ROMA 5
5
Allah ninom dambulurak wene
1Nir ebebar andarugu paga, Allah ninom wim mbalek mende dambulinakige o. Etama, yogondak nir Yesus Kristus paga, Allah ninom kunik pano dambulik dogowok o. 2Nir nen ar Yesus oba ebebar andamo, Ar nen Allah iliti kunik erninaka mende erninabigin o. Nir yogondak ya ninakba karige eti paga agorik o. Nir nen Allah adeknggen nggok erogo wokneragin ma, niniliti adeknggen ar dogowok o! 3Nen anggin panggin ninoba wuka kalok, niniliti adeknggen paga waganggu dogowok o. Nenaluk, anggin panggin ninoba wuragin eti paga, kunik kanik erurak erninabigin o. 4Nen akuni kunik kanik erir lagwi eti paga, maduk eru erinaka kigik wogalek dogogun o; nen wene ebe yi paga nen, ninakla mbektek mondok dogorak eti kenam arigin o. 5Nir oba mbektek agorik mende eti, dek arigin dek o. Allah nen nir ninilitimo, Ar Iliti ninaba karige mende eti kunogo birigemo, Ar Allah nen Roh Allah wokneragage paga, ninom kunogo binaninggige mo o.
6Ar Allah nen o mirogo birige paga, nir nen erurak ndak dek mende, Kristus nen nir ninake wartagage o. Nir ninebe Allah ninom ndorek ninagik ekige o. 7Ar akuni ambi pano mor-mor ekwa mende nen, wedek ugunar kambu wadok dek ar o. We ar akuni ebe pano mende eti nen perak, ugunar wataru akla tabok a? 8Ogwe, nir maduk ekwi akla werek kigik, Ar Kristus nen, ninake wartagage eti paga, Ar Allah nen ninakba karige mende eti kenam agage o. 9Yogondak, Ar Kristus nir ninake wartagage eti paga, nir Ar Allah ninom dambuloga binaninggige o; nenaluk Ar Allah anini ekanem, Ar Yesus paga ninebe ndilogo binanigin o. 10Nir Allah ninom wim mbalek welagagu mende, Ar Akbur paga dambul ninakige o. Yogondak nir Allah ninom pano werekma, Kristus paga ebebar ndilninabigin o. 11Nen wene unggune kwak eti, Ar Allah obabur pano nen ekige eti, Ar Tuhan Yesus Kristus paga kenam agagerek ma, ninakla adeknggen ar dogowok o. Nenaluk Ar Kristus paga nen, nir yogondak ya, Ar Allah ninom kunik pano werek o.
Ar ap Adam o nen Kristus o inawene
12 #
Kej. 3:6
Ar ap ambiar paga, maduk edo agar paga yoma unggwi wagage, nen maduk eti paga nen kanggwi edo kenam agage o. Maduk eti paga nen kanggwi edo mende eti, akuni inoba wigak yirige. Nenaluk ir akuni obogar nen maduk ekugwama o. 13Agama Yahudi wene kindirik wogoragikdek kigik, ar maduk eti ndak, o agar taga yoma welagage mo o. Wene kudi warekdek ma, yi kwak maduk o, yiluk yurak ndak dek arar welagage. 14Adam kenam agage nen lok ar Musa welagage kudi, watagwi mende eti nen, ye akuni nde akuni obogar tebelogo balok welagage. Ap amberak nen, Adam maduk ekige ndak-ndak ekikdek ar mende, ap eti inom ar watagwi mende apma welagwi o.
Ar Adam eti, ar ambi yabongga warigin mende eti ake walkigik arar o. 15Eta mende, ir imbirak inugu kunik dek. Nenaluk Ar Allah nen wokneragage mende eti, Adam maduk ekige teberogo wukdiluk wokneragage o. Ap ambi nen maduk ekige paga, akuni ambigar watagu lagugwa, ogwe Ar Allah obabur pano nggok mondok mende etima, Ar Yesus Kristus ninakba nen, ye akuni nde akuni ninagap endak ninakige eti, wene nggok mende arar o. 16Allah nen onggo dek wokneragage eti, ap ambi nen, maduk ekige mende teberogo mbo dambe kalok, nggok pano mende wokneragage o. Ap ambi maduk ekigemo, “Maduk obok ninoba ertagage o.” Ogwe, akuni obogar maduk agugwa mende, Ar Allah onggo dek ekige mende eti, “Maduk kinoba dek yirige eti arar o,” yiluk yorneragage. 17Ap ambi nen maduk ekigemo, ap eti paga kambir lagu dogorak mende edo, o ya nda wigak yirige o. Arar mende wene ibiluk nggok mondok mende eti, Ar Yesus Kristus obabur pano nen ekige eti arar o. Ar paga nggwe tu, Ar Allah ninakba nggirik eti akuni pakalogar ninakba kalok, onggo degar woknirarige o. Nen woknirarige eti paga, nir nen Ar Allah ninom pano agwi, nen Ar Kristus paga tu, o agar taga yoma, inapma tebelogo biluk dogogun o.
18Yogo, ap ambi nen maduk ekige paga, akuni obogar maduk erogo barige. Eterogon ar, ap ambi nen Ar Allah iliti mirik mende, mutok lagage paga, akuni obogar kede pigalogo balok, iniluk dogorak mende eti wogoragage o. 19Ap ambi nen wene yugu mutok erukdek ekige paga, akuni obogar maduk inoba tedek yirige o. Eta ndak-ndak, akuni ambi nen Ar Allah apma tebe yiluk ekige paga, akuni obok Ar Allah inom pano aru tuan yarogo birige o. 20Yahudi inawene kindirik etoma, Allah nen ar wogoragage o. Ogwe ir akuni wene kindirik etoma pano eruwok yiluk eketek mende, pano erurak mondok ndak dek atuk, Ar Allah ilka paga maduk mban ekwi o. Nen ir akuni maduk nggok togo erir lagwi dagik ar, Allah nen ir inakba karige mende eti, ibiluk inakba nggok togo kertaga o. 21Ebe eta ar o, ma nir maduk eku lagagu onggo kanggu lagagumo o. Ogwe, Ar Allah nen nir ninakba kalok, ar ninom pano dambuluwok yiluk, tuan adik kwagago wokneragage o. Nen nir Ar Allah ninom pano agagumo, Ar Yesus Kristus nen niniluk pano dogorak mende inom, nabedal kabedal erurak mende edo inom wokneragage o.
Currently Selected:
ROMA 5: WLW
Highlight
Copy
Compare
Share
Want to have your highlights saved across all your devices? Sign up or sign in
