ၵလႃႇတီႉ 4

1ၵဝ်သမ်ႉဝႃႈထႅင်ႈၸမ်ႉ၊ ၵေႃႉဢၼ်တၵ်းၶၢမ်ႇဢမူၺ်ႇၼၼ်ႉ ပိၵ်ႉသမ်ႉပဵၼ်ၵေႃႉဢၼ်ထိူၵ်ႈပိူင်ႇဢုၵ်ႉၸႃႇ ၵႃႈမီးတင်းသဵင်ႈတင်းလူင်သေၵေႃႈ၊ ၼႂ်းၶိင်ႇၵႃႇလႃႉမိူဝ်ႈဢၼ်ယင်းတိုၵ်ႉပဵၼ်လုၵ်ႈဢွၼ်ႇယူႇၼၼ်ႉၸိုင် မိူၼ်ၸိူဝ်ႉၼင်ႇၶႃႈ ဢၼ်လႆႈၶၢမ်ႇတၢင်းၸႂ်ႉတၢင်းသွႆၼၼ်ႉယူႇဢေႃႈ။- 2ၸူဝ်ႈဢၼ်ၶိင်ႇၵႃႇလႃႉဢၼ်ပေႃႈမၼ်းၸီႇယၢင်ႇဝႆႉၼၼ်ႉ ဢမ်ႇပႆႇႁွတ်ႈထိုင်ၼၼ်ႉၸိုင် မၼ်းမီးယူႇၵႃႈၼႂ်းမိုဝ်းၶဝ်ၸိူဝ်းဢၼ်ပႂ်ႉဢၼ်ထိင်း ဢိၵ်ႇတင်းၶဝ်ၸိူဝ်းဢၼ်ဢုပ်ႉဢၼ်ပိူင်ႇၼၼ်ႉယူႇဢေႃႈ။- 3မိူၼ်ၸိူဝ်ႉၼင်ႇၼၼ်၊ ႁဝ်းၼႆႉၵေႃႈ၊ ၼႂ်းမိူဝ်ႈဢၼ်ယင်းတိုၵ်ႉပဵၼ်လုၵ်ႈဢွၼ်ႇယူႇၼၼ်ႉၸိုင် လႆႈၶၢမ်ႇႁဵတ်းၶႃႈၵႃႈၼႂ်းလေႃးၵီႇ တြႃးၼုမ်ႇဢၼ်ဢမ်ႇၸေးဢမ်ႇၸုမ်ႇၼၼ်ႉယူႇဢေႃႈ။- 4မိူဝ်ႈဢၼ်ၶိင်ႇၵႃႇလႃႉၸေးၼၼ်ႉၸိုင် ၽြႃးပဵၼ်ၸဝ်ႈပွႆႇၸႂ်ႉလုၵ်ႈၸဝ်ႈ ဢၼ်ဢဝ်ပတိၵ်ႉသၼ်ႇထေႇၼႂ်းတွင်ႉမႄႈယိင်းသေလႄႈ ၵိူတ်ႇလဵင်ႉမႃးတႂ်ႈပိင်းၺၢပ်ႈတြႃးၼၼ်ႉမႃး၊- 5ႁႂ်ႈလႆႈထုတ်ႇဢဝ်ႁဝ်း ဢၼ်မီးယူႇၼႂ်းမိုဝ်းပိင်းၺၢပ်ႈတြႃး လွင်ႈၼင်ႇႁိုဝ်ႁဝ်းတၵ်းလႆႈၶၢမ်ႇတၢင်းဢၼ်ယွင်ႈဝႆႉၵႃႈၼႂ်းဢရႃႇလုၵ်ႈဢေႃႈ။- 6ပိူဝ်ႈဢၼ်သူပဵၼ်လုၵ်ႈၸိူဝ်ႉၼင်ႇၼၼ်လႄႈ ၽြႃးပဵၼ်ၸဝ်ႈပွႆႇၸႂ်ႉဝီႉၺိၺ်ႇလုၵ်ႈမၼ်းၸဝ်ႈ ဢၼ်ၸၢင်ႈႁွင်ႉဝႃႈ၊ ဢပ်ႉပႃႉပေႃႈ၊ ဝႃႈၼင်ႇၼႆၼၼ်ႉမႃးၵႃႈၼႂ်းႁူဝ်ၸႂ်သူဢေႃႈ။- 7ပေႃးပဵၼ်ၸိူဝ်ႉၼင်ႇၼႆၸိုင်၊ ၵမ်းလိုၼ်းသူဢမ်ႇပဵၼ်ၶႃႈ ဢၼ်လႆႈၶၢမ်ႇတၢင်းၸႂ်ႉတၢင်းသွႆ၊ ပဵၼ်လုၵ်ႈဢေႃႈ။ ပေႃးပဵၼ်လုၵ်ႈၸိုင်၊ ပဵၼ်ၵေႃႉဢၼ်ၶၢမ်ႇဢမူၺ်ႇၵွပ်ႈပိူဝ်ႈၽြႃးပဵၼ်ၸဝ်ႈဢေႃႈ။

