ၵေႃးလေႃးသေး 3

ဢသၢၵ်ႈတၢၼ်းဢၼ်ၵဝ်ႇလႄႈဢၼ်မႂ်ႇ

1ၵႃႈၼင်ႇဢၼ်ဝႃႈမႃးယဝ်ႉၼၼ်ႉ၊ ပေႃးသူလုၵ်ႉၶိုၼ်းလူၺ်ႈၵၼ်တင်းၸဝ်ႈၶရိၸ်ႈ၊ဢမၢၼ်ႇၶၼ်ပဵၼ်ၸိုင်၊ သူဢွၼ်ၵၼ်ႁႃဢဝ်လွင်ႈတၢင်းဢၼ်မီးယူႇၵႃႈၼိူဝ် ၼႂ်းတီႈဢၼ်ၸဝ်ႈၶရိၸ်ႈ၊ ၼင်ႈယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈၸိူဝ်းၼၼ်ႉတႃႉ။- 2ယႃႇပေမီးၸႂ်ဢၼ်ၸပ်းၸွႆး လွင်ႈတၢင်းဢၼ်မီးၵႃႈၼိူဝ်လိၼ်မိူင်းၸိူဝ်းၼႆႉ။ မီးၸႂ်ဢၼ်ၸပ်းၸွႆး လွင်ႈတၢင်းဢၼ်မီးၵႃႈၼိူဝ်ၸိူဝ်းၼၼ်ႉတႃႉ။- 3လွင်ႈမၼ်းၸမ်ႉ သူပဵၼ်ၵေႃႉဢၼ်တၢႆယဝ်ႉလႄႈ ဢသၢၵ်ႈသူၼၼ်ႉသိူင်ႇဝႆႉလပ်ႉဝႆႉ လူၺ်ႈၵၼ်တင်းၸဝ်ႈၶရိၸ်ႈၼႂ်းၽြႃးပဵၼ်ၸဝ်ႈယူႇဢေႃႈ။- 4မိူဝ်ႈဢၼ်ၸဝ်ႈၶရိၸ်ႈဢၼ်ဝႃႈ ဢသၢၵ်ႈႁဝ်းၼၼ်ႉ ထၢင်ႇသႃးမႃးၼၼ်ႉၸိုင်၊ ႁဝ်းၵေႃႈ၊ မုၼ်တၵ်းယႂ်ႇလႄႈ ထၢင်ႇသႃးမႃး လူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။

