2 KORINTUS 10
10
Ar Paulus yabu eka erakde mbalarige wene
1Yogondak an Paulus nen, wene ambi kir erubagik nen yiluk, kinoba lakbi warir taga o. An Paulus ir akuni nen yonugu dogolir: Paulus yi korok nen pano-pano talek, walek nen ane kode ambik o yiluk yonugwi o. Yogo, Ar Kristus iliti ninakba nen, obabur pano paga ane yanggorogo yoneragagemo, an eta ndak-ndak dogu wadok andar taga o. 2Yogondak an nggino yokerar taga o, an kinoba watuk nen, nane kode paga yogerawak nen yiluk erugup o. An watuk nen, ir akuni nen nir yi agar paga mende kwarir netagwi o yonerar taga mende eti kwak, nane kode paga yorak nen yiluk, an warigin o. 3Nir yogondak ya, ebebar agar paga ya agorik mende, agar paga mende etoma kwarir nugwi dek o. 4Nir wim eruwok nen yiluk, tega wolok erir letagwi yoma, agar paga mende dek o. Nir nen Ar Allah obarne ambik arega wolok erir lek tagwi o. Arega eti paga inai edoma miyalkwi, inane yugunem inane tebelkwi, erir lek tagwi o. 5Ir nen Ar Allah awene pano wene dek eruwok nen yiluk, inanini paga wim ai palkugwa mende miyalir tagwi o. Nir nen akuni iniliti nomalogo wogorek Kristus oba kunogo bagwi erir tagwi o. 6Yogondak kir kiniliti paga ar mutok wagwi kinalok, nir nen ir akuni Ar mutok wagwi dek mende etoma, ir inoba anggin mende wurabi waruwok nen yiluk warugun o.
7Kir nen nir ninobabur nenggerogo dogorak yiluk, pano pik pak dikbiluk nen erir lagu dogoni o. Kir ambi nen an yi nebe Kristus mende o, yiluk andega kalok, nir agorik kwak ar ebe Kristus oba imbirak peralek mondok dogorak o. 8An ninewe Obarne wornirige eti paga, an yade daktamo etoma aruwan paga o, eta erumo an nenggadi yurak dek o. Nenaluk, ar obarne eti kir mor-mor erogo binagu paga yiluk woknirigemo o. Kir miyak denggak ekinabuwak yiluk wornigik dek o. 9An nen surat eki endoma paga, kinobade erogo binagu yiluk dek o. 10Kir nen yugu dogolir, “Ar Paulus surat mbalka dogolir, ane mondok bogok togon mbalekma, alon ambik yugwi mende, ar ebe nir ninom werekma, ebe oba lukbuk, ane aik dek pano o,” yitagwi o. 11Ir akuni inobabur, inane eterogo yir tagwi mende, kir kinom kinakla werek kalok, nir watuk nen wene surat paga bogo endi ndak-ndak ar erugun o, yiluk kinilu dogono o.
12Ebe ya, ir akuni nir kwak wene ninilu nen ninanggup lektek yiluk andugwi mende eti, nir nen ir ekwi inoba il walkigik erurak ndak dek o. Ir inebe nggembu mende arar o. Ir nen ir inoba walkalok, ir ekwi mban pano o yiluk yoragu dogorak paga mban ekwi o. 13Nir eta ndak-ndak dek. Nir nen wogokdatamo, agudi warek paga ar erugun o, nir Ar Allah nen o yabu kudi warogo binanggigemo eta ar eku dogogun o. Nir nineyabumo eti kir arar o. 14Nir bikinar wagu dogolir, wene pano wene Kristus ekige mende wolok kinoba watukmo, yabu nir erir taga ma kudi warek yambuk togo togokdiluk wundugun mondok dek o. 15Nir ir ambi ineyabumo, Ar Allah nen kudi warogo barigemo etau paga, nir nen ekoma o yiluk wogok dartagun mondok dek o. Nir Ar Allah nen yabu kudi warogo binanggigemo ya ar eku dogogun o. Kir nen Kristus oba korok togo panggolek dogomo, nir kir ninom dogolir, yabongga yabu nggok mende amberak inom erir lagu dogogun o. 16Eterogo erir lagu dogolir, nir nen wene Pano Wene eti, akuni adik inuma inom, yorar lagu dogolir, ir ap adik mende ineyabu etau paga, nir wogok daktagu dogolir, yorar lugun mondok dek o.
17 #
Yer. 9:24
Alkitab mbalek paga nen, “Kir nen yade daktawok nen yiluk kalok, Ar Allah nen erogo binagage paga wogok dugu dogoni o,” yiluk yirige. 18Ir akuni nen, an pano yiluk wogok daktagwi mende paga, wogokdaurak dek o, ap wogokdaurak eti, Ar Allah nen ap yi o yiluk, woguk dega kalok, nir nen woguk durak pano o.
Currently Selected:
2 KORINTUS 10: WLW
Highlight
Copy
Compare
Share
Want to have your highlights saved across all your devices? Sign up or sign in