တမၢၼ်ႇၸဝ်ႈပေႃးလူႉမႆႈၸႂ်ပုၼ်ႈၸိူဝ်းၸဝ်ႈၵလႃႇတီႉ

8ၵူၺ်းၵႃႈ မိူဝ်ႈဢွၼ်ၼႆႉၼၼ်ႉ မိူဝ်ႈဢၼ်သူဢမ်ႇႁူႉၽြႃးပဵၼ်ၸဝ်ႈၼၼ်ႉၸိုင် သူပွင်ႁဵတ်းဢမူႉၶဝ်ၸိူဝ်းဢၼ်ၸွမ်းလူၺ်ႈ ၸႃႇတီႉဢမ်ႇၸႂ်ႈၽြႃးဢေႃႈ။- 9တေႃႈလဵဝ်ၼႆႉၸမ်ႉ၊ သူႁူႉၽြႃးပဵၼ်ၸဝ်ႈသေယဝ်ႉ ဝႃႈၼႆဢမ်ႇဝႃႈ၊ ၽြႃးပဵၼ်ၸဝ်ႈႁူႉသူသေယဝ်ႉ၊ ႁဵတ်းသင်လႄႈသူသမ်ႉၶၢႆႉပုတ်ႈၶိုၼ်းၵႂႃႇၵႃႈၼႂ်းမိုဝ်းတြႃးၼုမ်ႇဢၼ်ဢမ်ႇမီးႁႅင်း၊ ဢၼ်ဢမ်ႇပၼ်ၵတ်းယဵၼ်ၶျၢမ်းသႃႇလႆႈၼၼ်ႉၸိူဝ်ႉၼင်ႇႁိုဝ်။ သူမီးဢလူဝ်ႇႁႂ်ႈလႆႈ ၶိုၼ်းၶၢမ်ႇႁဵတ်းၶႃႈ ၵႃႈၼႂ်းတြႃးလေႃးၵီႇၼၼ်ႉယဝ်ႉလူင်ပႄႇ။- 10သူပႂ်ႉပီႊ၊ လိူၼ်၊ ဝၼ်း ၶိင်ႇၵႃႇလႃႉၼမ်ၼႃႇလူင်ပႄႇ။- 11ၵဝ်ၵူဝ်တၢင်းဢၼ်ၵဝ်ၵႆႉၵျူဝ်းၸႃးၵႃႈၼႂ်းသူၼၼ်ႉ တၵ်းပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉလႄႈ မီးတီႈမႆႈၸႂ်ၵွပ်ႈပိူဝ်ႈလွင်ႈသူယူႇဢေႃႈ။

