2 KORINTUS 9
9
Inogari Ar Allah akburi mende yonggwak darugwa wene
1Ebe an nen Ar Allah akburi, o Yudea mende inake lakbogop yi ndak-ndak erni o, yiluk surat mbalogo kinoba lakbi warurak mende eki o. 2Kir nen akuni obogar yamak dagwi niluma, an nen kir erir tagwi mende kinabok waganogo wolok, ir akuni Makedonia mende inuwagam kinabok pano mbililogo yora taga o. An nen yoraga dogolir, kir kinogari o Akhaya mende, o alep nen ar obogar yamak dawok yiluk, denggal diluk agarik o yiluk yoragagi o. Kir kinakla adeknggen paga, eruwok nen yiluk agarik o yiluk, an yoragagi o. Kir kinadeknggen paga eruwok yiluk yogop enogo paga, ir amberak obogar iniliti abodok ekigemo agiyarik o. 3Yogondak Titus inom, ogariyak mbere endi inom, ir kinoba lakba wagi o. Nir nen kir erir tagwi mende kinabok waganogo pano yirugu mende, ir nen ap yi inenggal nggirik yoneragunem yiluk, an nen yoraga dogolir, ir obogar ndegelogo begarik werek o yiluk yoragarikmo, kir nen arar ndegelogo pik puk biluk dogoni o. 4An niliti pirik erir taga eti, ir akuni o Makedonia mende ambi ninom kinoba warumo, an nen ir Akhaya mende obogar ndegelogo begarik werek yoragarikmo, kir awan ndegelkikdek werekma inil kinalok, an nenggadi aga, kir inom kinenggadi arurakma, kir auwan paga mondok ndegelogo biluk dogobagik nen yiluk yokeragagi o. 5Kir nen nir inom yamak dagu dogogun yogop etnogo, uang bogop mende ndegelu paga, ir alep kinoba lakba wagi endi o. An eki enda an auwan wagikdek nagik, kir obogar ndegelogo biluk werekma, an uang bogop ebe waganurak paga arar warigin o. Etegekamo, wogoragop etoma akuni inane obarne paga dek, arte iniliti adeknggen paga ekama o yiluk, wene yurau pano o.
6Wene yi kinilu arni o! Ap ambi aingge bugudagar nduligin kalok, enggen bugudagar mbaligin o. Nen ap ambi aingge ambigar nduligin kalok, enggen nggok ar mbaligin o. 7Akuni inebe inadikndak iniliti adeknggen paga nen burak. Ar a'ir kigik, akuni inane obarne paga bin yorumo nen burak dek ar o. Akuni iniliti adeknggen paga wogoragunem, Ar Allah iliti adeknggen inoba kunik agarik o. 8Ar Allah obarne ambikma, Ar nen kinamende ambik erogo wokeragin o, kir kinake ndugurik mondok dogowak nen yiluk kinamende ambi erogo wokeramo, kir nen akuni inamendek dek kalok wogoragwi, pano erinakwi, erubagik nen yiluk yorkeragi o. 9#Mzm. 112:9Ar Allah abok Alkitab mbalek paga yegerogo yirige,
“Ar Allah nen akuni ininggi dek mende inoba nggilu-nggilu erogo wogoraga.
Iliti pano aitok mende inom kunik mondok dogogin o,” yiluk yirige.
10 #
Yes. 55:10
Ar Allah nen ai yaru mende, ai yakwa inake bega, nau mende, nir ninake bega, ekige. Ar nen ai yakop mende ndugurogo bega, enggen ambik erogo bega, kir nen wogorau mende ambigar erogo bega erigin o. 11Eterogon erumo, kir kinamende ye eru nde eru ambik aga kigik, kiniliti adeknggen paga, akuni wogoragu dogogun o. Kir nen akuni yamak dau mende, nir nen tumburogo wogoramo, ir kodalok nen inane dombok nen Ar Allah wa, yiluk yogwi erugun o. 12Kinobabur pano, akuni inakba ekwa kiniliti pano paga, akuni Ar Allah akburi mban yamak dagop mende nen mban dek o, akuni kir nen yamak dagwi, inil kinalok inane paga dombok nen, Ar Allah wa yiluk yoritagwi ar o. 13Kinobabur pano paga, pano dogorak yi o yiluk tik dagopma, ir Kristen mende o Yudea werek mende obogar nen, kir kinoba tagin paga wene Pano Wene Kristus ekige mende mutok lagwi lakinalok, Ar Allah wogok dugwi erugun o. Kinobabur pano nen ir akuni o Yudea mende inom, akuni amberak inom, kinamende kininggimo werek mende paga tumburiragwi kinalok, ir obok nen Ar Allah woguk dugwi dogogun o. 14Ar Allah nen kinobabur pano ekinakige inil kinalok, ir nen iniliti kunik paga, kinake tamban nggok eku dogogun o. 15Nir nen ye mende nde mende ambik kado milogo wokneraga paga, Ar Allah wa, yogu doguwok o!
Currently Selected:
2 KORINTUS 9: WLW
Highlight
Copy
Compare
Share
Want to have your highlights saved across all your devices? Sign up or sign in
