ROMA 6
6
Ninomaduk ake kambiluk, Kristus ninom niniluk arurak wene
1Etegerogon kalok, nir nen nena yurak kogop? Allah nen nggok togon ninakba kowak nen yiluk, maduk mban eku dogorak kogop a? 2Eta ndak-ndak dek o! Nir yogondak maduk apma agorik dek o. Etama, nir nen maduk mban erir lagu dogorak eti ndak kogop? 3Nawor nakbur o! Nir ima wukdinanunggwi kigik, Ar Kristus Yesus ebe, nir ninom ambi ar kunagagu eti kinunggukdek a? Ebe eti, nir Ar Kanggige paga ambi ar agagumo o. 4#Kol. 2:12Ima wukwi paga, nir ninebe Ar Kristus ninom nen wartagwi nen ninom ar kubur erogo binanunggwi o. Eta paga nen, Ar Kristus Ombae endaga mbogor obarne paga, Ar warek ma nen iluk ekdirige ndak-ndak, nir niniluk ngger mende paga arar dogogun o.
5Nir Kristus ninom kunik paga, ninom kanggugurikma, nir ar ninom kunik paga, niniluk erogo men binaninggigemo agorik o. 6Nir maduk ekikdek, wender dogowak yiluk, ninobabur pagane mende dek aruwak yiluk, Kristus ninom o kari-karo warogo binanunggugwa o. Eti paga ma, nir ninobabur maduk paga mende eti mbo lakbugwi ninalok, nir ninebe maduk ayedoman mende dogogun dek o. o. 7Ar akuni ambi nen arar kanggigemo kalok, ar eti maduk obarne apma nen obok kede pigalek arar agarik. 8Nir Ar Kristus ninom kanggugumo kalok, nir ogwe Ar ninom niniluk arugun yiluk, nir ebebar andawok o. 9Kristus warek ma nen arar iluk erogo men dirige o. Nen Ar ebe ambi inom kambigin dek o. Kanggwi mende obarne ambik welagage ernogo, Ar ebe kanggige paga nen obarne dek erogo birigemo o. 10Ar Kristus wartagage eti ninomaduk ake paga arar o. Nen mondok-mondok aitok dogorak ake paga, ambi paga eti arar wartagage o. Nen, Ar Iluk yogondak agarik mende eti, Ar Allah ake arar o. 11Kir nen nir ninomaduk ake arar kanggugumo yiluk andagu dogorak o. Ogwe ninebe Allah ninom kunik pano eti, Ar Kristus Yesus ekige paga arar agorik o, yiluk dogorak o.
12Maduk kinilitimo werek eti nen tebelogo binagaluk, maduk mban eku dogowak paga, kinakla maduk mende eti mutok lagu dogogup o. 13Kir kinebe kinagakdo, maduk eruak yiluk obalikmo telek erogo ar maduk eti wogoragup o. Nen, kinebe obogar, Ar Allah nen warekma nen wuldinani wagagemo yiluk Allah wogotuk dogoni o. Kinebe obogar Ar Allah nen kir paga eka dogowak nen yiluk, Ar Allah wogotuk dogoni o. 14Maduk nen tebelogo binagaga kau o. Nenaluk Kir agama Yahudi inawene kindirik apma agoktip dek o. Nenaluk Ar Allah nen kinakba karige eti apma agokip o.
Allah iliti mirik ayedoman atuk eku dogorak wene
15Yogondak wene enggen mende nenggerogo yugun kogop? Nir yogondak ya agama Yahudi awene kindirik uwakma agorik dek o, ogwe Ar Allah ninakba nen uwakma binanggigemo agorik o. Eta kalok, nir nen maduk eku dogu ndak a? Ambi paga eru ogwe mondok dek arar o! 16Kir kinilu o, kir nen ar akuni ambi eyabu eku dogu paga kinebe ar wogorugun kalok, kir eti ar eti ayedoman mende arar dogogun o. - kir nen an maduk ayedoman arik o, yiluk yugwi kalok, maduk eti nen wokerek wartarir tagwi edo oba binagi ligin o. Nen, Allah ayedoman arik o yiluk mutok lagwi kalok, Ar Allah kinom pano dambulik dogogun o. 17Ogwe yogondak Allah wa yiluk yoruwok o! Nenaluk kir o pagane etoma, maduk ayedoman welagagup o. Ogwe yogondak, wene ebebar mende emerkerar tagwi eti mutok arar lektagwi o. 18Yogondak kir maduk uwakma nen, kinebe wender erogo binagarigemo, nen yogondak Ar Allah iliti mirik ake ayedoman erogo binagarigemo agokip o. 19Kir kiniliti auwan ma, kir nen wene yi tenggelubagik nen yiluk, wene yedoman paga oba lirogo yorkeragi o. O pagane etoma, kir nen kinebe obogar ar maduk eti ake inom nen agode yurak mende ake inom, nen yiduk maduk mende etoma ake wogortuk welagagup o. Eti ndak-ndak ar, yogondak kir kinebe obogar Ar Allah iliti mirik ayedoman ertatuk, Ar Allah adik iliti wadok mende mban erir lagu dogoni o.
20Kir ar maduk eti uwak ma dogolir, kir Ar Allah iliti mirik apma binagaluk dogoluk dek o. 21Kir eta ekwi onggo nena wokeragage? Yogondak kir nen eru enggadi ambik werek. Kinobabur eta ekwi paga, kinebe wokerek warek eti apma binagi laga lagagemo. 22Nen, yogondak kir maduk uwakma nen wender erogo binagarige o. Nen Ar Allah ayedoman erogo binagarige, onggo eti kir Allah ake pulik pano kinaitok mende dogogun o. 23Maduk ekwi onggo eti kanggwi arar o. Ogwe, niniluk nabedal kabedal dogorak mende eti, Ar Allah nen, Kristus Yesus Tuhan eti, onggo dek wedek arar wokneragage o.
Currently Selected:
ROMA 6: WLW
Highlight
Copy
Compare
Share
Want to have your highlights saved across all your devices? Sign up or sign in