12ပီႈၼွင်ႉၶဝ်ဢိူၺ်းၵဝ်ပဵၼ်ၸိူဝ်ႉၼင်ႇသူယူႇဢေႃႈ။ သူၵေႃႈပဵၼ်ၸိူဝ်ႉၼင်ႇၵဝ်တႃႉဝႃႈၼႆ၊ ၵဝ်တွင်းပၢၼ်ႇသူဢေႃႈ။ သူဢမ်ႇၽိတ်းပိူင်ႈၵဝ်လႃးလႃး။- 13သူႁူႉလွင်ႈဢၼ်ၵဝ်ႁေႃးလၢတ်ႈတြႃးသတၢင်းသိူဝ်းပျေႃႇတီႈသူမိူဝ်ႈဢွၼ်ၼႆႉၼၼ်ႉ ၵွပ်ႈပိူဝ်ႈတၢင်းၶႆႈတၢင်းပဵၼ် တူဝ်ၸဝ်ႈၵဝ်ႇယူႇဢေႃႈ။- 14သူဢမ်ႇႁဵတ်းဢမ်ႇပေႃးၼင်ႇႁိုဝ် တီႈတၢင်းဢၼ်ၸၢမ်းတူၺ်း ဢၼ်ၵဝ်လႆႈၶၢမ်ႇၼႂ်းတူဝ်ၵႃႇယႃႉၼၼ်ႉလႄႈ ဢမ်ႇပႄႇဢမ်ႇပႅတ်ႈၵဝ်။ သူႁပ်ႉတုင်းဢဝ်ၵဝ် မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈမိူၼ်ၸိူဝ်ႉၼင်ႇယေႇသူႉၶရိၸ်ႈၼၼ်ႉဢေႃႈ။- 15ပေႃးပဵၼ်ၸိူဝ်ႉၼင်ႇၼႆၸိုင်၊ မင်ႇၵလႃႇဢၼ်သူလႆႈၶၢမ်ႇဢဝ်ၼၼ်ႉၸမ်ႉ၊ မီးၵႃႈလႂ်။ မိူဝ်ႈဢွၼ်ၼႆႉၼၼ်ႉ ပေႃးဢဝ်မၢၵ်ႇတႃတူဝ်ၸဝ်ႈၵဝ်ႇဢွၵ်ႇသေလႄႈ ပၼ်တီႈၵဝ်လႆႈၸိုင် သူမီးဢလူဝ်ႇၶႂ်ႈပၼ်ဢေႃႈဝႃႈၼႆ၊ ၵဝ်ၶၢမ်ႇသၢၵ်ႈသေႇဢေႃႈ။- 16တေႃႈလဵဝ်ၼႆႉၸမ်ႉ၊ ၵွပ်ႈပိူဝ်ႈဢၼ်ၵဝ်ႁေႃးလၢတ်ႈသမ်ႇမႃႇတြႃးတီႈသူၼၼ်ႉလႄႈ ၵဝ်ပဵၼ်ရၢၼ်ႇသူႇသူႁိုဝ်။- 17ပိူၼ်ႈႁၵ်ႉသူၼႃႇလူင်လၢင်ဝႃႈၼႆ၊ ႁႂ်ႈၸႂ်ႈသေလူးၵွၼ်ႇတႃႉ။ ၶဝ်ႁၵ်ႉသူလီလီငၢမ်းငၢမ်းဢမ်ႇၸႂ်ႈ။ ၼင်ႇႁိုဝ်သူတၵ်းႁၵ်ႉၶဝ်ၼႃႇလူင်လၢင်ၸိုင် ၶဝ်ၼၼ်ႉမီးဢလူဝ်ႇဢၼ်ၶႂ်ႈႁႂ်ႈသူ လႆႈၶၢမ်ႇတၢင်းဢၼ်ပႄႇပႅတ်ႈဢေႃႈ။- 18ၼႂ်းဝႃႈၼၼ်သေၵေႃႈ သူထုၵ်ႇလီႁၵ်ႉလွင်ႈဢၼ်လီဢၼ်ငၢမ်းၼၼ်ႉၼႃႇလူင်လၢင် ၼႂ်းမိူဝ်ႈဢၼ်ၵဝ်မီးယူႇလူၺ်ႈၵၼ်တင်းသူၼၼ်ႉၵူၺ်းဢမ်ႇၸႂ်ႈ။ ထုၵ်ႇလီႁၵ်ႉၼႃႇလူင်လၢင်သေႇသေႇဢေႃႈ။- 19လုၵ်ႈဢွၼ်ႇလၢင်းဢွၼ်ႇဢၼ်ၵဝ်ႁၵ်ႉ ဢၼ်ၵဝ်သမ်ႉလႆႈၶိုၼ်းၶၢမ်ႇဝူၺ်ႇတၼႃႇ တၢင်းဢၼ်ၵိူတ်ႇလဵင်ႉပုၼ်ႈသူ တေႃႇထိုင်ႁွတ်ႈ ၸဝ်ႈၶရိၸ်ႈတႄႇယူႇၼႂ်းသူၼၼ်ႉၶဝ်ဢိူၺ်း၊- 20ပိူဝ်ႈဢၼ်ၵဝ်မီးတၢင်းဢၼ်ယုမ်ႇၶိုင်ႈၼိုင်ႈ ဢမ်ႇယုမ်ႇၶိုင်ႈၼိုင်ႈတီႈသူလႄႈ ၵဝ်မီးဢလူဝ်ႇၶႂ်ႈထူပ်းႁၼ်သူတေႃႈလဵဝ်ၼႆႉလႄႈ ၶၢႆႉပုတ်ႈသဵင်ၵႂၢမ်းဢၼ်ပႅၵ်ႇၵၼ်ပိူင်ႈၵၼ်ဢေႃႈ။