ၸႂ်သၽေႃးဢၼ်ၵဝ်ႇလႄႈဢၼ်မႂ်ႇ

5ပိူဝ်ႈၼႆလႄႈ ႁႂ်ႈဢၢင်ႇၵႃႇတူဝ်သူ ဢၼ်မီးယူႇၵႃႈၼိူဝ်လိၼ်မိူင်းဢၼ်ဝႃႈ တၢင်းဢၼ်ႁဵတ်းတင်းမေႇထုင်ႇဢၼ်ဢမ်ႇတြႃး၊ တၢင်းဢၼ်ၵမ်ၵျၢင်ႉဢၼ်ၵူဝ်ႈဢၼ်ၵိူၵ်ႇ၊ တၢင်းဢၼ်ၸႂ်ၵီႉလေႇသႃႇမႆႈႁွၼ်ႉ၊ တၢင်းဢၼ်ၸႂ်ၸပ်းၸႂ်ၸွႆးဢၼ်ႁၢႆႉမိူၵ်ႈ၊ တၢင်းဢၼ်လေႃးၽႃႉပူၼ်ႉလိူဝ် ဢၼ်ပဵၼ်တၢင်းဢၼ်ၵူဝ်းၵႂၢႆႇရုၵ်ႈထူႉၸိူဝ်းၼၼ်ႉတၢႆသေတႃႉ။- 6ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈ တၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈ၊ ၸၢင်ႈႁွတ်ႈထိုင် ၵႃႈၼိူဝ်ၶဝ်ၸိူဝ်းဢၼ်တွပ်ႇဢၼ်ထဵင် ၼၼ်ႉဢေႃႈ။- 7သူၵေႃႈမိူဝ်ႈဢၼ်ဢသၢၵ်ႈယင်းလိပ်းယူႇၼႂ်းလွင်ႈတၢင်းၸိူဝ်းၼၼ်ႉၸိုင်၊ ၵႂႃႇမႃးယူႇၼႂ်းလွင်ႈတၢင်းၸိူဝ်းၼၼ်ႉဢေႃႈ။- 8တေႃႈလဵဝ်ၼႆႉၸမ်ႉ၊ ပႄႇပႅတ်ႈလွင်ႈတၢင်းၸိူဝ်းၼၼ်ႉတင်းသဵင်ႈတင်းလူင် ဢိၵ်ႇတင်းတၢင်းဢၼ်တေႃးသႃႉဢွၵ်ႇ၊ တၢင်းဢၼ် ၸႂ်မႆႈၶႆႈၸႃႉ၊ တၢင်းဢၼ်သီႈၵေႉႁေႈတႃ၊ တၢင်းဢၼ်ယႃႉသရေႇပိူၼ်ႈႁႂ်ႈလူႉ၊ တၢင်းဢၼ်လၢတ်ႈၵႂၢမ်းဢၼ်ၵူဝ်ႈဢၼ်ၵိူၵ်ႇ ၸိူဝ်းၼၼ်ႉ သေ ၵႃႈၼႂ်းသူပ်းသူတႃႉ။- 9ၵေႃႉၼိုင်ႈလႄႈၵေႃႉၼိုင်ႈ ယႃႇပေလၢတ်ႈၵႂၢမ်းမူႉသႃႇတေႃႇၵၼ်။ လွင်ႈမၼ်းၸမ်ႉ သူထွတ်ႇပႅတ်ႈတူဝ်ၵူၼ်းဢၼ်ၵဝ်ႇဢိၵ်ႇတင်း တၢင်းၵမ်တၢင်းၵျၢင်ႉမၼ်းၸိူဝ်းၼၼ်ႉသေလႄႈ၊- 10ပဵၼ်ၵေႃႉဢၼ်ဢဝ်ၵူၼ်းဢၼ်မႂ်ႇ ဢၼ်ၶၢမ်ႇတၢင်းဢၼ်ႁဵတ်းပဵၼ်ဢၼ်မႂ်ႇ ပုၼ်ႈဢၼ်တၵ်းမီးပိင်ႇၺႃႇဢၼ်မၢၼ်ႇ ဢၼ်မႅၼ်ႈ ၸိူဝ်ႉၼင်ႇပုင်ႇႁၢင်ႈ ၵေႃႉဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ ၼုင်ႈမႆဢေႃႈ။- 11ၼႂ်းလွင်ႈတၢင်းဢၼ်ၽၢၼ်ႇသၢင်းႁဵတ်းပဵၼ်ၼၼ်ႉ၊ ဢမ်ႇမီးၵူၼ်းႁေႇလသႃႉ၊ ဢမ်ႇမီးၵူၼ်းယူႉတႃႉ၊ ဢမ်ႇမီးတၢင်းဢၼ်ၶၢမ်ႇတၢင်းဢၼ် ထိူဝ်ႁိမ်း၊ ဢမ်ႇမီးတၢင်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်း၊ ဢမ်ႇမီးၵူၼ်းရိူင်း၊ ဢမ်ႇမီးၵူၼ်းသၵူႉသီႉ၊ ဢမ်ႇမီးၶႃႈ၊ ဢမ်ႇမီးၵူၼ်းလွတ်ႈ။ ၸဝ်ႈၶရိၸ်ႈပဵၼ်တင်းသဵင်ႈတင်းလူင် ၼႂ်းတင်းသဵင်ႈတင်းလူင်ဢေႃႈ။

