈၸၢႆးဢႃႁေႃးလီႉပႃႇမႃႉမေးဢေးသေႃးၸမ်ႉ၊ ပဵၼ်ပူဝ်ႇယူႉသႃႉ၊ ပူဝ်ႇယႃႇလၢမ်ႇ တင်းပူဝ်ႇၵေႃးရႃႉဢေႃႈ။ ၶဝ်ၸိူဝ်းၼႆႉ ပဵၼ်ပူဝ်ႇဢၼ်သိုပ်ႇဢွၵ်ႇတီႈ မေးဢေးသေႃး၊ ဢႃႁေႃးလီႉပႃႇမႃႉ လုၵ်ႈယိင်းဢႃႇၼႃႉၼၼ်ႉဢေႃႈ။- 19ၶဝ်ၸိူဝ်းၼႆႉ ပဵၼ်လုၵ်ႈၸၢႆးဢေးသေႃး ဢၼ်လႆႈၸိုဝ်ႈဢေႇတုမ်ႇၼၼ်ႉလႄႈ ပဵၼ်ၶဝ်ၸိူဝ်းဢၼ်ႁဵတ်းပူဝ်ႇ ၼႂ်းၶဝ်ၼၼ်ႉဢေႃႈ။

ၸရၢင်းၸိူဝ်ႉၶိူဝ်းၸီႉရႃႉ

(တူၺ်း၊ 1 ရႃႇၶျုၵ်ႈ 1:38-42)

20လုၵ်ႈၸၢႆးၸီႉရႃႉၵူၼ်းႁေႃးရီႉဢၼ်ယူႇၵႃႈၼႂ်းမိူင်းၼၼ်ႉၸမ်ႉ၊ ပဵၼ်လေႃႇတၼ်ႇ၊ သေႃးပလႃႉ၊ ၸီႉၽွင်ႇ၊ ဢႃႇၼႃႉ၊- 21တီႉသုၼ်ႇ၊ ဢေးၸႃႇ တင်းတီႉသၼ်ႇဢေႃႈ။ ၶဝ်ၸိူဝ်းၼႆႉပဵၼ်ၵေႃႉဢၼ်ႁဵတ်းပူဝ်ႇၼႂ်းၵူၼ်းႁေႃးရီႉတင်းလၢႆ ဢၼ်ပဵၼ် ၸိူဝ်ႉၶိူဝ်းၸီႉရႃႉ ၵႃႈၼႂ်းမိူင်းဢေႇတုမ်ႇဢေႃႈ။- 22လုၵ်ႈၸၢႆးလေႃႇတၼ်ႇၸမ်ႉ၊ ပဵၼ်ႁေႃးရီႉ တင်းႁေႇမၼ်ႇဢေႃႈ။ ၼွင်ႉယိင်းလေႃႇတၼ်ႇၸမ်ႉ၊ ပဵၼ်တိမ်းၼႃႉဢေႃႈ။- 23လုၵ်ႈၸၢႆးသေႃးပလႃႉၸမ်ႉ၊ ပဵၼ်ဢႃႇလဝၢၼ်ႇ၊ မႃႇၼႃႁတ်ႉ၊ ဢေးပႃႇလႃႉ၊ သေးၽေႃႇ တင်းဢေႃးၼမ်ႇဢေႃႈ။- 24လုၵ်ႈၸၢႆးၸီႉၽွင်ႇၸမ်ႉ၊ ပဵၼ်ဢႃႇယႃႉ တင်းဢႃႇၼႃႉဢေႃႈ။ ဢႃႇၼႃႉၼၼ်ႉၸမ်ႉ၊ ပဵၼ်ၵေႃႉဢၼ်ထူပ်းႁၼ် ၼမ်ႉပုင်ႇမႆႈ ၵႃႈတီႈထိူၼ်ႇၼႂ်းမိူဝ်ႈဢၼ်မၼ်းလဵင်ႉထိင်းလီႈပေႃႈမၼ်း ၸီႉၽွင်ႇၼၼ်ႉဢေႃႈ။- 25လုၵ်ႈၸၢႆးဢႃႇၼႃႉၸမ်ႉ၊ ပဵၼ်တီႉသုၼ်ႇဢေႃႈ။ ဢႃႁေႃးလီႉပႃႇမႃႉၵေႃႈပဵၼ်လုၵ်ႈယိင်းဢႃႇၼႃႉဢေႃႈ။- 26လုၵ်ႈၸၢႆးတီႉသုၼ်ႇၸမ်ႉ၊ ပဵၼ်ႁဵမ်တၼ်ႇ၊ ဢေးသပၼ်ႇ၊ ဢီႉသရၼ်ႇ တင်းၶႄးရၼ်ႇဢေႃႈ။- 27လုၵ်ႈၸၢႆးဢေးၸႃႇၸမ်ႉ၊ ပဵၼ်ပီႉလႁၼ်ႇ၊ ၸႃႇဝၼ်ႇ တင်းဢႃႇၵၼ်ႇဢေႃႈ။- 28လုၵ်ႈၸၢႆးတီႉသၼ်ႇၸမ်ႉ၊ ပဵၼ်ဢူႉၸႃႉ တင်းဢႃႇရၼ်ႇဢေႃႈ။- 29ပူဝ်ႇၸိူဝ်ႉၶိူဝ်းၵူၼ်းႁေႃးရီႉၸမ်ႉ၊ ပဵၼ်ပူဝ်ႇလေႃႇတၼ်ႇ၊ ပူဝ်ႇသေႃးပလႃႉ၊ ပူဝ်ႇၸီႉၽွင်ႇ၊ ပူဝ်ႇဢႃႇၼႃႉ၊- 30ပူဝ်ႇတီႉသုၼ်ႇ၊ ပူဝ်ႇဢေးၸႃႇ တင်းပူဝ်ႇတီႉသၼ်ႇဢေႃႈ။ ၶဝ်ၸိူဝ်းၼႆႉ၊ ပဵၼ်ပူဝ်ႇၸိူဝ်ႉၶိူဝ်းၵူၼ်းႁေႃးရီႉ ၸွမ်းၼင်ႇၶဝ်ၸိူဝ်းဢၼ် ႁဵတ်းပူဝ်ႇၵႃႈၼႂ်းမိူင်းဢေႇတုမ်ႇၼၼ်ႉဢေႃႈ။

