ၵလႃႇတီႉ 5

ပႂ်ႉထိင်းတၢင်းလွတ်ႈလႅဝ်းသူ

1ပိူဝ်ႈၼႆလႄႈ တႄႇယူႇၼႂ်းဢၶႂၢင်ႉတၢင်းဢၼ်ပွႆႇလွတ်ႈ ဢၼ်ၸဝ်ႈၶရိၸ်ႈပွႆႇလွတ်ႈႁဝ်းၼၼ်ႉယူႇသေလႄႈ ယႃႇပေသမ်ႉၶိုၼ်းၶၢမ်ႇတၢင်းဢၼ်မတ်ႉၽုၵ်ႇဝႆႉၼၼ်ႉလႄႈ ႁၢပ်ႇၵၢၼ်းတီႈဢၼ်တၵ်းလႆႈၶၢမ်ႇႁဵတ်းၶႃႈၼၼ်ႉသေၵမ်း။- 2ၵဝ်ပေႃးလူႉဝႃႈၸမ်ႉ၊ ပေႃးသူၶၢမ်ႇတၢင်းဢၼ်ထိူဝ်ႁိမ်းၸိုင် ၸဝ်ႈၶရိၸ်ႈတၵ်းဢမ်ႇပွင်ႇလွင်ႈၵႃႈသင်တီႈသူလႃးလႃး။- 3ၵဝ်သမ်ႉၶၢမ်ႇသၢၵ်ႈသေႇတီႈၶဝ်ၸိူဝ်းဢၼ် ၶၢမ်ႇတၢင်းဢၼ်ထိူဝ်ႁိမ်းၵႃႈမီးတင်းသဵင်ႈတင်းလူင်ၼၼ်ႉၸမ်ႉ၊ ၵေႃႉၸိူဝ်ႉၼင်ႇၼၼ်ၼၼ်ႉ ပဵၼ်ၵေႃႉဢၼ်ထုၵ်ႇၼီႈဝႆႉ ႁႂ်ႈလႆႈၵမ်ၵျၢင်ႉပိင်းၺၢပ်ႈတြႃးတင်းသဵင်ႈတင်းမူတ်းဢေႃႈ။- 4သူၸိူဝ်းဢၼ်ဢိင်ပိင်းၺၢပ်ႈတြႃးသေလႄႈ ႁွတ်ႈထိုင်တၢင်းဢၼ်သိုဝ်ႈတေႃႇၵႃႈမီးတင်းသဵင်ႈတင်းလူင်ၼၼ်ႉ ၽၢတ်ႇယၢၼ်ၵၼ်တင်းၸဝ်ႈၶရိၸ်ႈလႄႈ ဢမ်ႇတႄႇယူႇၼႂ်းၵျေးၸူးတြႃး၊ သုတ်ႉၶၢႆႉပိူင်ႈၵႂႃႇသဵင်ႈယဝ်ႉ။- 5ႁဝ်းၸမ်ႉ၊ ဢိင်ဝီႉၺိၺ်ႇၸဝ်ႈသေလႄႈ ပႂ်ႉထႃႈၵျေးၸူးၸဝ်ႈ ဢၼ်မုင်ႈထႃႈမွင်းထႃႈ တၢင်းဢၼ်သိုဝ်ႈတေႃႇဢၼ်ပဵၼ်ၵွပ်ႈပိူဝ်ႈ တၢင်းဢၼ်ယုမ်ႇမၢတ်ႈၼၼ်ႉယူႇဢေႃႈ။- 6ၵႃႈတီႈယေႇသူႉၶရိၸ်ႈၼၼ်ႉ၊ တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းဢမ်ႇမီးဢၵျူဝ်း။ တၢင်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈယူႇၵေႃႈ ဢမ်ႇမီးဢၵျူဝ်း။ တၢင်းဢၼ်ယုမ်ႇမၢတ်ႈ ဢၼ်ဢိင်မႅတ်ႈတႃႇသေလႄႈ ၸၢင်ႈပွင်ၸၢင်ႈႁဵတ်းၼၼ်ႉၵူၺ်း မီးဢၵျူဝ်းဢေႃႈ။