12ပိူဝ်ႈၼႆလႄႈ ၸိူဝ်ႉၼင်ႇၵေႃႉဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်၊ ၵေႃႉဢၼ်မူတ်းၸၢင်ႇ၊ ၵေႃႉဢၼ်ထုၵ်ႇလီႁၵ်ႉလီပႅင်းၼၼ်ႉ၊ သူဢွၼ်ၵၼ်ဢဝ်တၢင်းဢၼ်ၸၢင်ႈႁၵ်ႉဢဵတ်းလူ၊ တၢင်းဢၼ်ႁဵတ်းၵျေးၸူး၊ တၢင်းဢၼ်ၸႂ်ၶျႃးတႅမ်ႇ၊ တၢင်းဢၼ်ၼိမ်သိမ်ႇဢူၼ်ႈဢွၼ်ႇ၊ တၢင်းဢၼ်ၸႂ်ယႂ်ႇၸႂ်ယၢဝ်းၸိူဝ်းၼၼ်ႉၼုင်ႈမႆတႃႉ။- 13ပေႃးၵေႃႉၼိုင်ႈမီးတီႈတၵ်းတၢင်ႇဢပႅတ်ႈ တီႈၵေႃႉၼိုင်ႈၸိုင်၊ ၼင်ႇၵၼ်ၵၼ်ယိူၼ်ႉၶၢမ်ႇၵၼ်လႄႈ ဢဵတ်းလူပွႆႇလွတ်ႈဢပႅတ်ႈတီႈၵၼ်တႃႉ။ ၸိူဝ်ႉၼင်ႇဢၼ်ၸဝ်ႈၶရိၸ်ႈဢဵတ်းလူပွႆႇလွတ်ႈဢပႅတ်ႈသူၼၼ်ႉ၊ သူၵေႃႈႁဵတ်းၸိူဝ်ႉၼင်ႇၼၼ်တႃႉ။- 14ဢဝ်တၢင်းႁၵ်ႉမႅတ်ႈတႃႇဢၼ်ဝႃႈ တၢင်းဢၼ်မတ်ႉၶွတ်ႇၽွတ်ႇၶဵၼ်းဢၼ်ၸေးၸုမ်ႇၼၼ်ႉ ထၢပ်ႈထႅင်ႈလႄႈၼုင်ႈမႆတႃႉ။- 15ႁႂ်ႈတၢင်းၼိမ် ၸဝ်ႈၶရိၸ်ႈဢုပ်ႉပိူင်ႇ ၵႃႈၼႂ်းႁူဝ်ၸႂ်သူယူႇတႃႉ။ သူၶၢမ်ႇတၢင်းဢၼ်မၼ်းၸဝ်ႈႁွင်ႉဝႆႉ တီႈတူဝ်ဢၼ်လဵဝ်ၵၼ် ႁႂ်ႈပဵၼ်ပုၼ်ႈၸိူဝ်ႉၼင်ႇၼၼ်ႉလႄႈ မီးၸႂ်ဢၼ်ႁူႉၸၵ်းၵျေးၸူးၸဝ်ႈတႃႉ။

16ႁႂ်ႈၼုၵ်ႈၵပၢတ်ႈတြႃးၸဝ်ႈၶရိၸ်ႈ ပႃးတင်းပိင်ႇၺႃႇၵူႈၸိူဝ်ႉၵူႈပိူင် တႄႇယူႇၵႃႈၼႂ်းသူၼမ်ၼမ်လႄႈ သူဢဝ်တင်း တၢင်းဢၼ်ႁဵတ်းၵႂၢမ်းသႃႇလၢမ်ႇဢိၵ်ႇတင်း တၢင်းဢၼ်ႁဵတ်းၵႂၢမ်းထမ်ႇမႃႉၵူႈၸိူဝ်ႉၵူႈမဵဝ်း ၼင်ႇၵၼ်ၵၼ်ႁဵတ်းတၢင်းဢၼ်သင်ႇသွၼ်သုင်းမႃႉၵၼ်၊ တၢင်းဢၼ် ပၼ်သတီႉတီႈၵၼ်လႄႈ ပႃးတင်းႁူဝ်ၸႂ်ဢၼ်ဢူၼ်ႈလီဢွၼ်ႇလီ ႁဵတ်းၵႂၢမ်းဢၼ်သၢင်ႇထုၵ်ႇၵႃႈတီႈၽၢႆႇၼႃႈ ၽြႃးပဵၼ်ၸဝ်ႈတႃႉ။- 17မိူဝ်ႈဢၼ်လၢတ်ႈၵႂၢမ်းလႄႈသင်၊ မိူဝ်ႈဢၼ်ပွင်ႁဵတ်းဢမူႉလႄႈသင်၊ ထွၵ်ႈလူၺ်ႈၼႃႇမႃႉၸိုဝ်ႈသဵင်ယေႇသူႉၶရိၸ်ႈလႄႈႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်ယူႇ၊ ဢိင်ၸဝ်ႈၼၼ်ႉသေလႄႈဝႃႈ ၵျေးၸူးၸဝ်ႈယႂ်ႇၼႃႇၶႃႈဢေႃႈ၊ ဝႃႈၼင်ႇၼႆယူႇသေလႄႈ ႁပ်ႉတုင်းဢဝ် ၵႃႈတီႈၽၢႆႇၼႃႈၽြႃးပေႃႈၸဝ်ႈတႃႉ။

ၼႃႈႁိူၼ်းၶရိၸ်ႈယၢၼ်ႇ

18ၽူႈယိင်းၶဝ်ဢိူၺ်း၊ ၵႃႈၼင်ႇဢၼ်သၢင်ႇထုၵ်ႇၼႂ်းၸဝ်ႈၽြႃးၼၼ်ႉ၊ ၶၢမ်ႇတၢင်းဢၼ်ၽူဝ်သူဢုပ်ႉပိူင်ႇတႃႉ။