ၶုၼ်လူင်မိူင်းဢေႇတုမ်ႇ

(တူၺ်း၊ 1 ရႃႇၶျုၵ်ႈ 1:43-54)

31ၶုၼ်လူင်ဢၼ်ဢုပ်ႉပိူင်ႇၼႂ်းမိူင်းဢေႇတုမ်ႇ ၸူဝ်ႈဢၼ်ၶုၼ်လူင်ဢၼ်ဢုပ်ႉပိူင်ႇၼႂ်းၸိူဝ်ႉၶိူဝ်းဢီႉသရေႇလႃႉ ဢမ်ႇပႆႇမီး ၼၼ်ႉၸမ်ႉ၊- 32ပေႇလႃႉ ဢၼ်ပဵၼ်လုၵ်ႈၸၢႆးပေႃးရႃႉ ႁဵတ်းၶုၼ်ၼႂ်းမိူင်းဢေႇတုမ်ႇၼၼ်ႉဢေႃႈ။ ဝဵင်းမၼ်းၸမ်ႉ၊ ပဵၼ် ဝဵင်းတိၼ်ႇႁႃႇပႃႉဢေႃႈ။- 33ၶုၼ်ပေႇလႃႉတၢႆလႄႈ ယေႃးပပ်ႉဢၼ်ပဵၼ်လုၵ်ႈၸၢႆးၸေးရႃႉ ၵူၼ်းတီႈပေႃႇၸရႃႉၼၼ်ႉ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။- 34ၶုၼ်ယေႃးပပ်ႉတၢႆလႄႈႁူႉသမ်ႇ ၵူၼ်းမိူင်းတေႇမၢၼ်ႇ၊ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။- 35ၶုၼ်ႁူႉသမ်ႇတၢႆလႄႈႁႃႇတတ်ႉဢၼ်ပဵၼ်လုၵ်ႈၸၢႆးပေးတတ်ႉဢၼ် တိုၵ်းတေႃးယႃႉပႅတ်ႈၵူၼ်းမီႉတျၼ်ႇတင်းလၢႆ ၵႃႈၼႂ်းပၢင်ႇပဵင်းမေႃႇၽႃႉၼၼ်ႉ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။ ဝဵင်းမၼ်းၸမ်ႉ၊ ပဵၼ်ဝဵင်းဢႃႇဝိတ်ႉဢေႃႈ။- 36ၶုၼ်ႁႃႇတတ်ႉတၢႆလႄႈ ၸမ်းလႃႉၵူၼ်းတီႈမႃႇသရိၵ်ႉ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။- 37ၶုၼ်ၸမ်းလႃႉတၢႆလႄႈ သေႃးလႃႉ ၵူၼ်းတီႈရႁေႃးၽုတ်ႉ ဢၼ်မီးၵႃႈႁိမ်းၼမ်ႉႁွင်ႈၼၼ်ႉ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။- 38ၶုၼ်သေႃးလႃႉတၢႆလႄႈပႃႇလႁႃႇၼၼ်ႇ ဢၼ်ပဵၼ်လုၵ်ႈၸၢႆးဢႃႇၶပေႃႇၼၼ်ႉ ႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။- 39ၶုၼ်ပႃႇလႁႃႇၼၼ်ႇ ဢၼ်ပဵၼ်လုၵ်ႈၸၢႆးဢႃႇၶပေႃႇၼၼ်ႉတၢႆလႄႈ ႁႃႇတႃႉႁဵတ်းၶုၼ်တီႈဢရႃႇမၼ်းၼၼ်ႉဢေႃႈ။ ဝဵင်းမၼ်းၸမ်ႉ၊ ပဵၼ်ဝဵင်းပေႃႇဢေႃႈ။ ၸိုဝ်ႈသဵင်မေးမၼ်းၸမ်ႉ၊ ပဵၼ်မႁေႇတႃႉပေႇလႃႉ လုၵ်ႈယိင်းမႃႇတရိၵ်ႉ လုၵ်ႈယိင်းမေႇၸႁပ်ႉဢေႃႈ။

40ၸိုဝ်ႈသဵင်ပူဝ်ႇဢၼ်သိုပ်ႇဢွၵ်ႇၵႃႈတီႈဢေးသေႃး ၵႃႈၼင်ႇဢၼ်ၸွမ်းလူၺ်ႈၸိူဝ်ႉၶိူဝ်းထႃႇၼႃႉတီႈယူႇ၊ ၼႃႇမႃႉၸိုဝ်ႈသဵင်ၶဝ် ႁင်းၽႂ်ႁင်းမၼ်းၼၼ်ႉၸမ်ႉ၊ ပဵၼ်ပူဝ်ႇတိမ်းၼႃႉ၊ ပူဝ်ႇဢႃႇလဝႃႉ၊ ပူဝ်ႇယေႇသိတ်ႉ၊- 41ပူဝ်ႇဢႃႁေႃးလီႉပႃႇမႃႉ၊ ပူဝ်ႇဢေးလႃႇ၊ ပူဝ်ႇပီႉၼုၼ်ႇ၊- 42ပူဝ်ႇၵေးၼတ်ႉ၊ ပူဝ်ႇတေႇမၢၼ်ႇ၊ ပူဝ်ႇမီႉပၸႃႇ၊- 43ပူဝ်ႇမႃႇၵတျေႇလႃႉ တင်းပူဝ်ႇဢီႉရမ်ႇဢေႃႈ။ ၶဝ်ၸိူဝ်းၼႆႉ ပဵၼ်ပူဝ်ႇမိူင်းဢေႇတုမ်ႇ တီႈယူႇၽႂ်တီႈယူႇမၼ်း၊ ၵႃႈၼႂ်းမိူင်းဢၼ်ၶဝ်ပိူင်ႇၼၼ်ႉဢေႃႈ။ ဢေးသေႃးၼၼ်ႉပဵၼ်ပေႃႈၵူၼ်းမဵဝ်းဢေႇတုမ်ႇဢေႃႈ။

Currently Selected:

ငဝ်ႈၵမ်ႇၽႃႇ 36: CBMS

Highlight

Copy