7မိူဝ်ႈဢွၼ်ၼႆႉၼၼ်ႉ သူၶုၼ်ႇလႅၼ်ႈလီလီငၢမ်းငၢမ်းဢေႃႈ။ ပေႃးပဵၼ်ၸိူဝ်ႉၼင်ႇၼႆၸိုင် ၽူႈလႂ်ႁႄႉၶႅၼ်ႁႂ်ႈသူဢမ်ႇလႆႈထွမ်ႇဢဝ်သမ်ႇမႃႇတြႃး။- 8တၢင်းဢၼ်ၸူဝ်းဢဝ်သူၼၼ်ႉၸမ်ႉ၊ ဢွၵ်ႇသေၵႃႈတီႈၸဝ်ႈဢၼ်ႁွင်ႉဢဝ်သူၼၼ်ႉမႃးဢမ်ႇၸႂ်ႈ။- 9ၸိူဝ်ႉပႅင်ႈဢိတ်းၼိုင်ႈၵူၺ်း ၸၢင်ႈႁႂ်ႈၶဝ်ႈမုၼ်းလိပ်းတင်းၵွင်ပွင်းၶိုၼ်ႈဢေႃႈ။- 10ၵဝ်ဢိင်ၸဝ်ႈၽြႃးသေလႄႈ မီးတၢင်းဢၼ်ၸႂ်ၸပ်းၸႂ်ၸွႆး လွင်ႈဢၼ်သူတၵ်းပႄႇပႅတ်ႈသေဢယူႇ ဢၼ်ပႅၵ်ႇဢၼ်ပိူင်ႈ တင်းလၢႆၼၼ်ႉယူႇဢေႃႈ။ ၵေႃႉဢၼ်ယႃႉယူၵ်ႉသူၼၼ်ႉၸမ်ႉ၊ တၵ်းလႆႈၶၢမ်ႇတၢမ်ႇဢပႅတ်ႈတူဝ်ၸဝ်ႈၵဝ်ႇဢေႃႈ။- 11ပိူင်ၼိုင်ႈၸမ်ႉ၊ ပီႈၼွင်ႉၶဝ်ဢိူၺ်း၊ ပေႃးၵဝ်ယင်းႁေႃးလၢတ်ႈတြႃးတၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းယူႇၸိုင် ႁဵတ်းသင်လႄႈၵဝ် ယင်းလႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးယူႇၸိူဝ်ႉၼင်ႇႁိုဝ်။ ပေႃးႁေႃးလၢတ်ႈၸိူဝ်ႉၼင်ႇၼၼ်ၸိုင်၊ ၵဝ်ပႄႇပႅတ်ႈလွင်ႈဢၼ် တၵ်းတိူဝ်ႉမႅၼ်ႈသဝ်လၵ်းဝႃးၵၢပ်ႈလႄႈလူမ်ႉၼၼ်ႉယူႇဢေႃႈ။- 12ၵဝ်မီးဢလူဝ်ႇၶႂ်ႈႁႂ်ႈၶဝ်ၸိူဝ်းဢၼ် ႁႂ်ႈသူၽိတ်းတၢင်းပိူင်ႈတၢင်းၼၼ်ႉ လႆႈၶၢမ်ႇတၢင်းဢၼ်ႁေႃႈဢွၵ်ႇပႄႇပႅတ်ႈသေဢေႃႈ။

13ပီႈၼွင်ႉၶဝ်ဢိူၺ်း၊ သူပဵၼ်ၵေႃႉဢၼ်လႆႈဢၶႂၢင်ႉ တၢင်းဢၼ်ပွႆႇလွတ်ႈဢေႃႈ။ ၼႂ်းဝႃႈၼၼ်သေၵေႃႈ ယႃႇပေပၼ်ဢၶႂၢင်ႉတီႈၸႃႇတီႉပၵတီႉလႄႈ သုင်းသွင်ႇတၢင်းဢၼ်ပွႆႇလွတ်ႈၼၼ်ႉ။ ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်ႁၵ်ႉၵၼ်သေလႄႈ ဢွၼ်ၵၼ်ပွင်ႁဵတ်းဢမူႉတႃႉ။- 14လွင်ႈမၼ်းၸမ်ႉ ပိင်းၺၢပ်ႈတြႃးတင်းသဵင်ႈတင်းမူတ်းပျေႉၸုမ်ႇဝႆႉၼႂ်း ပိင်းၺၢပ်ႈပႃးၼိုင်ႈဢၼ်ဝႃႈ ၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉၸိုင် ႁၵ်ႉမိူၼ်ၸိူဝ်ႉၼင်ႇတူဝ်ၸဝ်ႈၵဝ်ႇတႃႉ၊ ဝႃႈၼင်ႇၼႆၼၼ်ႉဢေႃႈ။- 15ပေႃးဢမ်ႇၼၼ်ပေႃးၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်ၶူပ်းၵိၼ်ၵၼ်ယူႇၸိုင်၊ ၵူဝ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ် တၵ်းလူႉတၵ်းလႅဝ်လႄႈ ဢွၼ်ၵၼ်ႁဵတ်းသတီႉတႃႉ။

