ၵလႃႇတီႉ 6
6
ၸွႆႈႁၢပ်ႇတႃႇဝုၼ်ႇပုၼ်ႈၽွၼ်းပၼ်ၵၼ်
1ပီႈၼွင်ႉၶဝ်ဢိူၺ်း၊ ပေႃးၵူၼ်းဢမ်ႇမီးသတီႉလႄႈ ႁဵတ်းဢပႅတ်ႈတူႉၸရိူၵ်ႈသေၸိူဝ်ႉသေပိူင်မႅၼ်ႈၸိုင်၊ သူၸိူဝ်းဢၼ်လႆႈၶၢမ်ႇဝီႉၺိၺ်ႇ သူႉၵျေးၸူးၼႆႉ၊ လွင်ႈၼင်ႇႁိုဝ်တူဝ်ၸဝ်ႈၵဝ်ႇ တၵ်းၵၢင်းလွတ်ႈတင်း တၢင်းဢၼ်ဢပႅတ်ႈၸူဝ်းၵႂႃႇၸူဝ်းပႆၼၼ်ႉၸိုင်၊ ႁဵတ်းသတီႉ တီႈတူဝ်ၸဝ်ႈၵဝ်ႇယူႇသေလႄႈ ဢဝ်တင်းၸႂ်ဢၼ်ၼိမ်သိမ်ႇဢူၼ်ႈဢွၼ်ႇၸွႆႈထႅမ်ၵေႃႉၸိူဝ်ႉၼင်ႇၼၼ်ၼၼ်ႉလႄႈ ႁႂ်ႈမၼ်းၶိုၼ်း တႄႇယူႇၼႂ်းတီႈယူႇမၼ်းၼၼ်ႉသေတႃႉ။- 2ၵေႃႉၼိုင်ႈလႄႈၵေႃႉၼိုင်ႈၽွမ်ႉၵၼ်ႁၢပ်ႇၶူဝ်းဢၼ်ထုၵ်ႇလီႁၢပ်ႇၼၼ်ႉလႄႈ ႁႂ်ႈတြႃးၸဝ်ႈၶရိၸ်ႈပျေႉၸုမ်ႇၸိူဝ်ႉၼင်ႇၼၼ်တႃႉ။- 3ပေႃးသေၵေႃႉသေၵူၼ်း ယင်းဢမ်ႇပွင်ႇလွင်ႈၵႃႈသင်ယူႇလႄႈ ထၢင်ႇၼႂ်းၸႂ်လႄႈဝႃႈ၊ ၵဝ်ၼႆႉပဵၼ်ဢၼ်ၶိုၵ်ႉဢၼ်ၶမ်ႇဢေႃႈ၊ ဝႃႈၼင်ႇၼႆၸိုင်၊ ၵေႃႉၼၼ်ႉပဵၼ်ၵေႃႉဢၼ်ပႅတ်ႉလႅၼ်တူဝ်ၸဝ်ႈၵဝ်ႇဢေႃႈ။- 4ႁႂ်ႈၵူၼ်းၵူႈၵေႃႉၸႅတ်ႈထၢမ်ၸၢမ်းတူၺ်းလွင်ႈတၢင်းဢၼ်တူဝ်ၸဝ်ႈၵဝ်ႇႁဵတ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼႆၸိုင်၊ ယင်းဢမ်ႇဝႃႈ ၵႃႈတီႈၼႂ်းပိူၼ်ႈလႄႈ တၵ်းမီးလွင်ႈဢၼ် တၵ်းလႆႈဢုပ်ႇဝၢဝ်းၵႃႈတီႈၼႂ်းတူဝ်ၸဝ်ႈၵဝ်ႇၵူၺ်းဢေႃႈ။- 5ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵူၼ်းၵူႈၵေႃႉတၵ်းလႆႈႁၢပ်ႇၶူဝ်းတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းဢေႃႈ။
6ႁႂ်ႈၵေႃႉဢၼ်ၶၢမ်ႇသွၼ်ဢဝ်ၼုၵ်ႈၵပၢတ်ႈတြႃးၼၼ်ႉ ၽႄမႅင်ႇလွင်ႈတၢင်းဢၼ်လီဢၼ်ငၢမ်း ၵႃႈမီးတင်းသဵင်ႈတင်းလူင် တီႈၵေႃႉဢၼ်သွၼ်ပၼ်ၼၼ်ႉသေၵမ်းလူၺ်ႈ။- 7ယႃႇပေဢဝ်တၢင်းဢၼ်ၽိတ်းဢၼ်ပိူင်ႈ။ၽြႃးပဵၼ်ၸဝ်ႈဢမ်ႇၶၢမ်ႇဢဝ်တၢင်းဢၼ်ႁဵတ်းဢမ်ႇပေႃးၼင်ႇႁိုဝ်ၼၼ်ႉ။ ၵူၼ်းၸိုင်တၵ်းလႆႈပၢတ်ႇဢဝ် ၵႃႈၼင်ႇဢၼ်မၼ်းဝၢၼ်ႇၸိူဝ်ႉဝၢၼ်ႇၽၼ်းၼၼ်ႉဢေႃႈ။- 8ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈ ၸႃႇတီႉပၵတီႉတူဝ်ၸဝ်ႈၵဝ်ႇၼၼ်ႉ တၵ်းလႆႈပၢတ်ႇဢဝ် တၢင်းဢၼ်တူႇဢၼ်ၼဝ်ႈၸွမ်းလူၺ်ႈၸႃႇတီႉပၵတီႉၼၼ်ႉဢေႃႈ။ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၵႃႈတီႈ ဝီႉၺိၺ်ႇပၵတီႉၸမ်ႉ၊ တၵ်းလႆႈပၢတ်ႇဢဝ် တၢင်းဢၼ်ထႃႇဝရႃႉဢသၢၵ်ႈလိပ်းၸွမ်းလူၺ်ႈဝီႉၺိၺ်ႇပၵတီႉၼၼ်ႉဢေႃႈ။- 9ႁဝ်းၸႂ်ယင်းဢမ်ႇလူႉႁႅင်းဢမ်ႇဢူၼ်ႈလႄႈ ဢွၼ်ၵၼ်ၵႆႉၵျူဝ်းၸႃးၵမ်ၵျၢင်ႉတၢင်းၵမ်တၢင်းၵျၢင်ႉဢၼ်လီဢၼ်ငၢမ်းတႃႉႁဝ်း။ ပေႃးၸႂ်ဢမ်ႇလူႉလႄႈ ႁဵတ်းၸိူဝ်ႉၼင်ႇၼၼ်ၸိုင်၊ မိူဝ်ႈဢၼ်ၶိင်ႇၵႃႇလႃႉထုၵ်ႇၼၼ်ႉ ႁဝ်းတၵ်းလႆႈပၢတ်ႇဢဝ်ဢေႃႈ။- 10ပိူဝ်ႈၼႆလႄႈၵႃႈၼင်ႇဢၼ်သၢင်ႇထုၵ်ႇၼၼ်ႉ ႁဝ်းဢွၼ်ၵၼ်ႁဵတ်းၵျေးၸူး တီႈၵူၼ်းတင်းသဵင်ႈတင်းလူင်ဢမ်ႇၵႃး၊ ယဵင်ႈၶႅၼ်းဢွၼ်ၵၼ်ႁဵတ်းၵျေးၸူး တီႈၵူၼ်းႁိူၼ်းၵူၼ်းယေး တၢင်းယုမ်ႇမၢတ်ႈတင်းလၢႆၼၼ်ႉၼႃႇလူင်လၢင်တႃႉႁဝ်း။
တမၢၼ်ႇၸဝ်ႈပေႃးလူႉပၼ်သတီႉၵမ်းလိုၼ်းသုတ်း
11သူႁၼ်လွင်ႈဢၼ်ၵဝ်ႁဵတ်းတင်းတူဝ်လိၵ်ႈ ဢၼ်ယႂ်ႇပဵင်းတၢၼ်ႇၵႃႈႁိုဝ်ၼၼ်ႉလႄႈ ဢဝ်မိုဝ်းတူဝ်ၸဝ်ႈၵဝ်ႇတႅမ်ႈပၼ်ၵႂႃႇတီႈသူၼၼ်ႉယူႇဢေႃႈ။- 12ၶဝ်ၸိူဝ်းဢၼ်မီးဢလူဝ်ႇ ၶႂ်ႈႁႂ်ႈၼိူဝ်ႉလိူတ်ႈႁၢင်ႈၽၢင်တူဝ်ၸဝ်ႈၵဝ်ႇႁၢင်ႈလီၵႃႈမီးၸိူဝ်းၼၼ်ႉ ၸၢင်ႈႁဵတ်းပႄႉႁဵတ်းၼႅင်ႇ ၸူဝ်းဢဝ်သူ ႁႂ်ႈသူလႆႈၶၢမ်ႇတၢင်းဢၼ်ထိူဝ်ႁိမ်းၵွပ်ႈပိူဝ်ႈဢၼ် ၶဝ်မီးဢလူဝ်ႇၶႂ်ႈၵၢင်းလွတ်ႈတင်း တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်လႆႈၶၢမ်ႇၵွပ်ႈပိူဝ်ႈ သဝ်လၵ်းဝႃးၵၢပ်ႈၸဝ်ႈၶရိၸ်ႈၼၼ်ႉဢေႃႈ။- 13ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉ တူဝ်ၸဝ်ႈၵဝ်ႇဢမ်ႇၵမ်ဢမ်ႇၵျၢင်ႉပိင်းၺၢပ်ႈတြႃးဢမ်ႇၵႃး၊ မီးဢလူဝ်ႇၶႂ်ႈႁႂ်ႈသူၶၢမ်ႇတၢင်းဢၼ်ထိူဝ်ႁိမ်း ႁႂ်ႈၶဝ်လႆႈဢိင်ၼိူဝ်ႉဢိင်လိူတ်ႈ ႁၢင်ႈၽၢင်သူသေလႄႈ ဢုပ်ႇဝၢဝ်းဢေႃႈ။- 14သင်ပဵၼ်ၵဝ်ၸိုင်၊ လိူဝ်သေၼႂ်းသဝ်လၵ်းဝႃးၵၢပ်ႈ ၸဝ်ႈႁဝ်းယေႇသူႉၶရိၸ်ႈၼၼ်ႉ ယႃႇႁႂ်ႈၵဝ်လႆႈမီးတၢင်းဢၼ်ဢုပ်ႇဝၢဝ်းၼႂ်းလွင်ႈတၢင်းသေၸိူဝ်ႉသေပိူင်သေၵမ်း၊ ၵႃႈတီႈသဝ်လၵ်းဝႃးၵၢပ်ႈၼၼ်ႉၸိုင် လေႃးၵႃႉၼႆႉၶၢမ်ႇတၢင်းဢၼ်ယႅၼ်ႉတွၵ်ႇဝႆႉယူႇပုၼ်ႈၵဝ်ဢေႃႈ။ ၵဝ်ၵေႃႈၶၢမ်ႇတၢင်းဢၼ်ယႅၼ်ႉတွၵ်ႇဝႆႉယူႇ ပုၼ်ႈလေႃးၵႃႉၼႆႉဢေႃႈ။- 15လွင်ႈမၼ်းၸမ်ႉ ၵႃႈတီႈယေႇသူႉၶရိၸ်ႈၼၼ်ႉ တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်း ဢမ်ႇမီးဢၵျူဝ်း။ တၢင်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈယူႇၼၼ်ႉၵေႃႈ ဢမ်ႇမီးဢၵျူဝ်း။ တၢင်းဢၼ် ပဵၼ်သတ်ႉတဝႃႇဢၼ်မႂ်ႇၵူၺ်း မီးဢၵျူဝ်းဢေႃႈ။- 16ႁႂ်ႈတၢင်းၼိမ်ဢိၵ်ႇတင်းတၢင်းဢၼ်မၼ်းၸဝ်ႈဢဵတ်းလူၼၼ်ႉ ႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ် ၵမ်ၵျၢင်ႉၸွမ်းၼင်ႇၼႄးဢူႉပတေႇၼၼ်ႉ ၵႃႈမီးတင်းသဵင်ႈတင်းလူင် ဢိၵ်ႇတင်းၵႃႈၼိူဝ်ၵူၼ်းမဵဝ်းဢီႉသရေႇလႃႉ ၽြႃးပဵၼ်ၸဝ်ႈၼၼ်ႉသေၵမ်းလူၺ်ႈ။
17ၸႃႉၸဵမ်တေႃႈလဵဝ်ၼႆႉလႄႈ ယႃႇပေႁႂ်ႈၽူႈလႂ်ယႃႉယူၵ်ႉၵဝ်သေၵမ်း။ ၵဝ်ႁၢပ်ႇႁွႆးတၢမ်ႇၸဝ်ႈယေႇသူႉယူႇ ၵႃႈၼႂ်းတူဝ်ၶၼ်ႇထႃႇၵဝ်ၼႆႉဢေႃႈ။
18ပီႈၼွင်ႉၶဝ်ဢိူၺ်း၊ ႁႂ်ႈၵျေးၸူးၸဝ်ႈႁဝ်း ယေႇသူႉၶရိၸ်ႈ မီးၵႃႈၼႂ်းႁူဝ်ၸႂ်သူ သေၵမ်းလူၺ်ႈ။ ဢႃႇမိၼ်ႇ။
လိၵ်ႈဢေႃးဝႃႇတႃႉၵလႃႇတီႉယဝ်ႉယဝ်ႉဢေႃႈ။
Currently Selected:
ၵလႃႇတီႉ 6: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