ႁႃႇၵရႃႉတင်းၸႃႇရႃႇ

21သူၸိူဝ်းဢၼ်ၶႂ်ႈယူႇတႂ်ႈပိင်းၺၢပ်ႈတြႃးၶဝ်ဢိူၺ်း၊ သူဢမ်ႇႁူႉဢမ်ႇငိၼ်းပိင်းၺၢပ်ႈတြႃးႁိုဝ်။- 22ဢၼ်မႃးၼႂ်းၵျၢမ်းပိင်းၺၢပ်ႈတီႉလႄႈဝႃႈၸမ်ႉ၊ တီႈဢႃႇပြႃႇႁၢမ်ႇမီးလုၵ်ႈၸၢႆးသွင်ၵေႃႉဢေႃႈ။ လုၵ်ႈၸၢႆးၵေႃႉၼိုင်ႈၸမ်ႉ၊ ပဵၼ်လုၵ်ႈၸၢႆး မႄႈယိင်းဢၼ်ၶၢမ်ႇႁဵတ်းၶႃႈဢေႃႈ။ ၵေႃႉၼိုင်ႈၸမ်ႉ၊ ပဵၼ်လုၵ်ႈၸၢႆး မႄႈယိင်းဢၼ်ဢမ်ႇၸႂ်ႈၶႃႈ၊ ဝႃႈၼင်ႇၼႆဢေႃႈ။- 23လုၵ်ႈၸၢႆးမႄႈယိင်းၶႃႈၼၼ်ႉ ပဵၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၸႃႇတီႉပၵတီႉဢေႃႈ။ လုၵ်ႈၸၢႆးမႄႈယိင်းဢၼ်ဢမ်ႇၸႂ်ႈၶႃႈၼၼ်ႉ ပဵၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၵတီႉၸဝ်ႈဢေႃႈ။- 24လွင်ႈတၢင်းၸိူဝ်းၼၼ်ႉပဵၼ်ပုင်ႇဢူႉပမႃႇဢေႃႈ။ မႄႈယိင်းသွင်ၵေႃႉၼၼ်ႉၸမ်ႉ၊ ၶႂ်ႈဝႃႈပတီႉၺိၺ်ႇတြႃးသွင်ပႃးဢေႃႈ။ မႄႈယိင်းဢၼ်လႆႈၸိုဝ်ႈ ႁႃႇၵရႃႉဢၼ်ဝႃႈ ပတီႉၺိၺ်ႇတြႃးပႃးၼိုင်ႈၼၼ်ႉ ပဵၼ်တြႃးဢၼ်ၸီႇယၢင်ႇၵႃႈတီႈၼိူဝ်လွႆသီႉၼႃႉလႄႈ ၸင်ႇၵိူတ်ႇလဵင်ႉမႃးၶႃႈၵူၺ်းဢေႃႈ။- 25လွင်ႈမၼ်းၸမ်ႉ ႁႃႇၵရႃႉၼၼ်ႉပဵၼ်လွႆသီႉၼႃႉ ဢၼ်မီးယူႇၼႂ်းမိူင်းဢရေႇပျႃႉၼၼ်ႉဢေႃႈ။ မိူၼ်ၵၼ်တင်းဝဵင်းယေႇရူႉသလႅမ်ႇ ဢၼ်မီးယူႇတေႃႈလဵဝ်ၼႆႉဢေႃႈ။ မၼ်းဢိၵ်ႇတင်းလုၵ်ႈမၼ်းတင်းလၢႆၼၼ်ႉ လႆႈၶၢမ်ႇႁဵတ်းၶႃႈဢေႃႈ။- 26ဝဵင်းယေႇရူႉသလႅမ်ႇဢၼ်မီးၵႃႈၼိူဝ်ၸမ်ႉ၊ ပဵၼ်မႄႈယိင်းဢၼ်ဢမ်ႇၸႂ်ႈၶႃႈဢၼ်ဝႃႈ မႄႈႁဝ်းတင်းသဵင်ႈတင်းလူင်ဢေႃႈ။- 27ဢၼ်ၵျၢမ်းလိၵ်ႈမႃးလႄႈဝႃႈၸမ်ႉ၊ မႄႈမၼ် ဢၼ်ဢမ်ႇၵိူတ်ႇလဵင်ႉလုၵ်ႈဢိူၺ်း၊ သိူဝ်းပျေႃႇတႃႉ။ မႄႈယိင်းဢၼ်ဢမ်ႇပႆႇၶၢမ်ႇဝူၺ်ႇတၼႃႇ တၢင်းဢၼ်ၵိူတ်ႇလဵင်ႉလုၵ်ႈဢိူၺ်း၊ ႁွင်ႉပဝ်ႇႁွင်ႉသႅၼ်ႇတႃႉ။ လွင်ႈမၼ်းၸမ်ႉ မႄႈယိင်းဢၼ်ၸုၼ်ႉပႅတ်ႈဝႆႉၼၼ်ႉ ယဵင်ႈၶႅၼ်းၵိူတ်ႇလဵင်ႉလုၵ်ႈလဵင်ႉလၢင်းၼမ်ၼႃႇသေ မႄႈယိင်းဢၼ်မီးၽူဝ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