ဝီႉၺိၺ်ႇၸဝ်ႈလႄႈသၽေႃးၼိူဝ်ႉလိူတ်ႈၵူၼ်း

16ၵဝ်ပိင်းၺၢပ်ႈၸမ်ႉ၊ ၵမ်ၵျၢင်ႉၸွမ်းၼင်ႇဝီႉၺိၺ်ႇပၵတီႉတႃႉ။ ပေႃးၵမ်ၵျၢင်ႉၸိူဝ်ႉၼင်ႇၼၼ်ၸိုင်၊ သူတၵ်းဢမ်ႇၸွမ်းၼင်ႇဢလူဝ်ႇၸႃႇတီႉ ပၵတီႉလႄႈယူႇဢေႃႈ။- 17လွင်ႈမၼ်းၸမ်ႉ ၸႃႇတီႉပၵတီႉတင်း ဝီႉၺိၺ်ႇပၵတီႉ ပႃးၼိုင်ႈလႄႈပႃးၼိုင်ႈမီးဢလူဝ်ႇဢၼ်ၶတ်းၵၼ်ဢေႃႈ။ ပႃးၼိုင်ႈလႄႈပႃးၼိုင်ႈ ၶတ်းၶဵင်ႇၵၼ်ယူႇထၼ်ႈပေႃး ႁႂ်ႈသူဢမ်ႇလႆႈၵမ်ၵျၢင်ႉတၢင်းၵမ်တၢင်းၵျၢင်ႉဢၼ်သူ ၶႂ်ႈၵမ်ၶႂ်ႈၵျၢင်ႉၼၼ်ႉလႆႈ။- 18ၼႂ်းဝႃႈၼၼ်သေၵေႃႈ ပေႃးသူၸွမ်းဢလူဝ်ႇဝီႉၺိၺ်ႇပၵတီႉၸိုင် သူလွတ်ႈတင်း ပိင်းၺၢပ်ႈတြႃးဢေႃႈ။

19တၢင်းၵမ်တၢင်းၵျၢင်ႉၸႃႇတီႉပၵတီႉၸိူဝ်းၼၼ်ႉ ထၢင်ႇသႃးယူႇဢေႃႈ။ တၢင်းၵမ်တၢင်းၵျၢင်ႉၸိူဝ်းၼၼ်ႉၸမ်ႉ၊ ပဵၼ်တၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃး၊ တၢင်းဢၼ်ၵမ်ၵျၢင်ႉဢၼ်ၵူဝ်ႈၵိူၵ်ႇ၊ တၢင်းဢၼ်ၵီႉလေႇသႃႇပူၼ်ႉလိူဝ်၊- 20တၢင်းဢၼ်ၵူဝ်းၵႂၢႆႇရုၵ်ႈထူႉ၊ တၢင်းဢၼ်မီးၽိူဝ်ႉလႄႈႁဵတ်းတီႈပိူၼ်ႈ၊ တၢင်းဢၼ်ၸင်းပိူၼ်ႈ၊ တၢင်းဢၼ်ၽိတ်းၵၼ်၊ တၢင်းဢၼ်ၶေႉၶဵင်ႇၵၼ်၊ တၢင်းဢၼ်တင်းၸႂ်မႆႈၶႆႈၸႃႉဢွၵ်ႇ၊ တၢင်းဢၼ်တွပ်ႇထဵင်ၵၼ်၊ တၢင်းဢၼ်ၵေႃႉၼိုင်ႈလႄႈ ၵေႃႉၼိုင်ႈၽၢတ်ႇၽႄၵၼ်၊ တၢင်းဢၼ်ၽႄၵိူင်းၶႂၢႆးၵိူင်း၊- 21တၢင်းဢၼ်သီႈၵေႉႁေႈတႃ၊ တၢင်းဢၼ်ဢဝ်ဢသၢၵ်ႈၵူၼ်းတၢႆ၊ တၢင်းဢၼ်ၵိၼ်လဝ်ႈမဝ်းၵမ်၊ တၢင်းဢၼ်ႁဵတ်းပွႆးႁဵတ်းလၢမ်း ၸိူဝ်းၼၼ်ႉဢေႃႈ။ ၸိူဝ်ႉၼင်ႇဢၼ်ၵဝ်လၢတ်ႈဝႆႉ မိူဝ်ႈဢွၼ်ၼႆႉၼၼ်ႉလႄႈဝႃႈ၊ ၶဝ်ၸိူဝ်းဢၼ်ၵမ်ၵျၢင်ႉတၢင်းၵမ်တၢင်းၵျၢင်ႉၸိူဝ်ႉၼင်ႇၼၼ်ၼၼ်ႉ တၵ်းဢမ်ႇလႆႈၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈ၊ ဝႃႈၼင်ႇၼႆၼၼ်ႉ၊ တေႃႈလဵဝ်ၼႆႉၵေႃႈ ၵဝ်လၢတ်ႈဝႆႉထႅင်ႈဢေႃႈ။