19ၽူႈၸၢႆးၶဝ်ဢိူၺ်း၊ ႁၵ်ႉမေးသူတႃႉ။ ယႃႇပေႁဵတ်းတၢင်းဢၼ်ၵျၢမ်းထၢမ်းၼႃႇလူင်လၢင်။

20လုၵ်ႈလၢင်းၶဝ်ဢိူၺ်း၊ ထွမ်ႇဢဝ်ၵႂၢမ်းပေႃႈၵႂၢမ်းမႄႈသူ ၼႂ်းလွင်ႈတၢင်းၵူႈၸိူဝ်ႉၵူႈပိူင်ၼၼ်ႉတႃႉ။ လွင်ႈတၢင်းဢၼ်ထွမ်ႇဢဝ်ၵႂၢမ်းပေႃႈၵႂၢမ်းမႄႈ ၼၼ်ႉ ပဵၼ်လွင်ႈတၢင်းဢၼ် ထုၵ်ႇၸႂ်ၸဝ်ႈၽြႃးဢေႃႈ။

21ပေႃႈၶဝ်ဢိူၺ်း၊ ယႃႇပေႁဵတ်းႁႂ်ႈလုၵ်ႈလၢင်းတင်းလၢႆၸႂ်မႆႈၸႂ်လိူတ်ႇ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶဝ်တၵ်းႁွတ်ႈထိုင်တၢင်းဢၼ်ႁႅင်းဢူၼ်ႈလႄႈၸႂ်လူႉဢေႃႈ။

22ၶႃႈၶဝ်ဢိူၺ်း၊ ယင်းဢမ်ႇမီးႁူဝ်ၸႂ်သွင်ၽၢႆႇသွင်ပႃႈ၊ ယင်းဢမ်ႇထွမ်ႇဢဝ်သိုဝ်ႈၼႃႇတႂ်ႈတႃ ၸိူဝ်ႉၼင်ႇၵေႃႉဢၼ်ႁႂ်ႈၸႂ် ၵူၼ်းတင်းလၢႆဢူၼ်ႈဢွၼ်ႇၼၼ်ႉ ၵူဝ်ႁႄၸဝ်ႈၽြႃးယူႇသေလႄႈ ထွမ်ႇဢဝ်ၵႂၢမ်းၸဝ်ႈလေႃးၵီႇသူၼႂ်းလွင်ႈတၢင်းၵူႈၸိူဝ်ႉၵူႈပိူင်တႃႉ။- 23ၼႂ်းၵႃႈဢၼ်သူႁဵတ်းတင်းသဵင်ႈတင်းလူင်ၼၼ်ႉ၊ ပႃးတင်းၸႂ်ၸေႇတၼႃႇသေလႄႈ ႁဵတ်းၸိူဝ်ႉၼင်ႇဢၼ်ပွင်ႁဵတ်းဢမူႉၵူၼ်းဢမ်ႇၸႂ်ႈ၊ ႁဵတ်းၸိူဝ်ႉၼင်ႇဢၼ်ပွင်ႁဵတ်းဢမူႉၸဝ်ႈၽြႃးၼၼ်ႉတႃႉ။- 24သူတၵ်းလႆႈၶၢမ်ႇဢဝ်ဢၵျူဝ်းဢၼ်ဝႃႈဢမူၺ်ႇၸဝ်ႈၼႂ်းမိုဝ်းၸဝ်ႈၽြႃးဝႃႈၼႆႉမၢတ်ႈတွင်းဝႆႉတႃႉ။ ၶၢမ်ႇတၢင်းၸႂ်ႉတၢင်းသွႆၸဝ်ႈၶရိၸ်ႈတႃႉ။- 25ၵေႃႉဢၼ်ႁဵတ်းဢမူႉဢၼ်ဢမ်ႇတြႃးၼၼ်ႉၸမ်ႉ၊ တၵ်းလႆႈၶၢမ်ႇဢၵျူဝ်းဢပႅတ်ႈဢမူႉ တၢင်းဢၼ်တူဝ်ၸဝ်ႈၵဝ်ႇႁဵတ်းၼၼ်ႉဢေႃႈ။ မၼ်းၸဝ်ႈဢမ်ႇတူၺ်းၼႃႈၽူႈလႂ်သေၵေႃႉသေၵူၼ်း။

Currently Selected:

ၵေႃးလေႃးသေး 3: CBMS

Highlight

Copy

Compare