ROMA 4
4
Abraham ebebar andarige paga, ar ebebar mende yorige wene
1Eta kalok, yogondak nir ninumbu Abraham abok nenggerogon yurak? Ar nen nenggerogon eka lagage? 2Ar nen eka kalok, Ar Allah nen an niliti adeknggen ernaken o yiluk yorige. Eti paga, ar adeknggen kega dogu edo bu ndagar o. Ogwe Ar Allah ilkama ar nen wogokdartau ndak dek o. 3#Kej. 15:6; Gal. 3:6Alkitab paga diru mbalku dogolir, “Abraham nen Ar Allah oba ebabar andarige, ar ebebar andarige eti paga, Allah nen yi an niliti adeknggen eka kigi o,” yiluk waganggige. 4Ap yabu eketek onggo kodagwi eti, we onggo dek wogoragwi dek, eti yabu ekwi onggo kodagwi. 5Ogwe, ir akuni amberak nen, ir nen ekwi paga penggarek dek o. Ar nen Ar Allah akuni maduk inoba nggoritaga mende oba, iliti ebebar andalok panggolka eti paga arar o. Wene edo eti paga nen, Ar Allah nen akuni eti, an niliti adeknggen erir taga o, yiluk waganigin o. 6Daud akla andarige mende, eti ndak-ndak ar, ir akuni Allah iliti adeknggen erogo bugwi mende eti, Ar Allah nen inomaduk eketek mende, tebek togo dambe kalok wogonabir taga mende o. Mar ar Daud nen yegerogon yirige,
7 #
Mzm. 32:1-2
“Ir akuni wene nggodo ekugwa mende maga baga,
nen ir inomaduk ekugwa mende dek erogo baga ekige mende eti, inadeknggen arar o!
8Nen ir maduk ekugwa mende, Ar Tuhan nen inuwak doligin dek mende eti, inadeknggen arar o!”
9Inadeknggen wene yi, ir akuni sunat erinakwi mende yoragage a? Ir akuni sunat ekwi dek mende inake yoragage a? Nir alep arar yogo o, ar Abraham Allah oba ebebar andarige paga, Allah iliti adeknggen erogo birigemo, Allah nen kar pano eken o, yiluk waganggige o. 10Eti ar ma, wene eti menda nen yorige kogop? Ar Abrahamsunat erukdek kigik a, sunat ekigerek kigik a? Ebe sunat auwan ekidek kigik, ekbiluk yorige dek o. 11#Kej. 17:10Nen Ar Allah oba iliti ebebar andalok ekige paga, Ar Allah iliti adeknggen agage o. Ma sunat eti, yabungga erin yiluk yorigemo ekige eti, Ar Allah iliti adeknggen atuk, ar ebe waganggige eti yenggak erogo eri yorige o. Ar ebe sunat ekwi eti awene mutok lagikdek kigik, Ar Allah nen waganggige. Nen ar Abraham akuni ebebar andarugwa mende inombae rohani paga erogo birige o. Nen ir akuni sunat ekikdek mende eti, ir iniliti ebebar andagwi paga, Ar Allah iliti adeknggen erogo bugwi ma, Ar Allah nen inebe wogonabir taga o. 12Abraham eti, ir akuni sunat erek mende inombae rohani paga arar o. Ir sunat erek paga dek, eti, ir nen Ar Allah oba ebebar andarugwa paga, Abraham welagage ndak-ndak ekwi kalok, eti ir Abraham akburi wigalek arar agarik o.