22ဢၵျူဝ်းဝီႉၺိၺ်ႇပၵတီႉၸမ်ႉ၊ ပဵၼ်တၢင်းဢၼ်ႁၵ်ႉပႅင်း၊ တၢင်းဢၼ်သိူဝ်းပျေႃႇ၊ တၢင်းဢၼ်ၼိမ်၊ တၢင်းဢၼ်ၸႂ်ယႂ်ႇၸႂ်ယၢဝ်း၊ တၢင်းဢၼ်ႁဵတ်းၵျေးၸူး၊ တၢင်းဢၼ်မျၢတ်ႈလီ၊ တၢင်းဢၼ်ယုမ်ႇမၢတ်ႈ၊- 23တၢင်းဢၼ်ၸႂ်ၼိမ်သိမ်ႇဢူၼ်ႈဢွၼ်ႇ၊ တၢင်းဢၼ်ၶျုၵ်ႈၵႃႇမၵုင်ႇၸိူဝ်းၼၼ်ႉဢေႃႈ။ တြႃးဢၼ်လႂ်သေၵေႃႈ၊ ဢမ်ႇႁၢမ်ႈတၢပ်ႈ ႁႄႉၶႅၼ်တၢင်းၵမ်တၢင်းၵျၢင်ႉၸိူဝ်ႉၼင်ႇၼၼ်ၼၼ်ႉ။- 24ၶဝ်ၸိူဝ်းဢၼ်ၸၢပ်ႈသႅင်ႇၵၼ်တင်းၸဝ်ႈၶရိၸ်ႈၼၼ်ႉၼၼ်ႉ ဢဝ်ၸႃႇတီႉပၵတီႉ ဢိၵ်ႇတင်းၸႂ်တင်းဢလူဝ်ႇသၼ်ႇတႃႉ ၸႃႇတီႉပၵတီႉယႅၼ်ႉတွၵ်ႇဝႆႉၵႃႈတီႈသဝ်လၵ်းဝႃးၵၢပ်ႈယဝ်ႉ။- 25ပေႃးႁဝ်းဢသၢၵ်ႈလိပ်းၵွပ်ႈပိူဝ်ႈဝီႉၺိၺ်ႇၸဝ်ႈၸိုင်၊ ဢွၼ်ၵၼ်ၵမ်ၵျၢင်ႉၸွမ်းလူၺ်ႈဝီႉၺိၺ်ႇၸဝ်ႈတႃႉႁဝ်း။- 26ဢွၼ်ၵၼ်ဝႄႈပႅတ်ႈ တၢင်းဢၼ်ၸႂ်ၸပ်းၸႂ်ၸွႆး လွင်ႈတၢင်းဢၼ်သႃႈၸွတ်ႇႁူင်ႁၢင်း ဢၼ်လၢႆလၢႆဢမ်ႇပွင်ႇလွင်ႈ၊ တၢင်းဢၼ်ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်ဝႆႉတၢင်းၽိတ်းယႃႉယူၵ်ႉၵၼ်၊ တၢင်းဢၼ်ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်သီႈၵေႉႁေႈတႃၵၼ် ၸိူဝ်းၼၼ်ႉသေလႄႈ ယူႇတႃႉႁဝ်း။

Currently Selected:

ၵလႃႇတီႉ 5: CBMS

Highlight

Copy

Compare