28ပီႈၼွင်ႉၶဝ်ဢိူၺ်း၊ သူပဵၼ်လုၵ်ႈဢၼ်ၸၢပ်ႈသႅင်ႇၵၼ်တင်းၵတီႉၸဝ်ႈမိူၼ်ၸိူဝ်ႉၼင်ႇ ဢီႉၸၢၵ်ႈၼၼ်ႉဢေႃႈ။- 29ၸိူဝ်ႉၼင်ႇဢၼ်လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈၸႃႇတီႉပၵတီႉၼၼ်ႉ ၼိၵ်ႈၸၢၵ်ႈငႅၼ်းသႄး လုၵ်ႈဢၼ်ၵိူတ်ႇလဵင်ႉမႃးၸွမ်းလူၺ်ႈဝီႉၺိၺ်ႇၸဝ်ႈမိူဝ်ႈၼၼ်ႉ ၼၼ်ႉ၊ တေႃႈလဵဝ်ၼႆႉၵေႃႈပဵၼ်ယူႇဢေႃႈ။- 30ၵူၺ်းၵႃႈ ၵျၢမ်းလိၵ်ႈမႃးၼင်ႇႁိုဝ်ဝႃႈၼႆၸမ်ႉ၊ ႁေႃႈမႄႈယိင်းၶႃႈဢိၵ်ႇတင်းလုၵ်ႈၸၢႆးမၼ်းဢွၵ်ႇပႅတ်ႈသေတႃႉ။ လုၵ်ႈၸၢႆးမႄႈယိင်းၶႃႈၼၼ်ႉ ဢမ်ႇလႆႈၶၢမ်ႇဢမူၺ်ႇလူၺ်ႈၵၼ်တင်းလုၵ်ႈၸၢႆးမႄႈယိင်း ဢၼ်ဢမ်ႇၸႂ်ႈၶႃႈၼၼ်ႉ၊ ဝႃႈၼင်ႇၼႆဢေႃႈ။- 31တေႃႈလဵဝ်ၼႆႉ ပီႈၼွင်ႉၶဝ်ဢိူၺ်း၊ ႁဝ်းပဵၼ်လုၵ်ႈလၢင်းမႄႈယိင်းၶႃႈဢမ်ႇၸႂ်ႈ၊ ပဵၼ်လုၵ်ႈလၢင်းမႄႈယိင်းဢၼ်ဢမ်ႇၸႂ်ႈၶႃႈဢေႃႈ။

Currently Selected:

ၵလႃႇတီႉ 4: CBMS

Highlight

Copy

Compare