Ebebar andagwi paga, Allah Ane amburu yugu waganurak wene
13 #
Kej. 17:4-6, 22:17-18; Gal. 3:29 Ar Abraham, Ar Allah oba ebebar o yiluk andarige paga, ar ebe eti, akuni Ar Allah iliti adeknggen erogo bege mende o yiluk, ebe waganggige o. Eti paga nen, Ar Allah nen, kar Abraham inom, kumbui inom, o agar paga yoma, kir arar onde arugun o yiluk Ar Allah Ane amburu eti yorige o. Ogwe, ar Abraham nen agama Yahudi wene kindirik mutok ekige paga yorige dek o. 14#Gal. 3:18 Nenaluk, ir akuni nen, wene agama Yahudi inawene edo kindirik mutok lagwi mende mban, Ar Allah Ane amburu yirige mende eti kodagun kalok, Ar Allah oba ebebar andaurak eti ela matak arar, nen Ar Allah Ane amburu yirige eti enggen dek mban arar o. 15Wene hukum Agama Yahudi edo kindirik eti paga, Ar Allah mende hukuman inoba wurabi taga. Ogwe hukum eti ebe dek kalok, wene nadok-kadok maduk ekwi mende eti ebe dek ar o.
16 #
Gal. 3:7
Ir Akuni nen, Ar Allah oba ebebar andagwi paga, Ar Allah Ane amburu yirige eti onde arurak o. Ar Allah Ane amburu yirige eti paga, kir Abraham umbui mende eti, Ar Allah nen onggo dek arar wokeragin o. Ma ir akuni agama Yahudi wene kindirik mutok lagwi mende mban dek o, ogwe ir akuni amberak nen, Ar Abraham nen Ar Allah oba ebebar andarige eti ndak-ndak, ir nen ebebar andagun mende eti inom ar o. 17#Kej. 17:5Eta ma, Allah nen Abraham yegerogon yorigin o, “An nen, kar eti ye akuni nde akuni obogar inombae arar menogo bagagi o.” Eterogon Ar Allah Ane amburu eti ar Abraham oba birige o. Nen ar Abraham nen ebebar o, yiluk oba eberogo waganggige. Nen Ar Allah eti Allah akuni iniluk erinakwa arar o. Nen Ar Allah eti, Ane yega kigik, ye wene nde wene ebe dek mende kenam erogo bogwa arar o. 18#Kej. 15:5Wene etaru akumak degar kigik mende, ar Abraham iliti ebebar andalok, iliti oba mbektek welagage o. Eta paga nen, ar akuni obogar inombae agage o. Eti Alkitab mbalek paga ndak-ndak arar o, “Kar kumbui endago ambigar wigalarugun o.” 19#Kej. 17:17Eta paga, ar Abraham elege endarurak ndak dek arar agagemo o. Ar ebe kedau arar nen umur seratus tahun negen arar panggo yi lagagemo o. Agwe kwe Sara eti, ar ebe yibidi mende o. Ogwe ar Abraham nen ebebar andarige enogo bugudak arukdek o. 20Ar nen Allah wene warogo birige eti erigin o, yiluk mondok pago welagagemo o. Allah oba um palek paga, ar ebe obarne ar welagage. Eta etaga paga, ar nen Allah endaga wogor dega lagage. 21Ar nen Allah nen erigin yotnege mende eti, ebebar erigin o, yiluk oba panggok diluk welagage o. 22Eta paga, Ar Allah nen, ar Abraham eti Ar Allah iliti adeknggen erogo banengge o yiluk, ebe waganggige. 23Wene “Ar Allah iliti adeknggen erogo bogwa mende yiluk waganggige eti” ar Abraham ake mban diru warek dek o. 24Nir ninake inom ar yirigemo o. Nir ogwe Ar Allah iliti adeknggen ekugu mende o yiluk, ninebe wokninabigin ar o. Nenaluk, Ar Allah nen ar, Ar Tuhan Yesus eti warek ma nen iluk erogo mendirige o, yiluk nir ninakla ebebar andarugu eti paga arar o. 25#Yes. 53:4-5Ma Ar Yesus eti nir akuni maduk ekwi onggo, Ebe waruak nen yiluk wogoragage o. Tuguluk Ar ebe Ar Allah nen, iluk erogo mendirige paga, nir Allah ninom dambulogo binaninggige o.
Currently Selected:
ROMA 4: WLW
Highlight
Copy
Compare
Share
Want to have your highlights saved across all your devices? Sign up or sign in
